ଗ୍ୟାସ ସିଲିଣ୍ଡର ରୁ ନିଆଁ ଲିକ ହୋଇ ତିନି ବଖରା ଜଳିଲା; ଜଣେ ମହିଳା ଗୁରୁତର
ସାନଖେମୁଣ୍ଡି,(ପଦ୍ମଲୋଚନ ପାଣିଗ୍ରାହୀ):ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ଅନ୍ତର୍ଗତ ସାହାସପୁର କାଳଞ୍ଜୀ ସାହିରେ ଗୁରୁବାର ବଡିଭୋରରୁ ଗ୍ରାମର ଚକ୍ର ଡାକୁଆଙ୍କ ଘରେ ରୋଷେଇ ଚାଲିଥିବା ସମୟରେ ଗ୍ୟାସ ପାଇପାରୁ ନିଆଁ ବାହାରି ୩ ବଖରା ଘର ପୋଡି ଯାଇଥିବା ବେଳେ ଆସବାବପତ୍ର ଓ ମୂଲ୍ୟବାନ ଜିନିଷ ପୋଡି ପାଉଁଶ ହୋଇଯାଇଥିବା ଜଣାପଡ଼ିଛି । ତେବେ ଏହି ଅଗ୍ନିକାଣ୍ଡ ସଂସ୍ପର୍ଶରେ ଆସି ଗୋଲାପୀ ଡାକୁଆ ନାମକ ଜଣେ ମହିଳା ଗୁରୁତର ହୋଇଥିବା ଜଣାପଡିଛି । ଚକ୍ରଙ୍କ ପରିବାରର ସମସ୍ତ ସଦସ୍ୟ ଶୋଇଥିବା ବେଳେ ଗୋଲାପୀ ଗାଧୋଇ ସାରିବା ପରେ ରୋଷେଇ କରିବା ପାଇଁ ଗ୍ୟାସ ଲଗାଇଥିଲେ । ଏହାର କିଛି ସମୟପରେ ଗ୍ୟାସ ସିଲିଣ୍ଡରରୁ ଆକସ୍ମିକ ନିଆଁ ବାହାରିଥିଲା । ତେବେ ମହିଳା ଜଣକ ଚିତ୍କାର ଶୁଣି ପରିବାର ଲୋକେ ଶଯ୍ୟାରୁ ଉଠି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ ମଧ୍ୟ ନିଆଁ ଘର ସାରା ବ୍ଯାପିଯାଇ ଘରର ଆସବାବପତ୍ର ଜିନିଷ ପୋଡି ଯାଇଥିଲା । ଘଟଣାପରେ ସ୍ଥାନୀୟ ସରପଞ୍ଚ ପ୍ରତିନିଧି କାଳୀଚରଣ ରାଉଳ ଦିଗପହଣ୍ଡି ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବରପାଇ ଅଗ୍ନିଶମ ବିଭାଗ କର୍ମଚାରୀ ମାନେ ଘଟଣାସ୍ଥଳରେ ପହଞ୍ଚି ଘର ଓ ଆଖପାଖ ଘରଗୁଡିକର ବିଦ୍ୟୁତ ସରବରାହ ବନ୍ଦ ରଖି ଜଳନ୍ତା ଗ୍ଯାସକୁ ବାହାରକୁ ଆଣି ଆୟତ୍ତ କରିଥିଲେ । ତେବେ ଆହତ ଗୋଲାପୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ । ପ୍ରାଥମିକ ଚିକିତ୍ସା ପରେ ମହିଳା ଜଣଙ୍କ ସୁସ୍ଥ ରହିଥିବା ଜଣାପଡିଛି ।
