କୃଷି ବିକାଶ ପଥେ ଗଜପତି

ପାରଳାଖେମୁଣ୍ଡି, (ତାରିଣୀ ପଣ୍ଡା) :-ସବୁଜ ବିପ୍ଲବ ର ଆଗମନ ପରେ , ସମସ୍ତ ଭାରତୀୟ ଙ୍କ ଖାଦ୍ୟସୁରକ୍ଷା ପ୍ରତି ଯଥାସମ୍ଭବ ଦୃଷ୍ଟି ଦେବାକୁ ଦେଶ ସର୍ବଦା ହୋଇଛି ଚେଷ୍ଟିତ । ମୁଖ୍ୟତଃ ଖାଦ୍ୟଶସ୍ୟ ଉତ୍ପାଦନ ରେ ଓଡିଶାର ସ୍ଥାନ ଦେଶରେ ସ୍ଵତନ୍ତ୍ର । ବାରମ୍ବାର କୃଷିକର୍ମଣ ପୁରସ୍କାର ପାଇବା ଏହାର ଜ୍ବଳନ୍ତ ନିଦର୍ଶନ । କୃଷିଭିତ୍ତିକ ନୂଆ ନୂଆ ଲୋକାଭିମୁଖୀ ଯୋଜନା ର ପ୍ରଣୟନ ଓ ସଫଳ ରୂପାୟନ କ୍ଷେତ୍ର ରେ ଗଜପତି ଜିଲ୍ଲା ଗ୍ରହଣ କରିଛି ଏକ ଗୁରୁତ୍ୱପୂର୍ଣ୍ଣ ଭୂମିକା । ଏହା ସେହି ଅଳ୍ପ କିଛି ଜିଲ୍ଲା ମାନଙ୍କ ମଧ୍ୟରୁ ଅନ୍ୟତମ ଯାହା ଗତ ୫ ରୁ ୧୦ ବର୍ଷ ମଧ୍ୟରେ କୃଷିକ୍ଷେତ୍ର ରେ ଲାଭ କରିଛି ଅଭୂତପୂର୍ବ ଉନ୍ନତି ଏବଂ ଅନ୍ୟ ଜିଲ୍ଲାମାନଙ୍କ ପାଇଁ ସାଜିଛି ପ୍ରେରଣାର ଉତ୍ସ । ବିଗତ ବର୍ଷ ମାନଙ୍କ ତୁଳନାରେ , ଚଳିତବର୍ଷ ଗଜପତି ଜିଲ୍ଲାରେ ମଣ୍ଡି ରେ ଧାନକ୍ରୟ ପ୍ରକ୍ରିୟାରେ ଆଖିଦୃଶିଆ ପ୍ରଗତି ପରିଲକ୍ଷିତ ହୋଇଛି । ୨୦୨୧-୨୨ ଖରିଫ ଋତୁ ପାଇଁ ୧୨୭୪୨ ପଂଜୀକୃତ କୃଷକ ମାନଙ୍କ ଠାରୁ ୫୬୧୧୯.୪୦୨ ମେଟ୍ରିକ ଟନ୍ ଧାନ ଓ ୩୭୬୦୦.୦୦୦ ମେଟ୍ରିକ ଟନ୍ ଚାଉଳ କ୍ରୟ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିବା ସ୍ଥଳେ ସାଧାରଣ ଧାନର ସର୍ବନିମ୍ନ ସହାୟକ ମୂଲ୍ୟ ୧୯୪୦ ପ୍ରତି କୁଇଣ୍ଟାଲ ଓ ଗ୍ରେଡ୍-ଏ ପାଇଁ ୧୯୬୦ ପ୍ରତି କୁଇଣ୍ଟାଲ୍ ସ୍ଥିର କରାଯାଇଛି । କେବଳ ସେତିକି ନୁହେଁ , ଜିଲ୍ଲାରେ “କୃଷକ କ୍ୟାଣ୍ଟିନ୍ ” ଭଳି ଅଭିନବ ପଦକ୍ଷେପ ଗ୍ରହଣ କରାଯାଇଛି ଯେଉଁଥିରେ ସ୍ଵୟଂସହାୟକ ଗୋଷ୍ଠୀ ଙ୍କ ଦ୍ୱାରା ଖାଦ୍ୟ ପ୍ରସ୍ତୁତ କରାଯାଇ କୃଷକମାନଙ୍କୁ ଧାନକ୍ରୟ ସମୟରେ ବିତରଣ କରାଯାଉଛି ଯଦ୍ୱାରା କୃଷିକ୍ଷେତ୍ର ରେ ମନୋନିବେଶ ପାଇଁ ସେମାନଙ୍କ ଆଗ୍ରହ ବଢିବା ସହ ବିକାଶ ପ୍ରକ୍ରିୟା ତ୍ୱରାନ୍ବିତ ହେଉଛି । ଯେଭଳି ରାଜ୍ୟ ସରକାରଙ୍କ “ମିଶନ ଶକ୍ତି ” କାର୍ଯ୍ୟକ୍ରମ ମହିଳାମାନଙ୍କୁ ଅର୍ଥନୈତିକ ସ୍ତର ରେ ସ୍ୱାବଲମ୍ବୀ କରିବା ସହ ସେମାନଙ୍କ ଆତ୍ମସମ୍ମାନ ଫେରାଇଆଣିବା ରେ ସର୍ବଶ୍ରେଷ୍ଠ ମାଧ୍ୟମ ସାଜିଛି , ସେହି ସମାନ ଧାରାରେ ଗଜପତି ଜିଲ୍ଲା ମହିଳା ସ୍ଵୟଂ ସହାୟକ ଗୋଷ୍ଠୀ ଙ୍କୁ ମଣ୍ଡି ରେ ଧାନକ୍ରୟ ପ୍ରକ୍ରିୟାରେ ନିୟୋଜିତ କରି ସେମାନଙ୍କୁ ଆହୁରି ଅଧିକ ସଶକ୍ତ କରିଛି । ଚାରୋଟି ବ୍ଲକ୍ ରେ ପ୍ରାୟ ୪୪ ରୁ ଅଧିକ ମହିଳା ସ୍ଵୟଂ ସହାୟକ ଗୋଷ୍ଠୀ ଏହି ପ୍ରକ୍ରିୟାରେ ଭାଗ ନେଇ ରାଜ୍ୟ ଅର୍ଥନୀତି କୁ ଆହୁରି ଅଧିକ ସୁଦୃଢ କରିଛନ୍ତି । ସେହିପରି ଧାନମଣ୍ଡି ର ସୁପରିଚାଳନା କରି ମହିଳା ମାନେ ବିକାଶର ମହାଧାରା ରେ ଆପଣାକୁ ସାମିଲ କରିବା ସହ ଦୃଢ କାର୍ଯ୍ୟଦକ୍ଷତାର ପ୍ରଦର୍ଶନ କରିଛନ୍ତି । ଏସଏଚଜି ଓ ଜିପିଏଲଏଫ ( ଗ୍ରାମପଂଚାୟତ ମହାସଂଘ ) ମଧ୍ୟରେ ୪୦:୬୦ ଅନୁପାତରେ ଲାଭାଂଶ ବଣ୍ଟନ ସମସ୍ତଙ୍କ ଆର୍ଥିକ ସ୍ଥିତିରେ ସୁଧାର ଆଣିବା ରେ ଏକ ସ୍ୱାଗତଯୋଗ୍ୟ ପଦକ୍ଷେପ ବୋଲି କୁହାଯାଇପାରେ । ଧାନସଂଗ୍ରହ , ମାନପରୀକ୍ଷଣ , ମିଲର୍ ମାନ ଙ୍କ ସହ ଯୋଗାଯୋଗ ଠାରୁ ଆରମ୍ଭ କରି ଭବିଷ୍ୟତ ପାଇଁ ଖାଦ୍ୟଶସ୍ୟ ସଂରକ୍ଷଣ କରି ରଖିବା ଆଦି ପ୍ରତ୍ୟେକ କାର୍ଯ୍ୟରେ ମହିଳାମାନେ ନିୟୋଜିତ ହୋଇଛନ୍ତି । ଏଭଳି ନିୟୋଜନ କେବଳ ଯେ ମହିଳା ମାନଙ୍କୁ ଆତ୍ମନିର୍ଭରଶୀଳ କରିଛି ତାହା ନୁହେଁ , ପରନ୍ତୁ ଚାଷୀମାନଙ୍କ ହତାଶା ଭାବ ଦୂର କରିବା ସହ ସେମାନଙ୍କ ମୁଖରେ ହସ ଫୁଟାଇପାରିଛି । ଏହିପରି ଗୋଟିକ ପରେ ଗୋଟିଏ ଅଭିନବ ଯୋଜନା ଓ ପ୍ରୟାସ ନିଶ୍ଚିତ ରୂପେ ଗଜପତି ଜିଲ୍ଲା କୁ କୃଷିକ୍ଷେତ୍ର ରେ ସଫଳତା ର ଶୀର୍ଷସ୍ତର ରେ ଉପନୀତ କରାଇବ , ଏଥିରେ ସନ୍ଦେହର ଅବକାଶ ନାହିଁ ।