କନ୍ଧମାଳ ରେ ମଦ ବିରୋଧୀ ଆନ୍ଦୋଳନ ତେଜିଲା: ମହିଳା ଗୋଷ୍ଠୀ ଓ ସଚେତନ ନାଗରିକ ସାମିଲ
କନ୍ଧମାଳ, (ସଞ୍ଜୟ କୁମାର ପାଣିଗ୍ରାହୀ):କନ୍ଧମାଳ ଜିଲା ଫିରିଙ୍ଗିଆ ବ୍ଲକ ସାଡ଼ିଙ୍ଗିଆ ପଞ୍ଚାୟତର କିଆମୁଣ୍ଡା ଠାରେ ମଦ ବିରୋଧୀ ଆନ୍ଦୋଳନ ଜୋର୍ ସୋର ଚାଲିଥିବା ଦେଖିବାକୁ ମିଳିଛି। ସୁମେରୂ ବନ୍ଧ ପଞ୍ଚାୟତ ଓ ସାଡ଼ୀଙ୍ଗିଆ ସରପଞ୍ଚଙ୍କ ମିଳିତ ନେତୃତ୍ୱରେ ଅନୁଷ୍ଠିତ ମଦ ବିରୋଧୀ ଆନ୍ଦୋଳନରେ ଦୁଇଟି ପଞ୍ଚାୟତର ଶତାଧିକ ମହିଳା ଓ ପୁରୁଷ ଯୋଗଦେଇ କଟାପାଙ୍ଗାରେ ଏକ ବୈଠକ କରିଥିଲେ। ବୈଠକରେ ମହିଳା ମାନେ ନିଶାକୁ ନେଇ ସମସ୍ତଙ୍କୁ ନିଶା ନିବାରଣ ସଚେତନତା ବାର୍ତ୍ତା ଦେଇଥିଲେ। ଅଞ୍ଚଳରେ ଦେଶି ମଦ ରନ୍ଧା ଓ ନିଶା ସେବନ କରି ନିଶାଶକ୍ତ ଅବସ୍ଥାରେ ଘଟୁଥିବା ଦୁର୍ଘଟଣା ଘରୋଇ ହିଂସାକୁ ନେଇ ଅଞ୍ଚଳର ମହିଳାମାନେ କ୍ଷୋଭ ପ୍ରକାଶ କରିବା ସହ ଯେଉଁମାନେ ମଦ ରାନ୍ଧିବେ କିମ୍ୱା ବିକ୍ରି କରିବେ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ଶପଥ ଗ୍ରହଣ କରିଥିଲେ।ବୈଠକ ପରେ କଟାପାଙ୍ଗାଗାଁରୁ ଉପସ୍ଥିତ ମହିଳା ଓ ପୁରୁଷ ଯୁବ ଗୋଷ୍ଠୀ ପ୍ଳା କାର୍ଡ ଧରି ଲେଣ୍ଡ୍ରି ଗାଁ ପର୍ୟ୍ୟନ୍ତ ୬ରୁ ୭ କିଲୋମିଟର ସଚେତନତା ରାଲି କରି ଜନସାଧାରଣଙ୍କୁ ସଚେତନ କରାଇଥିଲେ।
