କରଞ୍ଜିଆ ବନଖଣ୍ଡ ପକ୍ଷରୁ ଗଜସାଥି ଦକ୍ଷତା ବୃଦ୍ଧି ତାଲିମ ଶିବିର

କରଞ୍ଜିଆ,(ଜିତେନ୍ଦ୍ର ରାଜ):ମୟୁରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡକୁ ବର୍ଷ ତମାମ ହାତୀଙ୍କ ଯିବା ଆସିବା ଜାରି ରହିଥିବାବେଳେ ହାତୀ ମଣିଷ ଭିତରେ ସଂଘର୍ଷ ମଧ୍ୟ ଜାରିରହିଛି । ଏହି ସଂଘର୍ଷ ଭିତରେ କେତେ ବେଳେ ହାତୀ ହାରି ଯାଉଛି ତ କେତେବେଳେ ମଣିଷ। ଜଙ୍ଗଲ ନଷ୍ଟ ହେବା ଫଳରେ ଖାଦ୍ୟର ଅନୁସନ୍ଧାନ ରେ ଜଙ୍ଗଲୀ ହାତୀ ମାନେ ଏବେ ଗାଁ ମୁହାଁ ହେବାରେ ଲାଗିଛନ୍ତି | କରଞ୍ଜିଆ ବନଖଣ୍ଡର ବିଭିନ୍ନ ଅଞ୍ଚଳ ଏବେ ଜଙ୍ଗଲୀ ହାତୀଙ୍କ ନିମନ୍ତେ ସୁରକ୍ଷିତ ସ୍ଥାନ ଭାବେ ଜଣାଯାଉଛି ବର୍ଷତମାମ କରଞ୍ଜିଆବନଖଣ୍ଡର ବିଭିନ୍ନ ବନାଞ୍ଚଳ ର ଭିନ୍ନ ଭିନ୍ନ ଅଞ୍ଚଳରେ ହାତୀ ଚଳପ୍ରଚଳ କରିବା ସହିତ ଯିବାଆସିବା ବାଟରେ ବ୍ୟାପକ ଫସଲ, ଜନସାଧାରଣଙ୍କ ସମ୍ପତି ନଷ୍ଟ କରୁଛନ୍ତି
ହାତୀ ମାନଙ୍କ ଉପଦ୍ରବ ରୋକିବାକୁ ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଓଡ଼ିଶା ସରକାର ସହଯୋଗରେ କରଞ୍ଜିଆ ବନଖଣ୍ଡ କାର୍ଯ୍ୟାଳୟ ପରିସରରେ ଗଜସାଥି ମାନଙ୍କ ଏକ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି । ଏହି କର୍ମଶାଳାରେ ୨୦୦ରୁ ଉର୍ଦ୍ଧ ଗଜସାଥି ଉପସ୍ଥିତ ରହି ପ୍ରଶିକ୍ଷଣ ପ୍ରାପ୍ତ କରିଥିଲେ I କର୍ମଶାଳାରେ ମୁଖ୍ୟଅତିଥି ଭାବେ କରଞ୍ଜିଆ ବନଖଣ୍ଡ ଅଧିକାରୀ ଶ୍ରୀକାନ୍ତ ନାୟକ, ସମ୍ମାନିତ ଅତିଥି ଭାବେ କେନ୍ଦୁଝର ସାଂସଦ ଙ୍କ ପ୍ରତିନିଧି ଆଶିଷ କୁମାର ମହାନ୍ତ,ଏସିଏଫ ମଦନ ମୋହନ ମହାନ୍ତ, କରଞ୍ଜିଆ ବନାଞ୍ଚଳ ଅଧିକାରୀ ପ୍ରଶାନ୍ତ ସ୍ୱାଇଁ,ଅବସରପ୍ରାପ୍ତ ବନାଞ୍ଚଳ ଅଧିକାରୀ ପ୍ରଦୀପ କୁମାର ପୃଷ୍ଟି,ସମାଜସେବୀ ସୁରେନ୍ଦ୍ର ହେମ୍ବ୍ରମ , ଯୋଗ ଦେଇ ଗଜସାଥି ମାନଙ୍କ ପରିଧି ସମ୍ବନ୍ଧରେ ଆଲୋକପାତ କରିଥିଲେ ।ଏହି କାର୍ଯ୍ୟକ୍ରମରେ ପ୍ରଶିକ୍ଷଣ ଦାତା ଭାବେ ମାଷ୍ଟର ଟ୍ରେନର ସୁବ୍ରତ କୁମାର ବିଶ୍ୱାଳ ଓ ବନବିଭାଗ କର୍ମଚାରୀଙ୍କୁ ହାତୀଙ୍କ ଅଭ୍ୟାସ ଓ ଜଙ୍ଗଲରୁ ଜନବସତି ଆଡ କୁ ଆସିଯାଉଥିବା ସମୟରେ କି ଭଳି ସଚେତନ କରିବେ ସେ ନେଇ ବିସ୍ତୃତ ଭାବେ ତାଲିମ ଦେଇଥିଲେ ।
ସେହିପରି ଶିବିରରେ ହାତୀଙ୍କ ଚଲାପଥରେ ସେମାନେ ଯେପରି କୌଣସି ବାଧା ବିନା ଚଳାଚଳ କରିପାରିବେ ଏବଂ ସୁରକ୍ଷା ଦିଗରେ କି ପଦକ୍ଷେପ ନିଆଯାଇପାରିବ ସେ ନେଇ ବିସ୍ତୃତ ଆଲୋଚନା କରିବା ସହ ସଚେତନ କରାଇଥିଲେ I ଗଜସାଥି ମାନଙ୍କ କାର୍ଯ୍ୟ ପରଧି ଓ କିପରି ହାତୀ ମାନଙ୍କୁ ସୁରକ୍ଷା ଦିଆଯିବା ସହ ହାତୀପଲଙ୍କ ଦ୍ବାରା କ୍ଷୟକ୍ଷତିର ପରିମାଣ କମ୍ କରାଯାଇ ପାରିବ ସେ ବିଷୟରେ ମଧ୍ୟ ଅବଗତ କରିଥିଲେ। ହାତୀମାନଙ୍କ ଗତିବିଧି ଚାଲିଚଳଣ, ପରିବେଶ, ପରିସ୍ଥିତି, ହାବଭାବ, ହାତୀ ମଣିଷ ଲଢେଇ ଆଦି କାରଣ ଲକ୍ଷଣରୁ କିପରି ହାତୀଙ୍କ ଭାବନା ଜାଣି ହେବ ଏବଂ ସୁରକ୍ଷା ଦିଆଯାଇପାରିବ ସେ ବୁଝାଇଥିଲେ। ଏହି କାର୍ଯ୍ୟକ୍ରମରେ କରଞ୍ଜିଆ ବନଖଣ୍ଡ ର ବିଭିନ୍ନ ପଞ୍ଚାୟତ ର ସରପଞ୍ଚ ଙ୍କ ସହିତ କରଞ୍ଜିଆ ବନାଞ୍ଚଳର ସମସ୍ତ କର୍ମଚାରୀ, ଓଡ଼ିଶା ବନ୍ୟ ଉନ୍ନୟନ ପ୍ରକଳ୍ପର କର୍ମଚାରୀ ଓ ବନାଞ୍ଚଳର ପ୍ରତ୍ୟେକ ଗ୍ରାମରୁ ୫ଜଣ ଗାଜ ସାଥୀ ଶିବିରରେ ଉପସ୍ଥିତ ଥିଲେ |
କାର୍ଯ୍ୟକ୍ରମ ଶେଷରେ ସିଙ୍ଗଡ଼ା ଫରେଷ୍ଟର ଦିପ୍ତିମୟୀ ସେଠୀ ଧନ୍ୟବାଦ ଅର୍ପଣ କରିଥିଲେ |