ଆରବିଆଇ ନୂଆ ଡେପୁଟି ଗଭାର୍ଣ୍ଣର ହେଲେ ବେତନଟୀ ବୋହୁ ଡ଼ଃ ପୁନମ ଗୁପ୍ତା

ବେତନଟୀ,(ଉଦିତ କୁମାର ପରିଡା):ମୟୂରଭଞ୍ଜ ଜିଲ୍ଲା ବେତନଟୀ ଅଞ୍ଚଳର ବୋହୁ ଡ଼ ପୁନମ ଗୁପ୍ତା ସର୍ବଭାରତୀୟସ୍ତରରେ ନିଜର ନାମ ଓ ଖ୍ୟାତିଟି ବହୁ ଦୂର ପର୍ଯ୍ୟନ୍ତ ନେଇଯାଇଛନ୍ତି। କେନ୍ଦ୍ରସରକାରଙ୍କ ପକ୍ଷରୁ ତାଙ୍କୁ ରିଜର୍ଭ ବ୍ୟାଙ୍କ ଅଫ ଇଣ୍ଡିଆର ନୂଆ ଡେପୁଟି ଗଭର୍ଣ୍ଣର ଭାବେ ନିଯୁକ୍ତି ଦିଆଯାଇଛି । ସେ ତିନି ବର୍ଷ ପାଇଁ ଏହି ପଦବୀ ରେ କାର୍ଯ୍ୟ କରିବେ। ଜାନୁଆରୀରେ ଇସ୍ତଫା ଦେଇଥିବା ଡେପୁଟି ଗଭର୍ଣ୍ଣର ମାଇକେଲ ପାତ୍ରଙ୍କ ସ୍ଥାନରେ ଶ୍ରୀମତୀ ଗୁପ୍ତା। ସୂଚନା ଅନୁସାରେ କିଛି ମାସତଳେ ବିଶିଷ୍ଟ ଅର୍ଥନୀତିଜ୍ଞଙ୍କୁ ନେଇ ଦେଶର ଅର୍ଥନୈତିକ ବ୍ୟବସ୍ଥାର ସମୀକ୍ଷା କରୁଥିବା ବିଜନେସ ୱାଲ୍ଡ ପତ୍ରିକାରେ ପ୍ରକାଶିତ ହୋଇଥିବା ଦେଶର ୫ଜଣ ପ୍ରଭାବଶାଳୀ ମହିଳାଙ୍କ ମଧ୍ୟରେ ଡ଼ ପୁନମ ଗୁପ୍ତା ସ୍ଥାନ ପାଇଥିଲେ । ସେ ହେଉଛନ୍ତି ମୟୂରଭଞ୍ଜ ଜିଲ୍ଲା ବେତନଟୀର ପୁଅ ଦୀପକ ମିଶ୍ରଙ୍କ ଧର୍ମପତ୍ନୀ । ଦୀପକ ମିଶ୍ର ଦେଶର ବିଶ୍ୱବ୍ୟାଙ୍କର ବହୁ ଗୁରୁତ୍ଵପୂର୍ଣ୍ଣ ପଦପଦବୀରେ କାର୍ଯ୍ୟକରିଥିବା ବେଳେ ବର୍ତ୍ତମାନ ସେ ଦି ଇଣ୍ଡିଆନ କାଉନସିଲ ଫର ରିସର୍ଚ୍ଚ ଅନ ଇଣ୍ଟରନ୍ୟାସନାଲ ଇକୋନୋମିକ ରିଲେସନ୍ସ (ଆଇ.ସି.ଆର.ଆଇ.ଇ.ଆର)ର ନିର୍ଦେଶକ ତଥା ଚିଫ ଏକଜିକ୍ୟୁଟିଭ ପଦରେ କାର୍ଯ୍ୟରତ ଅଛନ୍ତି।  ଦୀପକ ମିଶ୍ରଙ୍କ ପତ୍ନୀ ଡ଼ ପୁନମ ଗୁପ୍ତା ନ୍ୟାସନାଲ କାଉନସିଲ ଅଫ ଏପ୍ଲାଏଡ ଇକୋନୋମିକ ରିସର୍ଚ୍ଚ(ଏନ.ସି.ଏ.ଇ.ଆର)ର ଡାଇରେକଟର ଜେନେରାଲ ସାଙ୍ଗକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅର୍ଥନୈତୀକ ପରାମର୍ଶ ପରିଷଦର ସଦସ୍ୟା ମଧ୍ୟ ରହିସାରିଛନ୍ତି । ଏହା ପୂର୍ବରୁ ଡ଼ ପୁନମ ଗୁପ୍ତା ବିଶ୍ବବ୍ୟାଙ୍କ ଏବଂ ଭାରତୀୟ ରିଜର୍ଭ ବ୍ୟାଙ୍କର ଗୁରୁତ୍ଵପୂର୍ଣ୍ଣ ପଦବୀରେ କାର୍ଯ୍ୟ କରିବାର ଅଭିଜ୍ଞତା ରଖିଛନ୍ତି । ପୁନମ ଗୁପ୍ତାଙ୍କ ଶଶୁର ତଥା ଦୀପକ ମିଶ୍ରଙ୍କ ବାପା ଅଜିତ ମିଶ୍ର ଜଣେ ଅବସରପ୍ରାପ୍ତ ଇଲେକ୍ଟ୍ରିକଲ ଇଞ୍ଜିନିଅର, ଭଲ ଫୁଟବଲ ଖେଳାଳି ସହିତ ବେତନଟୀ ଅଞ୍ଚଳରେ ଜଣେ ସମାଜସେବୀ ଭାବେ ପରିଚିତ । ସେ ବେତନଟୀ ବାସଗୃହରେ ରହୁଥିବା ବେଳେ ୧୯୯୨ ମସିହାରେ ତାଙ୍କ ପୁତ୍ରଙ୍କୁ ପୁନମ ସହ ବିବାହ କରାଇଥିଲେ । ପୁନମ ଗୁପ୍ତା ଚାକିରି କାଳ ୨୫ ବର୍ଷ ହୋଇଥିବା ବେଳେ ଏବେ ସ୍ବାମୀ ଓ ସ୍ତ୍ରୀ ଉଭୟଙ୍କୁ ଆମେରିକାର ଓ୍ବାସିଙ୍ଗଟନରେ ରହୁଛନ୍ତି । ପ୍ରତି ଦୁଇ ମାସରେ ଥରେ ବାପା ଅଜୀତ ମିଶ୍ର ଓ ମା ରମା ମିଶ୍ରଙ୍କୁ ଦେଖିବା ପାଇଁ ବେତନଟୀ ବାସଭବନକୁ ଆସନ୍ତି ବୋଲି ଅଜିତ ମିଶ୍ର ପ୍ରକାଶ କରିଛନ୍ତି । ଏହି ଖବର ମିଳିବା ପରେ ବେତନଟୀ ପାଇଁ ଏକ ଗର୍ବର ବିଷୟ ହୋଇଥିବା ନେଇ ଆଲୋଚନା ହେଉଛି l