ଘଟେ ନାଟୁଆ

ତୁମେ ସର୍ବ ଘଟେ
ତୁମେ ବାଟେଘାଟେ
ନାଟ ଲଗାଇଛ ହରି,
ନଟକୁଟ କରି
ଖଟ୍ ଖଟ୍ କରି
ଲୁଚ ନ ପାରୁଛୁ ଧରି ।

ତୁମରି ମାୟାକୁ
କିଏ ବା ଧରିବ
ଯୋଗମାୟା ଗଲେ ହାରି,
ବ୍ରହ୍ମା ବିଷ୍ଣୁ ଶିବ
ବାଟବଣା ହେଲେ
ଆଉ କେ ପାରିବ ଧରି ।

ମୁନି ଋଷିଗଣ
ତପ ଜପ କରି
ଯୁଗଯୁଗ ଗଲା ବିତି,
ତଥାପି କି ମାୟା
କରୁ ମାୟାଧର
ତପସ୍ୟାର ନାହିଁ ଇତି ।

ଧରି ନ ପାରିବେ
ସଭିଏଁ ଜାଣନ୍ତି
ଭେଟ ପାଇଁ ମନେ ଇଛା,
ଥରେ ଭେଟ ହେଲେ
ବାଟ ଫିଟିଯିବ
ପୂର୍ଣ୍ଣ ହେବ ମନୋବାଞ୍ଛା ।

ଆହେ ଇଛାମୟ
ଇଛା ହେ ତୁମର
ନଟ ନାଗର ନାଟୁଆ,
ଥରେ ଧରା ଦିଅ
ଅବା ଭେଟ ହୁଅ
ବାଟ ଭୁଲାଉଛ କିୟାଁ ।

ଗଦାଧର ସାହୁ,ବ୍ରହ୍ମଗିରି,ପୁରୀ