କୋଟି କୋଟି ଟଙ୍କା ର ଗଞ୍ଜେଇ ଗଛ ପୋଡିଲା ପ୍ରଶାସନ

ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା) – ଗଜପତି ଜିଲ୍ଲାରେ ପୁଣି ୧୬କୋଟି ଟଙ୍କାରୁ ଉର୍ଦ୍ଧ ଚୋରାରେ ଚାଷ ହୋଇଥିବା ଗଞ୍ଜେଇ ଗଛକୁ ପୋଡି ଦିଆଯାଇଥିବା ସୁଚନା ମିଳିଛି । ଏହି ଜିଲ୍ଲାର ମୋହନା ବ୍ଲକ ମୋହନା ଥାନା ଅନ୍ତର୍ଗତ ବଡସିନ୍ଧବା ଗ୍ରାମପଞ୍ଚାୟତର ଢେଙ୍କାସିନ୍ଧବା ଗ୍ରାମରେ ଅବକାରୀ ବିଭାଗ ଓ ପୋଲିସ ବିଭାଗର ଏକ ମିଳିତ ଚଢାଉ କରାଯାଇ ସେଠାରେ ପ୍ରାୟ ୮୩ ଏକର ଜମିରେ କରାଯାଇଥିବା ପ୍ରାୟ ୧ଲକ୍ଷ ୬୬ହଜାର ଗଞ୍ଜେଇ ଗଛକୁ ନଷ୍ଟ କରାଯାଇଛି । ଏହି ଗଞ୍ଜେଇ ଗଛର ଆନୁମାନିକ ମୂଲ୍ୟ ପ୍ରାୟ ୧୬କୋଟି ଟଙ୍କା ହେବ ବୋଲି ବିଭାଗୀୟ ସୂତ୍ରରୁ ପ୍ରକାଶ । ମୋହନା ଥାନାଅଧିକାରୀ ସୁଜିତ କୁମାର ନାୟକ,ଅବକାରୀ ଅଧିକାରୀ ସୁରୀ ବାବୁ ନେତୃତ୍ୱରେ ପୋଲିସ,ଅବକାରୀ ଓ ରାଜସ୍ୱ ବିଭାଗର କର୍ମଚାରୀ ମାନଙ୍କ ଦ୍ୱାରା ଏହି ଚଢାଉ କରାଯାଇଥିଲା । ଏଠାରେ ଇଲ୍ଲେଖଯୋଗ୍ୟ ଏହିଯେ,ଗତ ୨୦ଦିନ ମଧ୍ୟରେ ଗଜପତି ଜିଲ୍ଲାର ବିଭିନ୍ନ ସ୍ଥାନରେ ଏପରି ଭାବେ ଚଢାଉ କରାଯାଇ ଏହି ଚଢାଉକୁ ମିଶାଇ ୩ଗୋଟି ଅଞ୍ଚଳରୁ ପ୍ରାୟ ୧୦ଲକ୍ଷରୁ ଉର୍ଦ୍ଧ ଗଞ୍ଜେଇ ଗଛକୁ ପୋଡି ଦିଆଯାଇଛି । ଏହି ଗଞ୍ଜେଇ ଗଛଗୁଡିକର ଆନୁମାନିକ ମୁଲ୍ୟ ପ୍ରାୟ ୧୦୦କୋଟି ଟଙ୍କାରୁ ଉର୍ଦ୍ଧ ହେବ । ଗଜପତି ଜିଲ୍ଲାର ଦୁର୍ଗମ ବନ ପାହାଡ ଘେରା ବନ ଓ ରାଜସ୍ୱ ବିଭାଗ ପାହାଡିଆ ସରକାରୀ ଜମିରେ ଏହି ଚୋରା ଗଞ୍ଜେଇ ଚାଷ କରାଯାଉଛି । ଏହି ଚାଷରେ ସଂପୃକ୍ତ ଅଞ୍ଚଳର ଲୋକଙ୍କୁ ନାମକୁ ମାତ୍ର ପାରିଶ୍ରମିକରେ ବିନିଯୋଗ କରାଯାଉଛି । ଏକ ଶକ୍ତିସାଳି ମାଫିଆ ଧରଣର ବ୍ୟବସାୟୀମାନଙ୍କ ଦ୍ୱାରା ଏହି ଚୋରା ଗଞ୍ଜେଇ ଚାଷ କରାଯାଉଥିବା ବହୁ ଅଭିଯୋଗ ରହିଛି । ତେବେ ବିଭିନ୍ନ ଚଢାଉ ବେଳେ କେବଳ ଗଞ୍ଜେଇ ଗଛକୁ ପୋଡି ଦିଆଯାଉଛି । ଏଥିରେ ସଂପୃକ୍ତ ଜଣେ ହେଲେ ଚୋରା ବ୍ୟବସାୟୀଙ୍କୁ ଧରାଯାଇ ପାରି ନାହିଁ । କେବଳ ଚୋରାରେ ଚାଷ କରାଯାଇଥିବା ଗଞ୍ଜେଇ ଗଛକୁ ପୋଡି ଦେଲେ ଚୋରା ଗଞ୍ଜେଇ ଚାଷ ବନ୍ଦ ହୋଇଯିବ ନାହିଁ । ଏହି ଚାଷରେ ଯେଉଁ ମାନେ କୋଟି କୋଟି ଟଙ୍କା ଲାଭକରି ଶକ୍ତିଶାଳୀ ପାଲଟିଛନ୍ତି ସେମାନଙ୍କୁ ଜବତ କଲେ ଗଞ୍ଜେଇ ଚୋରା କାରବାରକୁ ରୋକା ଯାଇପାରିବ ।