ଖବର ପ୍ରକାଶନ ପରେ ଚେତିଲା ପ୍ରଶାସନ

ହିଞ୍ଜିଳିକାଟୁ,(ଶେଷଦେବ ସାହୁ): ୫୯ ନଂ ଜାତୀୟ ରାଜପଥ ହିଞ୍ଜିଳିକାଟୁ ସହରର ବିଭିନ୍ନ ସ୍ଥାନରେ ଘରୋଇ ଟେଲିକମ ସଂସ୍ଥା ପକ୍ଷରୁ କେବୁଲ୍ ବିଛାଇବା ପାଇଁ ଗର୍ତ୍ତ ଖୋଳାଯାଇଥିଲା । ଦୀର୍ଘ ଦିନ ଧରି କାର୍ଯ୍ୟ ସମ୍ପାଦନ ନହେବାରୁ ଏବଂ ଗର୍ତ୍ତ ଚର୍ତୁପାଶ୍ୱର୍ରେ ସଂସ୍ଥା ପକ୍ଷରୁ କୌଣସି ସାଙ୍କେତିକ ଚିହ୍ନ ଦର୍ଶାଯାଇନଥିବାରୁ ବହୁ ସମୟରେ ଛୋଟ ବଡ ଦୂର୍ଘଟଣା ଘଟି ବହୁ ଧନଜୀବନ ନଷ୍ଟ ହେଉଥିଲା। ଏ ନେଇ ସ୍ଥାନୀୟ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିବାରୁ ସ୍ଥାନୀୟ ଅଞ୍ଚଳର ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଥିଲା। ଘଟଣାର ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଦାବି ନେଇ ବୁଧବାର ହିଞ୍ଜିଳିକାଟୁ ବିକାଶ ମଞ୍ଚ ପକ୍ଷରୁ ଜିଲ୍ଲାପାଳଙ୍କ ଉଦ୍ଦେଶ୍ୟରେ ହିଞ୍ଜିଳିକାଟୁ ତହସିଲଦାର ତପନ କୁମାର ମହାପାତ୍ରଙ୍କୁ ଏକ ଦାବି ପତ୍ର ପ୍ରଦାନ କରାଯାଇଥିଲା। ଦାବିପତ୍ର ପ୍ରଦାନର ୨୪ ଘଣ୍ଟା ମଧ୍ୟରେ ଘଟଣାର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ। ଘଟଣା ନେଇ ଦୈନିକ ଖବରକାଗଜ” ଯୁଗାବ୍ଦ”ରେ ଗୁରୁବାର ଖବର ପ୍ରକାଶିତ ହୋଇଥିଲା। ପ୍ରତିଶୃତି ମୁତାବକ ଗୁରୁବାର ତହସିଲଦାର ତପନ କୁମାର ମହାପାତ୍ର ଓ ପୌର କାର୍ଯ୍ୟ ନିର୍ବାହୀ ଅଧିକାରୀ ସୁକାନ୍ତ ଚନ୍ଦ୍ର ବେଉରାଙ୍କ ପ୍ରତକ୍ଷ୍ୟ ଉପସ୍ଥିତିର ଠିକା ସଂସ୍ଥାକୁ ଡାକି ସହରର ବିଭିନ୍ନ ସ୍ଥାନରେ ଖୋଳାଯାଇଥିବା ଗର୍ତ୍ତକୁ ମାଟି ପକାଇ ସମତୁଲ କରାଯାଇଥିଲା। ଆଗାମୀ ଦିନରେ ସଂପୃକ୍ତ କାର୍ଯ୍ୟାଳୟରୁ ବିନା ଅନୁମତିରେ ଓ ସୁରକ୍ଷା ନିୟମ ପାଳନ ନକରି ରାସ୍ତା ଖୋଳିଲେ ସଂପୃକ୍ତ ସଂସ୍ଥା ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୌର କାର୍ଯ୍ୟ ନିର୍ବାହୀ ଅଧିକାରୀ ବେଉରା କହିଛନ୍ତି। ଅନ୍ୟପକ୍ଷରେ ୨ ଅଧିକାରୀଙ୍କ ତ୍ବରିତ ପଦକ୍ଷେପ ଗ୍ରହଣ କରାଯିବାରୁ ହିଞ୍ଜିଳିକାଟୁ ବିକାଶ ମଞ୍ଚ ପକ୍ଷରୁ ଉଭୟ ଅଧିକାରୀଙ୍କୁ ସାଧୁବାଦ ଜ୍ଞାପନ କରାଯାଇଛି।