ଆସିକାରେ ଶ୍ରୀଶ୍ରୀ ଆଖଣ୍ଡଳମଣୀ ମହାପ୍ରଭୁଙ୍କ ବାର୍ଷିକ ମେଳା ଉତ୍ସବ

ଆସିକା, (ଯୁଗାବ୍ଦ ନ୍ୟୁଜ):ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ସ୍ଥାନୀୟ ସିଭିଲ୍ ଓ କ୍ରିମିନାଲ୍ ଜର୍ଜ କୋର୍ଟ ପରିସରରେ ପୂଜା ପାଉଥିବା ଶ୍ରୀଶ୍ରୀ ଆଖଣ୍ଡଳମଣୀ ମହାପ୍ରଭୁଙ୍କ ୪୦ତମ ବାର୍ଷିକ ମେଳା ଉତ୍ସବ ପାରମ୍ପରିକ ରୀତିନୀତି ଅନୁଯାୟୀ ଏକ ଆଧ୍ୟ୍ୟାତ୍ମିକ ପରିବେଶ ମଧ୍ୟରେ ସୋମବାର ପାଳିତ ହୋଇଯାଇଛି । ଏହି ଅବସରରେ ଆଖଣ୍ଡଳମଣୀ ମହାପ୍ରଭୁଙ୍କ ମଣ୍ଡପ ନିକଟରେ ଶ୍ରଦ୍ଧାଳୁ ଭକ୍ତଙ୍କ ଭିଡ ଜମିଥିଲା ବେଳେ ସଂକୀର୍ତ୍ତନ ଓ ନାମଯଜ୍ଞ ପରିବେଷଣ କରାଯାଇଥିଲା । ଶ୍ରୀ ଶ୍ରୀ ଆଖଣ୍ଡଳମଣି ମେଳା ଆୟୋଜନ କମିଟିର ପ୍ରତ୍ୟେକ୍ଷ ତତ୍ତ୍ୱାବଧାନରେ ମହାପ୍ରଭୁ ଶ୍ରୀ ଆଖଣ୍ଡଳମଣିଙ୍କ ନିକଟରେ ହୋଇଥିବା ପୂଜାର୍ଚ୍ଚନା କାର୍ଯ୍ୟକ୍ରମରେ ବିଦ୍ୱାନ ପଣ୍ଡିତ ରତ୍ନାକର ଦାଶ ଓ ସୀତାରାମ ଦାଶ ଏବଂ ମନ୍ଦିର ପୂଜକ ପ୍ରଦୀପ କୁମାର ପାଢୀ ଯୋଗଦେଇ ନୀତିକାନ୍ତି ଅନୁଯାୟୀ ପୂଜାର୍ଚ୍ଚନା କାର୍ଯ୍ୟକ୍ରମ ନିମଗ୍ନ ରହିଥିବା ଲକ୍ଷ୍ୟ କରାଯାଇଥିଲା । ଏହି ଆଧ୍ୟାତ୍ମିକ କାର୍ଯ୍ୟକ୍ରମକୁ ସୁପରିଚାଳନା କରିବା ଦିଗରେ ଆସିକା ଓକିଲ ସଂଘ ଓ ଅଦାଲତ ସମସ୍ତ କର୍ମଚାରୀ ସକ୍ରିୟ ସହଯୋଗ କରିଥିବା ଲକ୍ଷ୍ୟ କରାଯାଇଥିଲା । ଏହି ଅବସରରେ ପୂର୍ବ ବର୍ଷମାନଙ୍କ ଭଳି ଚଳିତ ବର୍ଷ ମଧ୍ୟ ରାତ୍ରରେ ଅନୁଷ୍ଠିତ ପ୍ରସାଦସେବନ କାର୍ଯ୍ୟକ୍ରମରେ ଆସିକା ସହର ତଥା ଏହାର ଆଖପାଖ ଅଞ୍ଚଳର ପ୍ରାୟ ୧ହଜାରରୁ ଉର୍ଦ୍ଧ୍ୱ ଶ୍ରଦ୍ଧାଳୁଙ୍କ ସମାଗମ ହୋଇଥିବା ଦେଖିବାକୁ ମିଳିଥିଲା ।