ଆଜି ଉପସ୍ଥାପନ ହେବ ସିଏଜି ରିପୋର୍ଟ

ନୂଆଦିଲ୍ଲୀ : ରାଫେଲ ଯୁଦ୍ଧ ବିମାନ ସମ୍ପର୍କରେ କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ (ସିଏଜି) ରିପୋର୍ଟ ସୋମବାର ଉପସ୍ଥାପନ କରାଯିବ। ଫ୍ରାନ୍ସ ସରକାରଙ୍କ ସହିତ ଭାରତ ସରକାରଙ୍କର ୫୯ହଜାର କୋଟି ଟଙ୍କାର ଏହି ବୁଝାମଣାକୁ ନେଇ ବିବାଦ ଲାଗି ରହିଥିବାବେଳେ ସିଏଜିଙ୍କ ରିପୋର୍ଟକୁ ସମସ୍ତେ ଅପେକ୍ଷା କରି ରହିଛନ୍ତି। ବିଧି ବ୍ୟବସ୍ଥା ଅନୁଯାୟୀ ସିଏଜି ରିପୋର୍ଟ ଉପସ୍ଥାପନ ହେବା ପରେ ଏହାର ଏକ ନକଲ ରାଷ୍ଟ୍ରପତି ଓ ଗୋଟିଏ ନକଲ ଅର୍ଥ ମନ୍ତ୍ରଣାଳୟକୁ ଦିଆଯାଇଥାଏ। ରିପୋର୍ଟକୁ ସଂସଦରେ କେବେ ଉପସ୍ଥାପନ କରାଯିବ ତାର ଦିନ ସରକାର ଧାର୍ଯ୍ୟ କରିଥାନ୍ତି। ରିପୋର୍ଟ ସଂସଦରେ ଉପସ୍ଥାପନ ହେବା ପରେ ଏହାକୁ ପବ୍ଲିକ ଆକାଉଣ୍ଟସ୍ କମିଟି (ପିଏସି)ଙ୍କ ନିକଟକୁ ପଠାଯାଇଥାଏ। ପିଏସି ଏହା ଉପରେ ତର୍ଜମା କରିଥାନ୍ତି। କଂଗ୍ରେସ ନେତା ମଲ୍ଲିକାର୍ଜୁନ ଖଡଗେ ଏବେ ପିଏସିର ଅଧ୍ୟକ୍ଷ ଅଛନ୍ତି। ରାଫେଲ ବୁଝାମଣା ଉପରେ ଅନୁଧ୍ୟାନ ପୂର୍ବକ ରିପୋର୍ଟ ପ୍ରସ୍ତୁତ ଲାଗି ସିଏଜି ଏକବର୍ଷ ସମୟ ନେଇଛନ୍ତି। ଫ୍ରାନ୍ସ ଠାରୁ ୩୬ଟି ଯୁଦ୍ଧ ବିମାନ କ୍ରୟ ଲାଗି ୨୦୧୬ ସେପ୍ଟେମ୍ବର ୨୩ରେ ଆନ୍ତଃ ସରକାରୀ ବୁଝାମଣା ହୋଇଥିଲା।