ମାଧବ ମନ୍ଦିରରୁ ଶ୍ରୀ ମନ୍ଦିର ଗଲା ପୋଢ଼ୁଆଁ ଭାର

ନିମାପଡ଼ା,(ସନ୍ତୋଷ ଦାଶ):ରାତି ପାହିଲେ ମାର୍ଗଶିର ମାସ ର ଅଷ୍ଟମୀ।ଓଡ଼ିଆ ସଂସ୍କୃତି ରେ ଏହା ପ୍ରଥମାଷ୍ଟମୀ ବା ପୋଢ଼ୁଆଁଷ୍ଟମୀ ଭାବେ ପରିଚିତ। ଏହି ଦିନ ଘର ର ଜ୍ୟେଷ୍ଠ ସନ୍ତାନ ମାମୁଁ ଘରୁ ଆସିଥିବା ନବ ବସ୍ତ୍ର ପରିଧାନ କରିଥାନ୍ତି। ପୁରୀ ଶ୍ରୀ ମନ୍ଦିର ର ରତ୍ନ ସିଂହାସନ ଉପରେ ପୂଜା ପାଉଥିବା ଠାକୁର ମାନଙ୍କ ପୋଢ଼ୁଆଁ ପାଇଁ ଆଜି ଶ୍ରୀ ଜଗନ୍ନାଥ, ଶ୍ରୀ ବଳଭଦ୍ର, ମା ସୁଭଦ୍ରା ଙ୍କ ମାମୁଁ ଘର ଭାବେ ପରିଚିତ ପ୍ରାଚୀ ଉପତ୍ୟକା ର ମାଧବ ମନ୍ଦିର ରୁ ଯାଇଛି ପୋଢ଼ୁଆଁ ଭାର। ପୂର୍ବରୁ ପ୍ରାଚୀ ଉପତ୍ୟକା ର ମଠ, ମନ୍ଦିର, ଜଗନ୍ନାଥ ପ୍ରେମୀ ଭକ୍ତ ମାନେ ତୁଳସୀ, ଫଳ ମୂଳ, ଫୁଲ, ପାଟବସ୍ତ୍ର ପ୍ରଭୃତି ମାଧବ ମନ୍ଦିର ଠାରେ ଠୁଳ କରିଥିଲେ।ରତ୍ନସିଂହାସନସ୍ଥ ମହାପ୍ରଭୁ ଶ୍ରୀଜଗନ୍ନାଥ ,ଶ୍ରୀବଳଭଦ୍ର, ଦେବୀ ସୁଭଦ୍ରା ,ସୁଦର୍ଶନ ,ମାଧବ , ଭୂଦେବୀ ଓ ଶ୍ରୀ ଦେବୀଙ୍କ ପାଇଁ ପାଟବସ୍ତ୍ର , ଅରୁଆ ଚାଉଳ, ବିରି,ନଡ଼ିଆ, ଗୁଡ଼ , ପାଚିଲା କଦଳି ,ଘିଅ , ଚନ୍ଦନ କାଠ , କର୍ପୂର , ଅଗୁରୁ , ଯାଈଫଳ , ପାନ , ଗୁଆ, ଅଳେଇଚ , ଲବଙ୍ଗ, ଗୋପାଳବଲ୍ଲଭ ପାଇଁ ବିଭିନ୍ନ ଫଳମୂଳ ଏବଂ ମହାପ୍ରଭୁଙ୍କ ବେଶ ଲାଗି ତୁଳସୀ ଓ ପଦ୍ମଫୁଲ ସବୁକୁ ଶୁକ୍ରବାର ସକାଳେ ଶ୍ରୀ ମାଧବାନନ୍ଦ ଜୀୟୁ ଙ୍କ ମନ୍ଦିରରୁ ଭାର ବନ୍ଧା ଯାଇ ଶୋଭାଯାତ୍ରା ରେ ପୁରୀ ଶ୍ରୀ କ୍ଷେତ୍ର କୁ ନିଆ ଯାଇଛି। ପ୍ରଭୁ ମାଧବ ଙ୍କ ଭୋଇ ସେବକ ମାନେ ଶୋଭାଯାତ୍ରା ର ଆଗରେ ପତାକା ଧରି ଚାଲିଥିଲେ । ଢୋଲିଆ ଓ ମହୁରିଆ ମଙ୍ଗଳବାଦ୍ୟ ବଜାଇଥିଲେ।ଶୋଭାଯାତ୍ରା ରେ ଗଡ଼ୁଆ ସେବକ ମାନେ ପାଇକ ଆଖଡା ପ୍ରଦର୍ଶନ କରିଥିବା ବେଳେ ଗୋପାଳ ସେବକ ମାନେ ରାମତାଳି / ଲଉଡ଼ି ପ୍ରଦର୍ଶନ କରିଥିଲେ।ଶତାଧିକ ସଂକୀର୍ତ୍ତନ ଦଳ ଏହି ଶୋଭାଯାତ୍ରାରେ ସାମିଲ ହୋଇଥିଲେ । ବେହେରା ସେବକ ମାନେ ନିଷ୍ଠାର ସହ ଉପବାସ ବ୍ରତ ପାଳି ଏହି ଦିବ୍ୟଭାର ନେଇ ଶ୍ରୀକ୍ଷେତ୍ର ଯାତ୍ରା କରିଥିଲେ । ମାଧବ ମନ୍ଦିର ର ଛତିଶା ନିଯୋଗୀ, ପ୍ରାଚୀ ଅଞ୍ଚଳର ବହୁ ସାଧୁସନ୍ଥ , ଭକ୍ତ ଓ ଶ୍ରୀଜଗନ୍ନାଥ ପ୍ରେମୀ ଏହି ଶୋଭାଯାତ୍ରା ରେ ସାମିଲ ହୋଇଥିଲେ। ବାଟରେ ପଦଯାତ୍ରୀ ମାନଙ୍କୁ ବିଭିନ୍ନ ବ୍ୟକ୍ତି ବିଶେଷ ଓ ଅନୁଷ୍ଠାନ ମାନଙ୍କ ପକ୍ଷରୁ ସ୍ଵାଗତ ସମ୍ବର୍ଦ୍ଧନା ଦିଆ ଯାଇଥିଲା।ଚାରିଛକ ଓ ଗଣେଶ୍ୱରପୁରଠାରେ ଦହିପଣା ଓ ବାଲିଘାଇଠାରେ ପରମହଂସ ପ୍ରଜ୍ଞାନାନନ୍ଦଙ୍କ ଆଶ୍ରମରେ ମଧ୍ୟାହ୍ନ ଭୋଜନର ବ୍ୟବସ୍ଥା ହୋଇଥିଲା ।ଏହି ଶୋଭାଯାତ୍ରା ମାଧବ , ଚନ୍ଦ୍ରମଉଳି , ଚାରିଛକ , ଗୋପ , ଗଣେଶ୍ୱରପୁର , ନାଗପୁର , ଷୋଳପୁର , ମଦରଙ୍ଗ , ଛଇତନା , ବାଲିଘାଇ ଓ ବାଲିଗୁଆଳି ଦେଇ ଶ୍ରୀଗୁଣ୍ଡିଚା ମନ୍ଦିର ନିକଟରେ ପହଞ୍ଚିଥିଲା।ସେଠାରୁ ଅପରାହ୍ନ ରେ ଦ୍ୱିତୀୟ ପର୍ଯ୍ୟାୟ ଶୋଭାଯାତ୍ରା ଆରମ୍ଭ ହୋଇଥିଲା। ଶ୍ରୀମନ୍ଦିର କାର୍ଯ୍ୟାଳୟ ସମ୍ମୁଖରେ ପଦଯାତ୍ରା ଶେଷ ହୋଇଥିଲା। ଭାର ସବୁ କୁ ଶ୍ରୀ ମନ୍ଦିର ପ୍ରଶାସନର ଦାୟୀତ୍ବ ଦିଆଯାଇଥିଲା।