ଅଟୋ ଓଲଟି ଜଣେ ଗୁରୁତର : ୬ ଆହତ
ମୋହନା, (ଅଂଶୁମାନ ପଣ୍ଡା) : ମୋହନା ଥାନା ଅନ୍ତର୍ଗତ କେଶରା ଗ୍ରାମରୁ ଏକ ଅଟୋ ନଂ (ଓଡିଠ୭ ଏଜେ ୧୬୬୩) ଯୋଗେ ୧୫ ଜଣ ମହିଳା ଓ ପୁରୁଷ ଗୋବିନ୍ଦପୁର ପଞ୍ଚାୟତକୁ ମାଗଣା ୨ ମାସର ସରକାରୀ ଚାଉଳ ଆଣିବା ପାଇଁ ଯାଉଥିଲେ । ଅଟୋଟି ପଞ୍ଚାୟତରେ ପହଞ୍ଚିବାକୁ ଆଉ ଅଳ୍ପ ସମୟ ବାକି ଥିବା ବେଳେ ଗ୍ରାମ ଛକ ନିକଟରେ ଏକ ତାର ବାଡକୁ ଧକ୍କା ଦେଇଥିଲା । ଯାହା ଫଳରେ ଅଟୋଟି ଘଟଣାସ୍ଥଳରେ ଓଲଟି ପଡିଥିଲା । ଗାଡିରେ ବସିଥିବା ଯାତ୍ରୀମାନେ ରାସ୍ତାକୁ ଛିଟିକି ପଡିଥିଲେ । ଖବର ପାଇ ସ୍ଥାନୀୟ ଲୋକେ ଆସି ଆହତ ମାନଙ୍କୁ ଉଦ୍ଧାର କରିବା ସହ ୧୦୮କୁ ଖବର ଦେଇଥିଲେ ।ଆମ୍ବୁଲାନସ ଆସି ଗୁରୁତର ଅବସ୍ଥାରେ ଥିବା ଅଟୋ ଚାଳକ କେଶରା ଗ୍ରାମର ପ୍ରତାପ ପ୍ରଧାନ ଓ ଆହତ କମଳା ମାଝୀ, ଛବିତା ନାୟକ, ସାଧବାଣୀ ନାୟକ, ବିଳାସ ନାୟକ, ଜୟଶ୍ରୀ ନାୟକ, ପ୍ରତିମା ନାୟକଙ୍କୁ ମୋହନା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଆଣି ଭର୍ତ୍ତି କରିଥିଲେ।ଅଟୋ ଚାଳକଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ଅନ୍ୟମାନଙ୍କର ଗୋଡ଼, ଛାତି, ହାତରେ ଆଘାତ ଲାଗିଥିବା ସ୍ୱାସ୍ଥ୍ୟ କେନ୍ଦ୍ର ପକ୍ଷରୁ ଜଣାପଡିଛି ।
