ଦର୍ଶକଙ୍କ ମନ ମୋହିଲା ଦିବ୍ୟାଙ୍ଗ କଳାକାରଙ୍କ ଭଜନ କାର୍ଯ୍ୟକ୍ରମ

ଆସିକା, (ଯୁଗାବ୍ଦ ନ୍ୟୁଜ):ଆସିକା ବ୍ଳକ ଅଧୀନସ୍ଥ କଲେଜଛକ ଅଞ୍ଚଳରେ କୋରାପୁଟ୍‍ ସ୍ଥିତ ବାଟମଙ୍ଗଳା ଛକ ସ୍ଥିତ ଶ୍ରୀହରଗୌରୀ ଦୃଷ୍ଟିହୀନ ଭଜନ ସମାରୋହର କଳାକାରମାନଙ୍କ ଦ୍ୱାରା ପରିବେଶିତ ହୋଇଥିବା ଭଜନ କାର୍ଯ୍ୟକ୍ରମ ଶହ ଶହ ଦର୍ଶକଙ୍କୁ ମନ ମୋହିଥିବା ଲକ୍ଷ୍ୟ କରାଯାଇଥିଲା । ଏହି କାର୍ଯ୍ୟକ୍ରମରେ ଜଗନ୍ନାଥ ସଂସ୍କୃତିପ୍ରେମୀ ବଂଶୀଧର ନାହାକ ଯୋଗଦେଇ ଭଜନ ପରିବେଶଣ କରିବାକୁ ଆସିଥିବା ଦିବ୍ୟାଙ୍ଗ କଳାକାରମାନଙ୍କୁ ଉତ୍ସାହିତ କରିଥିଲେ । ଦିବ୍ୟାଙ୍ଗ କଳାକାରମାନଙ୍କ କଣ୍ଠରୁ ଭଜନ ଶୁଣିବାକୁ ଦର୍ଶକଙ୍କ ଭିଡ ଜମିବା ସହ କଲେଜଛକ ଅଞ୍ଚଳରେ ଏକ ଭକ୍ତିମୟ ପରିବେଶ ସୃଷ୍ଟି ହୋଇଥିଲା । ଦିବ୍ୟାଙ୍ଗ କଳାକାରମାନେ ଉପସ୍ଥିତ ଶହ ଶହ ଦର୍ଶକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲେ । ଶ୍ରୀହରଗୌରୀ ଦୃଷ୍ଟିହୀନ ଭଜନ ସମାରୋହର ଦୃଷ୍ଟିବାଧିତ କଳାକାର ରାଜୀବ ଭୋଇ, ସୁଲୋଚନା କହଁର, ରବି ନାୟକ, ଆଶିଷ କୁମାର ଓଝା ପ୍ରମୁଖଙ୍କ ପ୍ରତିଟି ଗୀତରେ ଝୁମି ଉଠିଥିଲେ ଦର୍ଶକ । ଦିବ୍ୟାଙ୍ଗ କଳାକାରମାନଙ୍କ ସବୁ ଗୀତ ଥିଲା ବେଶ୍‍ ମନ ଛୁଆଁ । ଦୃଷ୍ଟିବାଧିତ କଳାକାରମାନେ ଗାଇଥିବା ଗୀତଗୁଡିକ ବେଶ୍‍ ମତଣିଆ ହେବା ସହ ଦର୍ଶକଙ୍କ ହୃôଦୟକୁ ବେଶ୍‍ ଛୁଇଁଥିଲା ବେଳେ ଦିବ୍ୟାଙ୍ଗ କଳାକାରମାନଙ୍କ ଲୁକ୍କାୟିତ ପ୍ରତିଭାକୁ ଲୋକଲୋଚନକୁ ଆଣିବା ଦିଗରେ ଏଭଳି କାର୍ଯ୍ୟକ୍ରମ ବିଶେଷ ସହାୟକ ହୋଇଥାଏ ବୋଲି ଜଗନ୍ନାଥ ସଂସ୍କୃତିପ୍ରେମୀ ବଂଶୀଧର ନାହାକ ସୂଚନା ଦେଇଛନ୍ତି । ଶ୍ରୀ ହରଗୌରୀ ଦୃଷ୍ଟିହୀନ ଭଜନ ସମାରୋହର ମୁଖ୍ୟ ପରିଚାଳକ ଶରତ ଚନ୍ଦ୍ର ବିଷୋୟୀଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଆସିକା କଲେଜଛକ ଅଞ୍ଚଳରେ ଅନୁଷ୍ଠିତ ଦିବ୍ୟାଙ୍ଗ ଭଜନ ସମାରୋହ କାର୍ଯ୍ୟକ୍ରମକୁ ସୁପରିଚାଳନା କରିବା ଦିଗରେ ସ୍ଥାନୀୟ ଅଂଚଳର ଯୁବପିଢୀ ସକ୍ରିୟ ସହଯୋଗ କରିଥିବା ଲକ୍ଷ୍ୟ କରାଯାଇଥିଲା ।