ଆମ ବିଚାର 

ଆଲୁଅ ଜଳିଲେ

କିଏ ସେ କହଇ

ସବୁକିଛି ଦିଶୁଅଛି,

ଆଉ କିଏ କହେ

କ’ଣ ବା କହିବି

ଦେଖିପାରୁ ନାହିଁ କିଛି ।

 

ଦେଖି ପାରୁଅଛି

ଦେଖି ପାରୁ ନାହିଁ

ସତ କିଏ କହେ ମିଛ,

ଅବା ହୋଇ ପାରେ

କେବଳ ହିଁ ସତ

ଅଥବା ଦୁହେଁ ହିଁ ମିଛ ।

 

ଏବେ ଆସିଗଲା

ବିଶ୍ବାସର କଥା

ବିଚାର ବିମର୍ଶ ବେଳ,

କେବେ ପରିସ୍ଥିତି

କେବେ ପରିବେଶ

ସ୍ଥାନ କାଳ ପାତ୍ର ଖେଳ ।

 

ଆଲୁଅରେ ଯିଏ

ଦେଖିଛି କହିଲା

ବିନା ବିଚାରେ ସରିଲା,

ଯିଏ ନାହିଁ କଲା

କିଛି ସେ ଦେଖିନି

ତର୍ଜମା ଆରମ୍ଭ ହେଲା ।

 

ଆଖି ନାହିଁ ଯାର

କିଛି ସେ ଦେଖିନି

କହିନି ତ ସିଏ ମିଛ,

ବିଚାରକ କାହିଁ

ବିଚାର କରଇ

ସତ ମିଛ, ମିଛ ସତ ।

 

ଗଦାଧର ସାହୁ,

ବ୍ରହ୍ମଗିରି,ପୁରୀ