କୀଟନାଶକ ପିଇ ଗୁରୁତର ହୋଇ ପଡିଥିବା ଯୁବତୀକୁ ଉଦ୍ଧାର କଲେ ବିଧାୟକ

ହାଟଡିହି, (ବିକାଶ ବିଶ୍ୱାଳ):କୀଟନାଶକ ପିଇ ଗୁରୁତର ହୋଇ ରାସ୍ତା କଡ଼ରେ ପଡିଥିବା ଜଣେ ଯୁବତୀକୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ। ସୁଚ଼ନା ଅନୁଯାଇ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ ଡଅଁର ପଞ୍ଚାୟତ ଚଷାଖଣ୍ଡ ଗ୍ରାମକୁ ଏକ ଶୋକସନ୍ତପ୍ତ ପରିବାରବର୍ଗଙ୍କୁ ଭେଟିବାକୁ ଯାଇ ଫେରୁଥିବା ବେଳେ ଶାଳଣିଆଁ ବଜାର ପୂର୍ବରୁ ଜଣେ ଯୁବତୀ ରାସ୍ତା କଡ଼ରେ ପଡିରହିଥିଲେ। ଏହାଦେଖି ବିଧାୟକ ଗାତି ଅଟକାଇ ପାଖରେ ଜଣେ ମହିଳା ଠିଆ ହୋଇଥିବା ଜଣେ ମହିଳାଙ୍କୁ ଯୁବତୀଙ୍କ ସମ୍ପର୍କରେ ପଚାରିଥିଲେ। ମାତ୍ର ମହିଳା ଜଣକ ଯୁବତୀଙ୍କ ସମ୍ପର୍କରେ କିଛି ଜାଣି ନଥିବା କହିଥିଲେ। ବିଧାୟକ ନିଜ ସହକର୍ମୀଙ୍କ ସହାୟତାରେ ତାଙ୍କୁ ଉଠାଇ ନିକଟସ୍ଥ ଏକ ଦୋକାନ ବାରଣ୍ଡାକୁ ନେଇଯାଇ ପାଣି ଛାଟି ଚେତା କରିବା ପରେ ସେ କୀଟନାଶକ ପିଇଥିବା କହିଥିଲେ। ବିଧାୟକ ତାଙ୍କୁ ତୁରନ୍ତ ନିଜ ଗାଡିରେ ନେଇଶାଳଣିଆଁ ଡାକ୍ତରଖାନାରେ ଭର୍ତ୍ତି କରିଥିଲେ। ମାତ୍ର ଯୁବତୀଙ୍କ ଅବସ୍ଥା ଭଲ ନଥିବାରୁ ତାଙ୍କୁ ଭଦ୍ରକ ସ୍ଥାନାନ୍ତର କରାଯାଇଥିଲା। ଯୁବତୀଙ୍କ ଘର ବନ୍ତ ଅଞ୍ଚଳର ବୋଲି ଜଣାପଡିଛି। ବିଧାୟକଙ୍କ ଏପରି କାର୍ଯ୍ୟକୁ ସମସ୍ତେ ପ୍ରଶଂସା କରିଛନ୍ତି।