ଆଦିବାସୀ ପଲ୍ଲୀରେ ନୂଆବର୍ଷକୁ ସ୍ୱାଗତ
ଭୁବନେଶ୍ୱର, (ଯୁଗାବ୍ଦ ନ୍ୟୁଜ):ବିଦାୟ ନେଇଛି ୨୦୨୪ । ପୁରୁଣା ବର୍ଷକୁ ବିଦାୟ ଦେଇ ଇଂରାଜୀ ନବବର୍ଷ ୨୦୨୫କୁ ଚନ୍ଦକା- ଡ଼ମପଡ଼ା ହସ୍ତୀ ଅଭୟାରଣ୍ୟ ଘେର ମଧ୍ୟରେ ଥିବା ଆଦିବାସୀ ପଲ୍ଲୀ କନ୍ଦଳେଇର କୁନି କୁନି କୁନି ବିଦ୍ୟାର୍ଥୀମାନେ ହର୍ଷ ଉଲ୍ଲାସରେ ସ୍ୱାଗତ କରିଛନ୍ତି । ସ୍ମାର୍ଟ ନଗରୀ ଭୁବନେଶ୍ୱର ଠାରୁ ଅଳ୍ପ ଦୂରରେ ଥିବା ଏହି ପଲ୍ଲୀର ବିଦ୍ୟାର୍ଥୀମାନେ ନବବର୍ଷକୁ ନିଆରା ଢ଼ଙ୍ଗରେ ପାଳନ କରିଛନ୍ତି । ଗ୍ରାମବାସୀଙ୍କ ସହ ଗ୍ରାମର ବିଦ୍ୟାର୍ଥୀମାନେ ପାରମ୍ପରିକ ନାଚ, ଗୀତ ସହ ବେଲୁନ୍ ଫୁଟାଇ ନବବର୍ଷକୁ ପାଳନ କରିଥିଲେ । ସାମାଜିକ ଅନୁଷ୍ଠାନ ‘ବୁଲ୍ସଆଇ’ ପକ୍ଷରୁ ଆୟୋଜିତ ସ୍ୱାଗତମ୍-୨୦୨୫ କାର୍ଯ୍ୟକ୍ରମରେ ସାମାଜିକ କର୍ମୀ ସୁଶାନ୍ତ ସାହୁ, ପ୍ରିୟବ୍ରତ ପଣ୍ଡା, ‘ବୁଲ୍ସଆଇ’ର ଚେୟାରମ୍ୟାନ୍ ତ୍ରିଲୋଚନ ବେଉରା, ସ୍ଥାନୀୟ ବିଦ୍ୟାଳୟର ପ୍ରଧାନଶିକ୍ଷକ ବିଚିତ୍ର କୁମାର ମାଝୀ, ଶିକ୍ଷକ ସୁବାସ ଓଝା ପ୍ରମୁଖ ଯୋଗଦେଇ ନୂଆବର୍ଷ ସମସ୍ତଙ୍କ ପାଇଁ ମଙ୍ଗଳମୟ ଏବଂ ସବୁଜିମାମୟ ହେଉ ବୋଲି ଆଶା ପ୍ରକଟ କରିଥିଲେ ।
