ପିନ୍ଧା ଶାଢ଼ୀ ନେଲା ଜୀବନ

ହାଟଡିହି, (ବିକାଶ ବିଶ୍ୱାଳ):ପିନ୍ଧା ଶାଢ଼ୀ ନେଲା ଜୀବନ, ବାଇକ୍ ଚକରେ ଶାଢ଼ୀ ପସିଯିବାରୁ ବାଇକ୍ ରୁ ପଡି ମହିଳା ମୃତ୍ୟୁବରଣ କରିଛନ୍ତି। ଏପରି ଏକ ଅଭାବନୀୟ ଘଟଣା ଘଟିଛି ଛେନାପଦି – ସୁଲଣ ରାସ୍ତାରେ। ଆମ୍ବୋ ଗାଁ ର ଶଙ୍କର୍ଷଣ ଜେନା ଓ ପତ୍ନୀ ସଞ୍ଜୁଲତା ଜେନା ବାଇକ୍ ଯୋଗେ ଛେନାପଦି ଛକକୁ ଆସୁଥିବା ସମୟରେ ଏଭଳି ଅଘଟଣ ଘଟିଛି । ଦିନ ଗୋଟାଏ ବେଳେ ସ୍ବାମୀଙ୍କ ସହ ବାଇକରେ ବସି ଆସୁଥିବା ବେଳେ ହଠାତ୍ ସଂଜୁଲତାଙ୍କ ପିନ୍ଧା ଶାଢୀର କାନୀ ବାଇକ୍ ପଛ ଚକରେ ପସିଯିବାରୁ ଶାଢ଼ୀ ଟି ବାଇକ୍ ଚକରେ ଗୁଡ଼ାଇ ହୋଇ ମହିଳାଙ୍କୁ ଟାଣି ନେଇଥିଲା। ଫଳରେ ମହିଳା ଜଣଙ୍କ ବାଇକ୍ ରୁ ତଳକୁ ଖସିପଡି ଥିଲେ। ତାଙ୍କ ଅବସ୍ଥା ଗୁରୁତର ଥିବା ଦେଖି ତାଙ୍କ ସ୍ଵାମୀ ତୁରନ୍ତ ଆମ୍ବଲାନ୍ସ ଡକାଇ ତାଙ୍କୁ ଉପଖଣ୍ଡ ଚିକିତ୍ସାଳୟକୁ ନେଇଥିବା ବେଳେ ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏଭଳି ଘଟଣାରେ ସମଗ୍ର ଅମ୍ବୋ ଗ୍ରାମରେ ଶୋକର ଛାୟା ଖେଳିଯାଇଛି।