ଗୋପାଳପୁର ଗ୍ରାମରେ ଭୌତିକ କାଣ୍ଡ

ନାଉଗାଁ : ନାଉଗାଁ ତହସିଲ ଅଧିନ ନୂଆଗାଁ ପଂଚାୟତ ଗୋପାଳପୁରର ଭାସିଆକୁଦ ଗ୍ରାମରେ ଭୌତିକ କାଣ୍ଡ ଘଟୁଥିବା ଚର୍ଚ୍ଚା ହେଉଛି । ଉକ୍ତ ଗ୍ରାମର ବଟକୃଷ୍ଣ ଜେନାଙ୍କର ଶୁକ୍ରବାର ମଧ୍ୟାହ୍ନରେ ଅଗ୍ନିକାଣ୍ଡ ଘଟି ୯ ବଖରା ଚାଳଘର ସମ୍ପୁର୍ଣ୍ଣ ଭଷ୍ମ ହୋଇଯାଇଥିଲା । ମାତ୍ର ରୋଷେଇ ଗୃହ ଓ ଗୁହାଳ ଘର ଅନ୍ୟ ଦିଗରେ ଥିବାରୁ କୌଣସି ଅଘଟଣ ଘଟି ନଥିଲା । ଆଜି ମଧ୍ୟାହ୍ନରେ ହଠାତ ଏଥିରେ ନିଆଁ ଲାଗିଥିବା ପରିବାର ଲୋକ ଦେଖି ନିଆଁ ଲିଭାଇବାକୁ ଚେଷ୍ଠା କରିଥିଲେ । ହେଲେ ନିଆଁକୁ ଆୟତ କରି ନପାରି ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଁଚି ନିଆଁକୁ ଆୟତ କରିଥିଲେ । ଅନ୍ୟପକ୍ଷରେ ଗୋଟିଏ ସ୍ଥାନରେ ୩ ଦିନ ମଧ୍ୟରେ ଦୁଇ ଥର ନିଆଁ ଲାଗିବାରୁ କିଏ ଗୁଣି ଗାରେଡି କରି ଏହିପରି କରୁଥିବା ଆଲୋଚନା ହେଉଛି । ଯାହାଫଳରେ ସ୍ଥାନୀୟ ଅଂଚଳର ଜନସାଧାରଣମାନେ ଭୟଭୀତ ହେଉଥିବା ଜଣାଯାଇଛି । ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଅଂଚଳର ଜନସାଧାରଣମାନେ ଦାବି କରିଛନ୍ତି । ଏଥିରେ ଲକ୍ଷାଧିକ ଟଙ୍କାର ଧନ ସମ୍ପତି ପୋଡି ପାଉଁଶ ହୋଇଯାଇଥିବା ଜଣାଯାଇଛି । ସୁଚନା ଅନୁସାରେ ଶୁକ୍ରବାର ମଧ୍ୟାହ୍ନ ସମୟରେ ଉକ୍ତ ଗ୍ରାମର ବଟକୃଷ୍ଣ ଜେନାଙ୍କ ଘରେ ହଠାତ ନିଆଁ ଲାଗିଯାଇଥିଲା । ନିଆଁ ଲାଗିଥିବା ଗ୍ରାମବାସୀମାନେ ଦେଖି ନିଆଁକୁ ଆୟତ କରିବାକୁ ଚେଷ୍ଟା କରଥିଲେ ମଧ୍ୟ ଆୟତ କରିପାରିନଥିଲେ । ଖବର ପାଇ ଅଗ୍ନିଶମ ବାହିନୀ ପକ୍ଷରୁ ଦୁଇଟି ଦମକଳ ଗାଡି ଘଟଣାସ୍ଥଳରେ ପହଁଚି ନିଆଁକୁ ଆୟତ କରାଯାଇଥିଲା । କିନ୍ତୁ ସେତେବେଳକୁ ୯ ବଖରା ଘର ସହିତ ଘରର ସମସ୍ତ ଆସବାବପତ୍ର, ଧାନ, ମୁଗ, ବିରି ସହ ଲକ୍ଷାଧିକ ଟଙ୍କାର ସମ୍ପତି ସମ୍ପୁର୍ଣ୍ଣ ପୋଡି ପାଉଁଶ ହୋଇଯାଇଥିଲା । ନିଆଁଁ ଲାଗିବାର କାରଣ ଅସ୍ପଷ୍ଟ ଥିବାବେଳେ ଜେନାଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ସ୍ଥାନୀୟ ସରପଂଚଙ୍କ ସମେତ ଗ୍ରାମବାସୀମାନେ ଦାବି କରିଛନ୍ତି ।