ଉପନିର୍ବାଚନ ସମ୍ପର୍କରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ସମୀକ୍ଷା

ବାଲେଶ୍ୱର, (ଓ୍ବାଇଏନ୍ଏସ୍):ବାଲେଶ୍ୱର ସଦର ନିର୍ବାଚନମଣ୍ଡଳୀରେ ହେବାକୁ ଥିବା ଉପନିର୍ବାଚନ ସମ୍ପର୍କରେ ଆଜି ଓଡିଶା ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ସୁଶୀଲ କୁମାର ଲୋହାନୀ ସମୀକ୍ଷା କରିଛନ୍ତି । ଆଜି ପୂର୍ବାହ୍ନ ପ୍ରାୟ ସାଢେ ୧୦ଘଟିକା ସମୟରେ ସ୍ଥାନୀୟ ସଦଭାବନା ସଭାଗୃହରେ ଅନୁଷ୍ଠିତ ସମୀକ୍ଷା ବୈଠକରେ ଯୋଗ ଦେଇ ଉପନିର୍ବାଚନ ପରିଚାଳନା ପାଇଁ ନିୟୋଜିତ ହୋଇଥିବା ବିଭିନ୍ନ ବିଭାଗୀୟ ନୋଡାଲ ଅଧିକାରୀମାନଙ୍କ ସହ ସେ ଆଲୋଚନା କରିଥିଲେ । ଜିଲ୍ଲାପାଳ ଶ୍ରୀ କେ ସୁଦର୍ଶନ ଚକ୍ରବର୍ତୀ ଉପନିର୍ବାଚନ ପାଇଁ କରାଯାଇଥିବା ବିଭିନ୍ନ ପ୍ରସ୍ତୁତି ସଂକ୍ରାନ୍ତରେ ମୁଖ୍ୟ ନିର୍ବାଚନ ଅଧିକାରୀଙ୍କୁ ଅବଗତ କରାଇଥିଲେ । ବୈଠକରେ ସାଧାରଣ ପର୍ଯ୍ୟବେକ୍ଷକ ଶ୍ରୀମତୀ ଭି. ଅମୂତାଭାଲି, ରାଜ୍ୟ ନୋଡାଲ ଅଧିକାରୀ (ଆଇନ ଶୃଙ୍ଖଳା ) ଶ୍ରୀ ପ୍ରବୀଣ କୁମାର, ଆରକ୍ଷୀ ଅଧୀକ୍ଷକ ଶ୍ରୀ ସୁଧାଂଶୁ ଶେଖର ମିଶ୍ର, ଯୁଗ୍ମ ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଶତ୍ରୁଘ୍ନ କର ପ୍ରମୁଖ ମଂଚାସୀନ ଥିବା ବେଳେ ନୋଡାଲ ଅଧିକାରୀମାନଙ୍କୁ ପ୍ରଦାନ କରାଯାଇଥିବା ବିଭିନ୍ନ ଦାୟିତ୍ୱ ଏବଂ ଏହାକୁ କିଭଳି ସୂଚାରୁ ରୂପେ ସମ୍ପାଦନ କରାଯାଇପାରିବ ସେ ସମ୍ପର୍କରେ ବିସ୍ତୃତ ଆଲୋଚନା କରାଯାଇଥିଲା । ମୁଖ୍ୟତଃ କୋଭିଡ-୧୯ ନିୟମାବଳୀର ପାଳନ ପୂର୍ବକ ପ୍ରତି ପୋଲିଂ ବୁଥରେ କିଭଳି ଭୋଟଗ୍ରହଣ କରାଯିବ, ଭୋଟଦାନ କେନ୍ଦ୍ରକୁ କିଭଳି ଉପଯୁକ୍ତ ଢଙ୍ଗରେ ସାନିଟାଇଜ୍ କରାଯାଇପାରିବ ସେ ଦିଗରେ ଦୃଷ୍ଟି ଦେବାକୁ ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀଙ୍କୁ କୁହାଯାଇଥିଲା । ଉପନିର୍ବାଚନ ପାଇଁ ନିୟୋଜିତ ହୋଇଥିବା ସେକ୍ଟର ମେଡିକାଲ ଅଧିକାରୀମାନେ ଏ ଦିଗରେ ଯେପରି ପଦକ୍ଷେପ ନେବେ ତାହା ସୁନିଶ୍ଚିତ କରିବାକୁ କୁହାଯାଇଥିଲା । ଆଦର୍ଶ ଆଚରଣ ବିଧି ଉଲ୍ଲଙ୍ଘନ ନେଇ ହେଉଥିବା ଅଭିଯୋଗକୁ ଗୁରୁତ୍ୱର ସହ ଗ୍ରହଣ କରି ସେ ଦିଗରେ ବିହିତ କାର୍ଯ୍ୟାନୁଷ୍ଠାନ ନେବାକୁ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିର୍ଦ୍ଦେଶ ଦେଇଥିଲେ । ଇଭିଏମ-ଭିଭିପାଟ୍ ମେସିନର ପରୀକ୍ଷଣ, ଭୋଟଗ୍ରହଣ କେନ୍ଦ୍ରର ଉପଯୁକ୍ତ ପରିଚାଳନା, ବିତରଣ କେନ୍ଦ୍ରରେ ସୁବ୍ୟବସ୍ଥା ଏବଂ ଏହାର ସଠିକ୍ ପରିଚାଳନା, ଆଇନ-ଶୃଙ୍ଖଳା ବ୍ୟବସ୍ଥା ପାଇଁ ନିଆଯାଇଥିବା ପଦକ୍ଷେପ, ଯାନବାହାନ ଚଳପ୍ରଚଳ ପାଇଁ ଦିଆଯାଉଥିବା ଅନୁମତି, ଗଣନା କେନ୍ଦ୍ରରେ କରାଯାଇଥିବା ବ୍ୟବସ୍ଥା, ଫ୍ଲାଇଂ ସ୍କ୍ୱାଡ ଏବଂ ସର୍ଭେଲାନ୍ସ ଟିମ ଦ୍ୱାରା ହୋଇଥିବା ଚଢଉ, ରୁୁଜୁ ହୋଇଥିବା ମାମଲା, ଉପନିର୍ବାଚନରେ ନିୟୋଜିତ କର୍ମଚାରୀଙ୍କ ପ୍ରଶିକ୍ଷଣ, ଅବକାରୀ ବିଭାଗ ପକ୍ଷରୁ ହୋଇଥିବା ଚଢଉ ଏବଂ ବେଆଇନ ମଦ କାରବାର ବନ୍ଦ ପାଇଁ ନିଆଯାଇଥିବା କାର୍ଯ୍ୟାନୁଷ୍ଠାନ ଇତ୍ୟାଦି ସମ୍ପର୍କରେ ନୋଡାଲ ଅଧିକାରୀମାନେ ବିଭିନ୍ନ ତଥ୍ୟ ଉପସ୍ଥାପନ କରିଥିବା ବେଳେ ନିର୍ବାଚନ ଆଚରଣ ବିଧି ଓ ଆଇନ ଅନୁଯାୟୀ ସମସ୍ତ କାର୍ଯ୍ୟ ସମ୍ପନ୍ନ କରିବାକୁ ମୁଖ୍ୟ ନିର୍ବାଚନ ଅଧିକାରୀ ନିର୍ଦ୍ଦେଶ ଦେଇଥିଲେ । ଉପନିର୍ବାଚନରେ ନିୟୋଜିତ ଅଧିକାରୀ ଓ କର୍ମଚାରୀମାନେ ନିଜ ନିଜ ମଧ୍ୟରେ ସମନ୍ୱୟ ରଖିବା ସହିତ ସବୁ କ୍ଷେତ୍ରରେ ସହଯୋଗ କରି ଏହାକୁ ସଫଳ କରିବାକୁ ଶ୍ରୀ ଲୋହାନୀ ଆହ୍ୱାନ ଦେଇଥିଲେ । ବୈଠକରେ ଅତିରିକ୍ତ ଜିଲ୍ଲାପାଳ ଶ୍ରୀ ସମ୍ବିତ କୁମାର ନାୟକ, ପିଡି-ଡିଆରଡିଏ ଶ୍ରୀ ରବୀନ୍ଦ୍ର କୁମାର ସାହୁ, ଉପଜିଲ୍ଲାପାଳ ଶ୍ରୀ ଆଶିଷ ଈଶ୍ୱର ପାଟିଲଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ ।