ଅଫିସ ପାଇଁ କରୋନା ଗାଇଡଲାଇନ୍

ଭୁବନେଶ୍ୱର: ଓଡ଼ିଶାରେ କରୋନା ମହାମାରୀର ମହାସମର ଆରମ୍ଭ ହୋଇଯାଇଛି । କରୋନା ଏବେ ଲମ୍ବ ଡିଆଁ ମାରି ଗୋଟିକ ପରେ ଗୋଟିଏ ଜିଲ୍ଲାରେ ପ୍ରବେଶ କରିବା ସହ ସାରା ଓଡ଼ିଶାକୁ କବଳିତ କରିସାରିଛି । ଦିନକୁ ଦିନ ଆକ୍ରାନ୍ତଙ୍କ ସଂଖ୍ୟା ବଢି ଚାଲିଛି । କରୋନାର ଗତିରେ ଓଡ଼ିଶା ଫେରନ୍ତା ପ୍ରବାସୀମାନେ ସାମିଲ ହେବା ଫଳରେ ନିଆଁରେ ଘିଅ ଢାଳିବା ସଦୃଶ ମହାମାରୀ ବ୍ୟାପିରେ ଲାଗିଛି । ପ୍ରବାସୀମାନେ ଏବେ କରୋନା ଭୂତାଣୁକୁ ସାଙ୍ଗରେ ଆଣି ଆସିଥିବାରୁ ସେମାନଙ୍କୁ କିଭଳି ଠିକଣା ସମୟରେ ଚିହ୍ନଟ କରାଯିବ ଓ ସଙ୍ଗରୋଧରେ ଶୃଙ୍ଖଳିତଭାବେ ରଖାଯିବ ତାହା ରାଜ୍ୟ ସରକାରଙ୍କ ପାଇଁ କଷ୍ଟକର ବ୍ୟାପାର ହୋଇଛି । ତେବେ ଏହାରି ଭିତରେ କରୋନା ସଂକ୍ରମଣକୁ ରୋକିବା ପାଇଁ ରାଜ୍ୟ ସରକାର ନୂଆ ଗାଇଡଲାଇନ ଜାରି କରିଛନ୍ତି । ସରକାରୀ କର୍ମଜାରୀ ଓ ବିଭାଗଗୁଡ଼ିକ ପାଇଁ ନୂଆ ଗାଇଡଲାଇନ ଜାରି କରାଯାଇଛି । ଜାରି ହୋଇଥିବା କଟକଣାକୁ କଡ଼ାକଡ଼ିଭାବେ ପାଳନ ପାଇଁ ନିର୍ଦ୍ଦେଶ ଦିଆଯାଇଛି । ସମ୍ପୃକ୍ତ ନିୟମଗୁଡ଼ିକ ହେଲା:
୧- ଅଫିସରେ ସାମାଜିକ ଦୂରତା ନିୟମ ପାଳନ ଉପରେ ଗୁରୁତ୍ୱ ଦିଆଯିବ ।
୨- ଅଫିସରେ କର୍ମଚାରୀମାନେ ଏକାଠି ହେବା କିମ୍ବା ବୈଠକ କରିପାରିବେ ନାହିଁ ।
୩- ସମସ୍ତ ଅଧିକାର, କର୍ମଚାରୀ ମାସ୍କ ପିନ୍ଧିବା ବାଧ୍ୟତାମୂଳକ ।
୪- ଡ୍ରାଇଭର, ସିକ୍ୟୁରିଟି ଗାର୍ଡ ଓ ଜଗୁଆଳିଙ୍କ ପାଇଁ ମାସ୍କ ବାଧ୍ୟତାମୂଳକ ।
୫- ନିୟମିତ ସାବୁନରେ ହାତ ଧୋଇବା ଓ ସାମାଜିକ ଦୂରତା ବଜାୟ ରଖିବେ ।
୬- କର୍ମଚାରୀ ଓ ଭିଜିଟର ଅଫିସ ପରିସରରେ ଛେପ ପକାଇବା ଦଣ୍ଡନୀୟ ।
୭- କଟକଣା ଖିଲାପ କଲେ ଶୃଙ୍ଖଳାଭଙ୍ଗ ଅଭିଯୋଗରେ କାର୍ଯ୍ୟାନୁଷ୍ଠାନ ନହେବ ।
ଏହାଛଡ଼ା କୌଣସି ଅଧିକାରୀ କିମ୍ବା କର୍ମଚାରୀ ଅସୁସ୍ଥ ଅନୁଭବ କଲେ ବିଶେଷକରି ଜ୍ବର କିମ୍ବା ଥଣ୍ଡା, କାଶରି ପୀଡ଼ିତ ହେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେଇ ଛୁଟିରେ ସଙ୍ଗରୋଧରେ ରହିବେ। ଅଫିସରେ ବୟସ୍କ ଓ ଗର୍ଭବତୀ ମହିଳା କର୍ମଚାରୀଙ୍କୁ ବ୍ୟତୀତ କାହାରିକୁ ଲିଫ୍ଟ୍ ବ୍ୟବହାର କରିବାକୁ ଦିଆଯିବନି। ଲିଫ୍ଟରେ ଅନ୍ୟୁନ ୪ ଜଣରୁ ଅଧିକ ଯିବେନାହିଁ। ଲିଫ୍ଟ୍ ଭିତରେ କୌଣସି ବ୍ୟକ୍ତି ମୁହଁକୁ ମୁହଁ ନ ଅନାଇ ଲିଫ୍ଟ୍ କାନ୍ଥ ପଟକୁ ଅନାଇବେ ବୋଲି ନିର୍ଦ୍ଦେଶ ଦିଆଯାଇଛି। ଅଫିସର କମ୍ପ୍ୟୁଟର କି-ବୋର୍ଡ଼, ଦୁଆର ହ୍ୟାଣ୍ଡଲ, ଟେଲିଫୋନ୍ ଆଦି ବିଶୋଧକରେ ପୋଛାଯିବ। କୋଭିଡ-୧୯ ପ୍ରତିହତ ପାଇଁ ଅଫିସରେ ପୋଷ୍ଟର, ଷ୍ଟାଣ୍ଡି, ଟିଭି ଜରିଆରେ ସତର୍କବାର୍ତ୍ତା ସମସ୍ତେ ଯେପରି ସ୍ପଷ୍ଟ ଦେଖିପାରିବେ ସେ ନେଇ ବ୍ୟବସ୍ଥା କରାଯିବ। ଅଫିସରେ ଥିବା ଏୟାରକଣ୍ଡିସନର୍କୁ ୨୪ରୁ ୩୦ ଡିଗ୍ରି ସେଣ୍ଟିଗ୍ରେଡରେ ଚାଲୁ ରଖିବାକୁ ନିର୍ଦ୍ଦେଶନାମାରେ ଉଲ୍ଲେଖ କରାଯାଇଛି।