କୋମଳ ସ୍ପର୍ଶ କରେ ମନ ଓ ଦେହକୁ ଶାନ୍ତ
ପ୍ରିୟତମଙ୍କ କୋମଳ ସ୍ପର୍ଶରେ ଯନ୍ତ୍ରଣା ଉପଶମ ହୋଇଥାଏ । ଏଭଳି ଏକ ତଥ୍ୟ ସମ୍ପର୍କରେ ଗବେଷକମାନେ ଜାଣିବାକୁ ପାଇଛନ୍ତି । ପରସ୍ପରକୁ ଭଲ ପାଉଥିବା ଯୁବତୀ ଓ ଯୁବକଙ୍କ ମଧ୍ୟରେ ସ୍ଥଳ ବିଶେଷରେ ଅନେକଗୁଡିଏ ସମାନତା ରହିଥାଏ । ସେମାନଙ୍କର ଆଚାର ବ୍ୟବହାର ସମେତ ଦୈନନ୍ଦିନ ଜୀବନଶୈଳୀ, ପସନ୍ଦ, ଖାଦ୍ୟ ପ୍ରଭୃତିରେ ଅନେକ ସମାନତା ପରିଲକ୍ଷିତ ହୋଇଥାଏ । ତେବେ ମାନସିକସ୍ତରରେ ମଧ୍ୟ ସେମାନଙ୍କ ମଧ୍ୟରେ ସମ୍ପର୍କ ଆପେଆପେ ସ୍ଥାପିତ ହାଇଥାଏ । ଫଳରେ ଜଣଙ୍କର ଯନ୍ତ୍ରଣା ସମୟରେ ଅନ୍ୟଜଣଙ୍କ କୋମଳ ସ୍ପର୍ଶ ଅମୃତତୁଲ୍ୟ ପ୍ରତିପାଦିତ ହୋଇଥାଏ । ଯନ୍ତ୍ରଣା ଉପଶମ ସହିତ ସ୍ପର୍ଶ ଦ୍ୱାରା ସ୍ନାୟୁ ମାଧ୍ୟମରେ ମସ୍ତିଷ୍କରେ ଏକ ପ୍ରକାର ସକାରାତ୍ମକ ତରଙ୍ଗ ସୃଷ୍ଟି ହୋଇଥାଏ । ପ୍ରେମୀଯୁଗଳଙ୍କ ମଧ୍ୟରେ କିପରି ଅତୁଟବନ୍ଧନ ସ୍ଥାପିତ ହାଇଥାଏ ସେଥିନେଇ ଆମେରିକାର କଲରାଡା ବିଶ୍ୱବିଦ୍ୟାଳୟର ଗବେଷକ ଦଳ ୧୦ ହଜାର ଯୋଡ଼ି ପ୍ରେମୀଯୁଗଳଙ୍କ ଉପରେ ଦୀର୍ଘଦିନ ଧରି ପରୀକ୍ଷା ନିରୀକ୍ଷା କରିଥିଲେ । ପୁଣି କେତେକଙ୍କର ମସ୍ତିଷ୍କର ସ୍କାନିଂ ମଧ୍ୟ କରାଯାଇଥିଲା । ସାଧାରଣ ସମୟରେ ମସ୍ତିଷ୍କରେ କିଭଳି ତରଙ୍ଗ ପ୍ରବାହିତ ହେଉଛି ଏବଂ ଯନ୍ତ୍ରଣା ସମୟରେ ତରଙ୍ଗର ସ୍ଥିତିରେ ଥିବା ପରିବର୍ତ୍ତନକୁ ଅନୁଧ୍ୟାନ କରାଯାଇଥିଲା । ଏହାସହିତ ପ୍ରିୟତମଙ୍କ କୋମଳ ସ୍ପର୍ଶ ସମୟରେ ତରଙ୍ଗ କିପରି ପ୍ରବାହିତ ହେଉଛି ତାହା ନିରୀକ୍ଷଣ କରାଯାଇଥିଲା । ଦେଖାଯାଇଥିଲା ଯନ୍ତ୍ରଣା ସମୟରେ ପ୍ରିୟତମଙ୍କ ସ୍ପର୍ଶ ଦ୍ୱାରା ମସ୍ତିଷ୍କ ତରଙ୍ଗରେ ଅନେକ ପରିବର୍ତ୍ତନ ହୋଇଥିଲା । ଯାହାକି ସାଧାରଣ ସମୟରେ ମସ୍ତିଷ୍କ ତରଙ୍ଗ ସ୍ଥିତି ସହିତ ପ୍ରାୟ ମେଳ ଖାଇଥିଲା ।
