ଚତୁର୍ଥ ପିଲ୍ଲେ ଜଳଜୀବ ପ୍ରତିଷ୍ଠାନ କଂଗ୍ରେସ ଉଦଘାଟନ କଲେ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ

ଭୁବନେଶ୍ୱର : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପାଂଚ ଟ୍ରିଲିୟନ ଡଲାର ଅର୍ଥବ୍ୟବସ୍ଥା ସାଙ୍ଗକୁ ୨୦୨୨ ସୁଦ୍ଧା କୃଷକଙ୍କ ଆୟ ଦ୍ୱିଗୁଣିତ କରିବା ପାଇଁ ଜଳଜୀବ କୃଷିର ବିକାଶ କ୍ଷେତ୍ରରେ ସମନ୍ୱିତ ଉଦ୍ୟମ ଅପରିହାର୍ଯ୍ୟ ବୋଲି କେନ୍ଦ୍ର ଲଘୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ଏବଂ ପ୍ରାଣୀ ସମ୍ପଦ ବିକାଶ ରାଷ୍ଟ୍ରମନ୍ତ୍ରୀ ଶ୍ରୀ ପ୍ରତାପ ଚନ୍ଦ୍ର ଷଡଙ୍ଗୀ କହିଛନ୍ତି । ଆଜି ଭୁବନେଶ୍ୱର ଉପକଣ୍ଠ କୌଶଲ୍ୟାଗଙ୍ଗସ୍ଥିତ କେନ୍ଦ୍ରୀୟ ମଧୁର ଜଳ ଜୀବ ଗବେଷଣା କେନ୍ଦ୍ରଠାରେ ଆୟୋଜିତ ତିନିଦିନିଆ ଚତୁର୍ଥ ପିଲ୍ଲେ ଜଳଜୀବ ପ୍ରତିଷ୍ଠାନ ଅଧିବେଶନ (ପାଫ) କଂଗ୍ରେସର ଉଦଘାଟନୀ ସମାରୋହରେ ମୁଖ୍ୟ ଅତିଥି ଭାବେ ଯୋଗଦେଇ ଶ୍ରୀ ଷଡଙ୍ଗୀ ଏହି ମତବ୍ୟକ୍ତ କରିଛନ୍ତି ।  ଏହି କ୍ଷେତ୍ରରେ ମୂଲ୍ୟ ଶୃଙ୍ଖଳାକୁ ସୁଦୃଢ଼ କରି ଜଳଜୀବ କୃଷିକୁ ଲାଭଜନକ ବ୍ୟବସାୟରେ ପରିଣତ କରିବା ଦିଗରେ ଦୃଢ଼ ପଦକ୍ଷେପ ନିଆଯିବାର ଆବଶ୍ୟକତା ରହିଛି । ଦେଶର କ୍ରମବର୍ଦ୍ଧିଷ୍ଣୁ ଜନସଂଖ୍ୟା ଓ କର୍ମସଂସ୍ଥାନ ଆବଶ୍ୟକତା ଦୃଷ୍ଟିରୁ ଏଭଳି ସମନ୍ୱିତ ପଦକ୍ଷେପ ଜରୁରି । ତେବେ ଭୂମଣ୍ଡଳୀୟ ପରିବେଶର କ୍ଷତି ନକରି ଏହା କରାଯିବା ଦରକାର । ଅଭିନବ ପ୍ରଯୁକ୍ତି ଏବଂ ସେବା ବିକଶିତ କରିବା ଲାଗି ସେ ସିଫା ଏବଂ ଅନ୍ୟ ଅଂଶୀଦାରମାନଙ୍କୁ ପ୍ରଶଂସା କରିବା ସହିତ ଏହି ଜ୍ଞାନ ଚାଷୀଙ୍କ ନିକଟରେ ପହଁଚାଇବା ଉପରେ ଗୁରୁତ୍ୱାରୋପ କରିଥିଲେ । ମଧୁର ଓ ଲୁଣି ଜଳଜୀବ ଚାଷ ସଂଲଗ୍ନ ବୈଷୟିକ ଜ୍ଞାନଗୁଡିକ ସମ୍ପର୍କରେ ସାଧାରଣ ମତ୍ସ୍ୟଚାଷୀମାନଙ୍କୁ ତାଲିମ ମଧ୍ୟ ଦିଆଯିବା ଦରକାର । ରାଜ୍ୟର ବ୍ଲକସ୍ତରରେ ଘରୋଇ ଓ ସରକାରୀ ସହଭାଗୀତାରେ ଏଭଳି ତାଲିମ ପ୍ରତିଷ୍ଠାନମାନ ଖୋଲାଗଲେ ଜଳଜୀବ ଉତ୍ପାଦନ କ୍ଷେତ୍ରରେ ବୈପ୍ଳବିକ ପରିବର୍ତନ ଆସିବା ସହ ଏଥିରେ ସମ୍ପୃକ୍ତ ଚାଷୀମାନଙ୍କ ମାନଦଣ୍ଡରେ ମଧ୍ୟ ଉନ୍ନତି ଘଟିବ ବୋଲି ଶ୍ରୀ ଷଡ଼ଙ୍ଗୀ କହିଥିଲେ । ଆଇସିଏଆର-ସିଫାର ନିର୍ଦ୍ଦେଶକ ଡ. ବି ଆର ପିଲ୍ଲାଇ କାର୍ଯ୍ୟକ୍ରମରେ ଅଧ୍ୟକ୍ଷତା କରିବା ସହିତ ଅତିଥିମାନଙ୍କୁ ସ୍ୱାଗତ କରିଥିଲେ । ସେ ତାଙ୍କ ଅଭିଭାଷଣରେ କହିଥିଲେ ଯେ ଆଧୁନିକ ଜଳଜୀବ କୃଷିର ଜନକ ଭାବେ ପରିଚିତ ଡ. ଟି.ଭି.ଆର ପିଲ୍ଲେଙ୍କୁ ଶ୍ରଦ୍ଧାଞ୍ଜଳି ଦେବା ଉଦ୍ଦେଶ୍ୟରେ ପିଲ୍ଲେ ଜଳଜୀବ ପ୍ରତିଷ୍ଠାନ ଅଧିବେଶନ (ପାଫ) କଂଗ୍ରେସ ଅନୁଷ୍ଠିତ ହେଉଛି । କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଆଇସିଏଆରର ଉପ ମହାନିର୍ଦ୍ଦେଶକ ଡ. ଜେ କେ ଜେନା ଯୋଗ ଦେଇ କହିଥିଲେ ଯେ ଭବିଷ୍ୟତର ଜଳଜୀବ କୃଷି ଜ୍ଞାନ ଆଧାରିତ ହେବା ଆବଶ୍ୟକ । କାରଣ ଉତ୍ପାଦନ ବୃଦ୍ଧି ସହିତ ଦିନକୁ ଦିନ ନିରାପଦ ତଥା ଉନ୍ନତମାନର ଖାଦ୍ୟର ଚାହିଦା ବୃଦ୍ଧି ପାଉଛି । ପ୍ରତିଷ୍ଠାନର ଏବିଆଇ ସୁବିଧାକୁ ସିଫାର ପ୍ରତିଷ୍ଠାତା ଡ. ଭିଆରପି ସିହ୍ନାଙ୍କ ନାମରେ ନାମିତ କରିବା ଲାଗି ଏହି ଅବସରରେ ଡ. ଜେନା ଘୋଷଣା କରିଥିଲେ । ସମ୍ମାନିତ ଅତିଥି ଭାବେ ଯୋଗ ଦେଇଥିବା ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟର କୁଳପତି ଡ. ପବନ କୁମାର ଅଗ୍ରୱାଲ ତାଙ୍କ ଅଭିଭାଷଣରେ ଚାଷୀମାନଙ୍କୁ ନୀତିଗତ ସହାୟତା ଦେବା ଲାଗି ଆହ୍ୱାନ କରିଥିଲେ । କେନ୍ଦ୍ରରେ ନୂତନ ଭାବେ ମତ୍ସ୍ୟପାଳନ ମନ୍ତ୍ରଣାଳୟ ଗଠନ କରାଯାଇଥିବାରୁ ଏହା ଓଡ଼ିଶାରେ ମତ୍ସ୍ୟପାଳନ ଲାଗି ଜ୍ଞାନ ଓ ଗବେଷଣାର ବିକାଶ ଦିଗରେ ସହାୟକ ହେବ ବୋଲି ସେ ଆଶା ବ୍ୟକ୍ତ କରିଥିଲେ । ରାଜ୍ୟ ମତ୍ସ୍ୟ ଓ ପ୍ରାଣୀସମ୍ପଦ ସଚିବ ଆର ରଘୁପ୍ରସାଦ, ପିଏଏଫର ସଚିବ ଡ. ପି. କେଶବନାଥ, ଏଓଏର ସମ୍ପାଦକ ଡ. ପି. ରାଉତରାୟ ପ୍ରମୁଖ ଅତିଥି ଭାବେ ଯୋଗ ଦେଇ ଗୁରୁତ୍ୱପୂର୍ଣ୍ଣ ମତ ଉପସ୍ଥାପନ କରିଥିଲେ । ଶେଷରେ ପ୍ରମୁଖ ବୈଜ୍ଞାନିକ ତଥା ସହ ସମ୍ପାଦକ ଡ. ଏସ କେ ସ୍ୱାଇଁ ଧନ୍ୟବାଦ ଦେବା ସହିତ ତିନିଦିନିଆ ଅଧିବେଶନର ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ । ଏହି ଅବସରରେ ମଧୁର ଓ ଲୁଣି ଜଳଜୀବ ଚାଷ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ବିଭିନ୍ନ ବ୍ୟକ୍ତିବିଶେଷଙ୍କୁ କେନ୍ଦ୍ର ମନ୍ତ୍ରୀ ଶ୍ରୀ ଷଡ଼ଙ୍ଗୀ ସମ୍ବର୍ଦ୍ଧିତ କରିଥିଲେ । କେନ୍ଦ୍ରମନ୍ତ୍ରୀଙ୍କ ଦ୍ୱାରା ସିଫାର ସ୍ମରଣିକା ଓ ଅନ୍ୟାନ୍ୟ ପୁସ୍ତିକା ସହିତ ଦୁଇଟି ମୋବାଇଲ ଆପ ‘ଇଣ୍ଡ ଆକ୍ୱା’ ଓ ‘ଟ୍ରିଟ ମାଇ ଫିସ’ ହିନ୍ଦୀ, ଇଂରାଜୀ ଏବଂ ଓଡ଼ିଆ ଭାଷାରେ ଉନ୍ମୋଚନ କରାଯାଇଥିଲା । ସୂଚନାଯୋଗ୍ୟ ଯେ ଏହି କାର୍ଯ୍ୟକ୍ରମରେ ଜଳଜୀବ ଉତ୍ପାଦନ ମୂଲ୍ୟ ଶୃଙ୍ଖଳାରେ ନିୟୋଜିତ କର୍ପୋରେଟ ସଂସ୍ଥା, ଷ୍ଟାର୍ଟଅପ ଓ ଜଳଜୀବ ଉଦ୍ୟୋଗୀମାନେ ଯୋଗ ଦେଇଛନ୍ତି । ବିଭିନ୍ନ ଅଂଶୀଦାରଙ୍କ ମଧ୍ୟରେ ସମନ୍ୱୟ ଆଣିବା ଲାଗି ଆୟୋଜିତ ଏହି କାର୍ଯ୍ୟକ୍ରମରେ ବହୁଦେଶୀୟ ଉଦ୍ୟୋଗୀ, ଘରୋଇ ଉଦ୍ୟୋଗ, ଜଳଜୀବ ଉତ୍ପାଦନକାରୀ, ଗବେଷକ, ଘରୋଇ ସେବା ପ୍ରଦାନକାରୀ, ରାଜ୍ୟ ମତ୍ସ୍ୟପାଳନ ବିଭାଗ ଓ ଅନ୍ୟାନ୍ୟ ବିଭାଗ, ସ୍ୱେଚ୍ଛାସେବୀ ସଂସ୍ଥା ସମେତ ଏହି କ୍ଷେତ୍ର ସହ ଜଡ଼ିତ ଅନ୍ୟ ଜାତୀୟ ତଥା ଅନ୍ତର୍ଜାତୀୟ ପ୍ରତିଷ୍ଠାନର ୨୦୦ରୁ ଊର୍ଦ୍ଧ୍ୱ ପ୍ରତିନିଧି ଯୋଗ ଦେଇଛନ୍ତି । ଏହି ବଅସରରେ ଜଳଜୀବ କୃଷି ଉପରେ ଏକ ପ୍ରଦର୍ଶନୀ ଆୟୋଜନ କରାଯାଇଛି । ଏଥିରେ ପ୍ରତିନିଧିମାନଙ୍କ ଲାଭ ପାଇଁ ୩୦ ଜଣ ଅଂଶୀଦାର ସେମାନଙ୍କ କାର୍ଯ୍ୟ ଓ ସେବାର ପ୍ରଦର୍ଶନ କରୁଛନ୍ତି । “ବହୁ ରାଷ୍ଟ୍ରୀୟ କମ୍ପାନୀ, ଘରୋଇ ଉଦ୍ୟୋଗୀ ଓ ଜଳଜୀବ ଉତ୍ପାଦନକାରୀ ଚାଷୀଙ୍କ ସହଯୋଗରେ ଦେଶରେ ଜଳ ଜୀବ ଉତ୍ପାଦନ ବୃଦ୍ଧି” ସଂକ୍ରାନ୍ତ ଏହି ଅଧିବେଶନ ଆଜିଠାରୁ ଆରମ୍ଭ ହୋଇଥିବା ବେଳେ ଆସନ୍ତା ୧୭ ତାରିଖ ପର୍ଯ୍ୟନ୍ତ ଚାଲିବ ।