ବିଦ୍ୟୁତ ସଂସ୍ପର୍ଶରେ ଆସି ବୃଦ୍ଧ ମୃତ, ଗ୍ରାମରେ ଚାପା ଉତ୍ତେଜନା

ଆରଡି, (ଆଲୋକ ଚନ୍ଦ୍ର ନାୟକ):ଚାଷଜମିରେ ବିଦ୍ୟୁତ ତାର ଘେରାଇ ଜଣେ ବ୍ୟକ୍ତି ଆଇନକୁ ହାତକୁ ନେଇଛନ୍ତି । ଏହି ତାର ସ୍ପର୍ଶ କରି ଜଣେ ବୃଦ୍ଧ ମୃତ୍ୟୁ ବରଣ କରିଥିବାରୁ ଗ୍ରାମରେ ଚାପା ଉତ୍ତେଜନା ସୃଷ୍ଟି ହୋଇଛି । ମିଳିଥିବା ସୂଚନା ଅନୁସାରେ ଭଦ୍ରକ ଜିଲ୍ଲା ଧୂଷୁରୀ ଥାନା ଅଧୀନକୋରୁଆ ଗ୍ରାମର ବୁଦ୍ଧିରାମ ବେହେରା(୬୦) ସୋମବାର ଅପରାହ୍ନରେ ଘାସ ଆଣିବା ପାଇଁ ଗାଁ ନିକଟ କୁନିଆ ପାଳକୁ ଯାଇଥିଲେ । ଫେରିବା ବେଳେ ଚାଷ ଜମି ପାର୍ଶ୍ଵରେ ଦିଆ ଯାଇଥିବା ବିଦ୍ୟୁତ ସଂସ୍ପର୍ଶରେ ଆସି ସେଠାରେ ଟଳି ପଡ଼ିଥିଲେ । ଖବର ପାଇ ଗାଁ ଲୋକେ ପହଞ୍ଚି ତାଙ୍କୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ଓ ତାଙ୍କର ଶବ ବ୍ୟବଚ୍ଛେଦ କରା ଯାଇଥିଲା । ପୋଲିସର ସୂଚନା ଅନୁଯାୟୀ ଗ୍ରାମର ଉତ୍ତମ ଜେନା ନିଜର ଜମି ପାର୍ଶ୍ଵରେ ବିଦ୍ୟୁତ ତାର ଘେରାଉ କରିଥିଲେ। ଦୁର୍ଭାଗ୍ୟ ବଶତଃ ବୁଦ୍ଧି ରାମ ଏହା ସଂସ୍ପର୍ଶରେ ଆସି ମୃତ୍ୟୁ ବରଣ କରିଥିଲେ । ମୃତକଙ୍କ ପରିବାର ପକ୍ଷରୁ ଧୂଷୁରୀ ଥାନାରେ ଏତାଲା ଦିଆ ଯାଇଥିଲା । ସେଠାରେ କେଶ ନଂ ୩୯୯/ ୨୪ ରେ ଏକ ଅପମୃତ୍ଯୁ ମାମଲା ରୁଜୁ ହେବା ସହ ଉତ୍ତମ ଜେନା କୁ କୋର୍ଟ ଚାଲାଣ କରା ଯାଇଛି । କୋର୍ଟରେ ତାଙ୍କର ବେଲ୍ ପିଟିସନ ଖାରଜ ହେବାରୁ ଉତ୍ତମଙ୍କୁ ଜେଲ ହାଜତକୁ ପଠାଇ ଦିଆ ଯାଇଛି ।