ଜଙ୍ଗଲ ସୃଷ୍ଟି ପାଇଁ ଅଣ୍ଟାଭିଡ଼ିଲେ ବନବାସୀ

ଭୁବନେଶ୍ୱର, : ବନୀକରଣ ପାଇଁ ନୂଆ ବାଟ । ଏହି ସହଜ ରାସ୍ତାଟିକୁ ଆପଣେଇଛନ୍ତି ଚନ୍ଦକା-ଡମପଡ଼ା ହସ୍ତୀ ଅଭୟାରଣ୍ୟ ପାଶ୍ୱର୍ରେ ଥିବା ଆଦିବାସୀପଲ୍ଲୀ କନ୍ଦଳେଇର ବନବାସୀ । ମାଟି ଓ ଗୋବର ଖତକୁ ଏକତ୍ରିତ ମିଶାଇ ଏହାକୁ ଗୋଲ୍ ଗୋଲ୍ ପେଣ୍ଡୁ ଆକୃତି କରି ତା’ ଭିତରେ ବିଭିନ୍ନ କିସମର ବିହନ ରଖି ପ୍ରସ୍ତୁତ କରିଛନ୍ତି ବିହନ ପେଣ୍ଡୁ (ସିଡ ବଲ୍) । ଏହି ବଲ୍ ଗୁଡ଼ିକୁ ଗାଁକୁ ଘେରି ରହିଥିବା ଚନ୍ଦକା ଜଙ୍ଗଲରେ ପକାଇ ଚାଲିଛନ୍ତି । ଏହି ସିଡ୍ବଲ୍ରେ କରଞ୍ଜ, ଜାମୁ, ନିମ, ପଣସ ଇତ୍ୟାଦିର ବିହନ ରହିଛି । ସୂଚନାଯୋଗ୍ୟ, ସାମୁଦ୍ରିକ ଝଡ଼ ‘ଫନି’ ଚାଲିଯାଇଛି ସତ କିନ୍ତୁ ପରିବେଶକୁ ନେଇ ସମସ୍ତ ଚିନ୍ତା ବଢ଼ାଇ ଦେଇଛି । ଛାଡ଼ିଦେଇଛି ସମସ୍ତଙ୍କ ପାଇଁ ଏକ ଆହ୍ୱାନ । ‘ଫନି’ ମାଡ଼ରେ ଚନ୍ଦକା ଜଙ୍ଗଲ ଓ ଅଭୟାରଣ୍ୟ ମଧ୍ୟରେ ବହୁ ମୂଲ୍ୟବାନ ଗଛ ଉପୁଡ଼ିଯାଇଛି । ଯାହାର ମୂଲ୍ୟ କୋଟି କୋଟି ଟଙ୍କା ମୂଲ୍ୟ ବୋଲି ସରକାରୀ ସ୍ତରରେ ଆକଳନ କରାଯାଇଛି । ଉଜୁଡ଼ିଯାଇଥିବା ସବୁଜିମାକୁ ଫେରାଇ ଆଣିବା ଲାଗି ସୁପର-୩୦ ଗ୍ରୀନ୍ ଓଡ଼ିଶା, ସଙ୍ଗଠନ ପକ୍ଷରୁ ବନବାସୀମାନଙ୍କୁ ନେଇ ଏକ ସିଡ୍ବଲ୍ ପ୍ରସ୍ତୁତିର କାର୍ଯ୍ୟକ୍ରମ ଗ୍ରାମରେ ଆୟୋଜନ କରାଯାଇଥିଲା । ସାମାଜିକ କର୍ମୀ ସୁଶାନ୍ତ ସାହୁଙ୍କ ତତ୍ତ୍ୱାବଧାନରେ ପ୍ରସ୍ତୁତ ସିଡ୍ବଲ୍ କାର୍ଯ୍ୟକ୍ରମରେ ସୁପର-୩୦ ଗ୍ରୀନ୍ ଓଡ଼ିଶାର ଆବାହକ ଧର୍ମେନ୍ଦ୍ର କର, ସୁଜିତ୍ କୁମାର ପ୍ରଧାନ, ଫ୍ରେଣ୍ଡସ୍ ଗ୍ରୁପ୍ର ଜ୍ଞାନରଂଜନ ପଣ୍ଡା, ସୁପର-୩୦ ଯାଜପୁର ଜିଲ୍ଲାର ଶ୍ରୀବତ୍ସ ବିଶ୍ୱାଳ, ସାମାଜିକ କର୍ମୀ ପ୍ରିୟବ୍ରତ ପଣ୍ଡା, ତ୍ରିଲୋଚନ ବେଉରା, ସ୍ଥାନୀୟ ସରକାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ପବିତ୍ର ମୋହନ ନାୟକ, ଶିକ୍ଷକ ସୁବାଷ ଓଝା, ବିଦ୍ୟାଳୟର ଚେୟାରମ୍ୟାନ ଶ୍ୟାମ ଗାଗରାଇ ଏବଂ ଗାଁ ମୁଖିଆ ମଦନ ଚାତାର ପ୍ରମୁଖ ଉପସ୍ଥିତ ରହି ପରିବେଶ ସୁରକ୍ଷା ସମ୍ପର୍କରେ ଗ୍ରାମବାସୀ ଓ ବିଦ୍ୟାର୍ଥୀମାନଙ୍କୁ ସଚେତନ କରାଇଥିଲେ ।