କାର୍ – ଟ୍ରାକ୍ଟର ମୁହାଁମୁହିଁ ଧକ୍କା , ୪ ଗୁରୁତର

ଦିଗପହଣ୍ଡି,(ୱାଇଏନ୍ଏସ୍): ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅଧୀନସ୍ଥ ଦିଗପହଣ୍ଡି – ବ୍ରହ୍ମପୁର ୧୭ ନଂ ରାଜ୍ୟ ରାଜପଥର ପିତାମ୍ବରପୁର ଗାଁ ଛକ ନିକଟରେ ଶନିବାର ରାତି ପ୍ରାୟ ୮ ଟା ରେ ଏକ କାର ସହ ଟ୍ରାକ୍ଟରର ମୁହାଁମୁହିଁ ଧକ୍କା ହୋଇଥିବା ଜଣାପଡିଛି । ଦୁର୍ଘଟଣା ରେ କାରରେ ବସିଥିବା ଗୋଟିଏ ପରିବାରର ୪ ଜଣ ସଦସ୍ୟ ଗୁରୁତର ଆହତ ହୋଇଥିବା ଜଣାପଡିଛି । ଆହତ ମାନଙ୍କ ମଧ୍ୟରେ ସ୍ଵାମୀ , ସ୍ତ୍ରୀ ପୁଅ ଓ ଝିଅ ଥିବା ସୂଚନା ମିଳିଛି । ସେମାନେ ଜଣେ ପଦସ୍ଥ ପୋଲିସ ଅଧିକାରୀ ଙ୍କ ସମ୍ପର୍କୀୟ ବୋଲି ଜଣାପଡିଛି। ଖବରନୁଯାୟୀ , ଶନିବାର ସନ୍ଧ୍ୟାରେ କାରଟି କୋରାପୁଟରୁ ବିବାହ ଭୋଜି କାର୍ଯ୍ୟ ସାରି ବ୍ରହ୍ମପୁର ଅଭିମୁଖେ ଯାଉଥିବା ବେଳେ ପିତାମ୍ବରପୁର ଛକ ନିକଟରେ ବ୍ରହ୍ମପୁରରୁ ଦିଗପହଣ୍ଡି ଅଭିମୁଖେ ଆସୁଥିବା ଟ୍ରାକ୍ଟର ସହ ମୁହାଁମୁହିଁ ଧକ୍କା ହୋଇଥିଲା । ଏହି ଭୟାନକ ଦୁର୍ଘଟଣାରେ ଉଭୟ ଗାଡ଼ିର ସମ୍ମୁଖ ଭାଗ ଭାଙ୍ଗି ଚୁରମାର ହୋଇଯାଇଥିବା ଜଣାପଡ଼ିଛି । ଘଟଣାପରେ ସ୍ଥାନୀୟ ଲୋକମାନେ ଆହତଙ୍କୁ ଗାଡ଼ି ମଧ୍ୟରୁ ଉଦ୍ଧାର କରିବା ପରେ ଦିଗପହଣ୍ଡି ପୋଲିସ ଥାନାକୁ ଖବର ଦେଇଥିଲେ । ଖବରପାଇ ସ୍ଥାନୀୟ ଥାନା ଅଧିକାରୀ ବସନ୍ତ କୁମାର ସେଠୀ ସଦଳବଳେ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ନିୟୋଜିତ ରହି ଗୁରୁତର ମାନଙ୍କୁ ଥାନା ଗାଡ଼ିରେ ବ୍ରହ୍ମପୁର ମେଡ଼ିକାଲକୁ ପଠାଇଥିବା ଜଣାପଡିଛି । ଆହାତ ମାନଙ୍କ ନାଁ ଓ ଠିକଣା ଜଣାପଡିନାହିଁ।