ଘୋଡାହଡ ନଦୀରୁ ଅପରିଚିତ ଯୁବକଙ୍କ ମୃତଦେହ ଠାବ : ପୋଲିସର ତଦନ୍ତ ଜାରି

ସାନଖେମୁଣ୍ଡି, (ପଦ୍ମଲୋଚନ ପାଣିଗ୍ରାହୀ):ପାଟପୁର ଥାନା ଅନ୍ତର୍ଗତ ଖଲିଙ୍ଗି ପଞ୍ଚାୟତ ବାସୁଦେବପୁର ଗ୍ରାମଦେଇ ପ୍ରବାହିତ ଘୋଡାହଡ ନଦୀରୁ ସ୍ଥାନୀୟ ପୋଲିସ ଏକ ଅଚିହ୍ନା ଯୁବକଙ୍କ ମୃତଦେହ ଠାବ କରିଥିବା ଜଣାପଡିଛି । ସାନଖେମୁଣ୍ଡି ବ୍ଲକ ଖଲିଙ୍ଗି ପଞ୍ଚାୟତ ବାସୁଦେବପୁର ମଧ୍ୟରେ ଥିବା ଆମ୍ବ ତୋଟା ପାର୍ଶ୍ବରେ ପ୍ରବାହିତ ଘୋଡାହଡ ନଦୀରେ ପ୍ରଖର ସ୍ରୋତରେ ଆଜି ସକାଳୁ ଅଚିହ୍ନା ଯୁବକଙ୍କ ମୃତଦେହ ଭାସି ଆସି ଏକ ବୁଦା ମୂଳେ ଲାଗିଥିବା କିଛି ଲୋକ ଦେଖିବାକୁ ପାଇଥିଲେ।ଏହାପରେ ଗ୍ରାମବାସୀ ପାଟପୁର ପୋଲିସକୁ ଖବର ଦେଇଥିଲେ । ଖବରପାଇ ଥାନା ଅଧିକାରୀ ସବ୍ୟସାଚୀ ମଲ୍ଲଙ୍କ ନେତୃତ୍ୱରେ ପୋଲିସ କର୍ମଚାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ସାନଖେମୁଣ୍ଡି ଅଗ୍ନିଶମ ବିଭାଗ କର୍ମଚାରୀ ମାନେ ମୃତ ଯୁବକଙ୍କ ଶବକୁ ପାଣି ଭିତରୁ ଭାସମାନ ଅବସ୍ଥାରେ ଉଦ୍ଧାର କରିଥିଲେ । ଏନେଇ ପୋଲିସ ଥାନା ପକ୍ଷରୁ ଏକ ଅପମୃତ୍ୟୁ ମାମଲା ନଂ ୧୩/୨୨ ପ୍ରକାରେ ମକଦ୍ଦମା ରୁଜୁ କରି ତଦନ୍ତ ଚଳାଇଥିବା ବେଳେ ଅପରାହ୍ନରେ ଶବ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ପଠାଇଥିବା ଜଣାପଡିଛି । ତେବେ ମୃତ ଯୁବକ ଜଣକ କିଏ , କେଉଁ ଅଞ୍ଚଳର ତାହା ଖବର ପରିବେଷଣ ସୁଦ୍ଧା ଜଣାପଡିନାହିଁ । ଏନେଇ ସାନଖେମୁଣ୍ଡି ଅଞ୍ଚାଲରେ ଆତଙ୍କ ସୃଷ୍ଟି ହୋଇଛି।ଗତ କିଛିଦିନ ତଳେ କବିସୂର୍ଯ୍ୟନଗର ରୁ ଅପହରଣ କରି ଝରଣ ରେ ହତ୍ୟା ହୋଇଥିଲା, ରତ୍ନେଇ ପାହାଡ଼ରେ ଜଣେ ମହିଳାଙ୍କୁ ମାରିଦିଆ ଯାଇଥିଲା, ଗଞ୍ଜେଇ ବେପାରକୁ ନେଇ ହିଞ୍ଜିଳିକାଟୁ ର ବିଭୁପ୍ରସାଦ କୁ ତପ୍ତପାଣି ଜଙ୍ଗଲ ମଧ୍ୟରେ ମାରିଦିଆ ଯାଇଥିଲା ଏ ଭଳି ଅନେକ ଘଟଣା ଦେଖିବାକୁ ମିଳିଛି। ଅପରାଧୀ ମାନେ ପୁର୍ବ ଶତ୍ରୁତା ନେଇ ହତ୍ୟା କରି ପ୍ରମାଣ ନଷ୍ଟ ପାଇଁ ସାନଖେମୁଣ୍ଡି ଅଞ୍ଚଳ ସେମାନଙ୍କ ପାଇଁ ନିରାପଦ ହୋଇଥିବା ଅଞ୍ଚଳରେ ଚର୍ଚ୍ଚା ହେଉଛି। ଏନେଇ ପୋଲିସ ପକ୍ଷରୁ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।

Spread the love

Leave a Reply

Your email address will not be published. Required fields are marked *

Advertisement

ଏବେ ଏବେ