କ୍ୟାନ୍ସର ପୀଡ଼ିତଙ୍କ ଆଶୁ ଆରୋଗ୍ୟ କାମନା ପାଇଁ ରାମ ମନ୍ଦିରରେ ପୂଜାର୍ଚ୍ଚନା

ଭୁବନେଶ୍ୱର, (ଯୁଗାବ୍ଦ ନ୍ୟୁଜ୍) : ସିଦ୍ଧାନ୍ତ ସାହୁ, ବୟସ ମାତ୍ର ୧୩ ବର୍ଷ । ପିତା-ପବିତ୍ର ସାହୁ ଯେ କି ଜଣେ ଗରିବ ଲୋକ ଭେଣ୍ଡିଂଜୋନରେ ଦୋକାନଟିଏ କରି ନିଜର ଗୁଜୁରାଣ ମେଣ୍ଟାଇଥାନ୍ତି । ୨୦୧୭ ମସିହାରୁ ନିଜ ପୁତ୍ର ସିଦ୍ଧାନ୍ତ ବ୍ଲଡ଼ କ୍ୟାନ୍ସରେ ପୀଡ଼ିତ ହେବାରୁ ସିଦ୍ଧାନ୍ତ ଭୁବନେଶ୍ୱରସ୍ଥିତ ଏମ୍ସ୍ ହସ୍ପିଟାଲରେ ଚିକିତ୍ସିତ ହୋଇ ଆସୁଥିଲେ । ମାତ୍ର ଦୁଃଖ ପବିତ୍ରଙ୍କ ପିଛା ଛାଡ଼ିନଥିଲା । ହଠାତ୍ ପୁତ୍ରର ରୋଗ ବଢିଯିବାରୁ କୌଣସି ଔଷଧ କାମ କରିନଥିôଲା, ଏପରିକି କେମୋ ମଧ୍ୟ କାମ ଦେଇନଥିଲା ସିଦ୍ଧାନ୍ତକୁ । ବାଧ୍ୟ ହୋଇ ଏମ୍ସ୍ ହସ୍ପିଟାଲ କର୍ତ୍ତୃପକ୍ଷ ଉଚ୍ଚ ଚିକିତ୍ସା ନିମନ୍ତେ ମୁମ୍ବାଇର ଟାଟା ମେମୋରିଆଲ ହସ୍ପିଟାଲକୁ ନେଇଯିବା ପାଇଁ ସିଦ୍ଧାନ୍ତର ବାପାକୁ ପରାମର୍ଶ ଦେଇଥିଲେ । ଅର୍ଥ ଅଭାବରୁ ସିଦ୍ଧାନ୍ତଙ୍କ ପରିବାର ଲୋକେ ଭାଙ୍ଗି ପଡ଼ିଥିଲେ ଏବଂ ସବୁ ଆଶା ହରାଇ ବସିଥିଲେ । ଏହି ଖବର ଶୁଣିବା ମାତ୍ରେ ସିଦ୍ଧାନ୍ତ ରହୁଥିବା ପଞ୍ଜାବୀ ସାହି, ସତ୍ୟନଗରର ଘର ମାଲିକ ସବ୍ୟସାଚୀ ମିଶ୍ର ଏବଂ ସମାଜସେବୀ ଏନ୍. ସମ୍ବିତ୍ ଦାସ ତାଙ୍କୁ ଆଶ୍ୱାସନା ଦେଇଥିଲେ । ଭୁବନେଶ୍ୱର ସାଂସଦ ଶ୍ରୀମତୀ ଅପରାଜିତା ଷଡ଼ଙ୍ଗୀ ମଧ ଦେବଦୂତ ଭଳି ଉଭା ହୋଇ ସିଦ୍ଧାନ୍ତର ଚିକିିତ୍ସା ନିମନ୍ତେ ମୁମ୍ବାଇର ଟାଟା ମେମୋରିଆଲ ହାସ୍ପିଟାଲରେ ଚିକିତ୍ସିତ ଏବଂ ରହିବା ପାଇଁ ସବୁ ପ୍ରକାର ବନ୍ଦୋବସ୍ତ କରିଥିଲେ । ଭରଷା ଟ୍ରଷ୍ଟ ତରଫରୁ ସିଦ୍ଧାନ୍ତଙ୍କ ପରିବାରକୁ କିଛି ସହାୟତା ରାଶି ପ୍ରଦାନ କରିଥିଲେ । ସିଦ୍ଧାନ୍ତ ଆଜି ଚିକିତ୍ସା ନିମନ୍ତେ ମୁୁମ୍ବାଇ ଯାତ୍ରା କରିଛନ୍ତି । ଏହି ଉପଲକ୍ଷେ ଏକାମ୍ର ବିଜେପି ବିଧାୟକ ପ୍ରାର୍ଥୀ ବାବୁ ସିଂ, ଏନ୍. ସମ୍ବିତ୍ ଦାସ, ସବ୍ୟସାଚୀ ମିଶ୍ର, ପ୍ରଦୀପ ମିଶ୍ର, ଦେବଯାନୀ ରାଉତରାୟ, ପିପୁଲ୍ ଫର୍ ସେବାର ଶୁଭକାନ୍ତ ସାମଲ, ସତ୍ୟନଗର ବାସିନ୍ଦା ଏବଂ କିଛି ସହୃଦୟ ବ୍ୟକ୍ତିଙ୍କ ନେତୃତ୍ୱରେ ଭୁବନେଶ୍ୱରସ୍ଥ ରାମ ମନ୍ଦିର ପରିସରରେ ପୂଜାର୍ଚ୍ଚନା କରିବା ସହିତ ସିଦ୍ଧାନ୍ତର ଆଶୁ ଆରୋଗ୍ୟ କାମନା କରି ପ୍ରଦୀପ ପ୍ରଜ୍ଜ୍ୱଳନ କରିଥିଲେ ।