ଦାଦା ବଟି ଦାବି କରି ବାଲି ଗୁତାଦାରଙ୍କୁ ଆକ୍ରମଣ ସହ ହତ୍ୟା ଧମକ ଘଟଣା, ୫୦ ଜଣଙ୍କ ନାମରେ ମାମଲା ରୁଜୁ, ୧୦ ଗିରଫ
ହିଞ୍ଜିଳିକାଟୁ, (ସୁଧାନିଧି ଚୌଧୁରୀ): ଗଞ୍ଜାମ ଜିଲ୍ଲା ଶେରଗଡ ତହସିଲ ତଥା ଆସିକା ଥାନା ପାକିଡି ଋଷିକୂଲ୍ୟା ନଦୀ ବାଲିଘାଟ ଗୁତାଦାରଙ୍କୁ ମାସିକିଆ ଦାଦାବଟି ମାଗିବା ସହ ସଂଘବଦ୍ଧ ଭାବେ ଆକ୍ରମଣ କରିବା ଏବଂ ଦାଦାବଟି ନଦେଲେ ହତ୍ୟା ଧମକ ଦେବା ଭଳି ସଙ୍ଗୀନ ଅଭିଯୋଗ ହୋଇଥିଲା । ବାଲିଘାଟ ଗୁତାଦାର ସୁଧାନିଧି ଚୌଧୁରି ଘଟଣା ନେଇ ଆସିକା ଥାନାରେ ଅଭିଯୋଗ କରିଥିଲେ । ଅଭିଯୋଗ ଭିତ୍ତିରେ ଆସିକା ଥାନାରେ ୨୯୯/୨୪ ରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଚଳାଇଥିଲା । ବୁଧବାର ଘଟଣାରେ ସଂଶ୍ଲିଷ୍ଟ ୫୦ ଜଣଙ୍କ ନାମରେ ମାମଲା ରୁଜୁ କରିବା ସହ ୧୦ ଜଣଙ୍କୁ ଗିରଫ କରିଛି । ଗିରଫ ମାନେ ହେଲେ ଆସିକା ଥାନା ପାକିଡି ଗ୍ରାମର ହରିଷ ଖଟେଇ, ମାଧବ ସ୍ବାଇଁ, ସମ୍ପଦ ନାହାକ, ସୁଶାନ୍ତ ସ୍ବାଇଁ, ଅଶ୍ବିନୀ ସ୍ବାଇଁ, ବିକାଶ ମଳିକ, ପିଣ୍ଟୁ ସ୍ବାଇଁ, ସନ୍ୟାସି ସ୍ବାଇଁ, ଶୁକ୍ରାଚାର୍ଯ୍ୟ ସ୍ବାଇଁ ଓ ଦୁଃଖି ଶ୍ୟାମ ସ୍ବାଇଁ। ଗିରଫ ସମସ୍ତଙ୍କୁ ବୁଧବାର କୋର୍ଟ ଚାଲାଣ କରାଯାଇଥିବା ଥାନା ଭାରପ୍ରାପ୍ତ ଅଧିକାରୀ ରାଜେନ୍ଦ୍ର କୁମାର ପଟ୍ଟନାୟକଙ୍କ ସୂତ୍ରରୁ ପ୍ରକାଶ ।
ପ୍ରକାଶ ଯେ, ସୋମବାର ସକାଳେ ଆସିକା ଥାନା ପାକିଡି ଋଷିକୂଲ୍ୟା ନଦୀ ବାଲିଘାଟରୁ ବାଲି ଉତ୍ତୋଳନ କରାଯାଉଥିଲା । ଏହି ସମୟରେ ହିଞ୍ଜିଳି ଥାନା ପିତଳ ଗ୍ରାମ ପଞ୍ଚାୟତର ସରପଞ୍ଚ ରାମ ରାଘବ ପାତ୍ରଙ୍କ ପ୍ରରୋଚନାରେ ପାକିଡି ଗ୍ରାମର ୩୦ରୁ ଉର୍ଦ୍ଧ୍ୱ ଯୁବକ ବାଲିଘାଟ ନିକଟରେ ପହଞ୍ଚି ହିଟାଚି ଚାଳକ ସୁନିଳ ଗୌଡଙ୍କୁ ସଂପୃକ୍ତ ନଦୀରୁ ବାଲି ଉତ୍ତୋଳନ କରିବାକୁ ମନା କରିବା ସହ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ । ପରେ କିଛି ଯୁବକ ସୁନିଲଙ୍କ ମୋବାଇଲ ଛଡାଇ ନେବା ସହ ତାଙ୍କୁ ମାଡ ମାରିଥିଲେ । ପୁର୍ନବାର ମଙ୍ଗଳବାର ସନ୍ଧ୍ୟାରେ ଗ୍ରାମର ୫୦ ରୁ ଉର୍ଦ୍ଧ୍ୱ ଲୋକ ବାଲିଘାଟ ନିକଟରେ ପହଞ୍ଚି ହିଟାଚି ଡ୍ରାଇଭର ସମେତ ଉପସ୍ଥିତ ଥିବା କିଛି କର୍ମଚାରୀଙ୍କୁ ମାଡ ସାରିଥିଲେ । ପରେ ବାଲିଘାଟ ନିକଟରେ ଥିବା ୨ଟି ହିଟାଚିକୁ ପଥର ମାରି ଭଙ୍ଗାରୁଜା କରିବା ସହ ସିସିଟିଭି କ୍ୟାମେରା ଭାଙ୍ଗିଥିଲେ । ପରେ ଲେବର ରେଷ୍ଟ ରୁମ କବାଟ ଭାଙ୍ଗି ଘର ଭିତରେ ଥିବା ସିସିଟିଭି ହାର୍ଡ ଡିସ୍କ, ମନିଟର, ଗ୍ୟାସ୍ ସିଲିଣ୍ଡର୍, କୋଡି, ଶାବଳ ଓ ୧୦ ହଜାର ୫ଶହ ଟଙ୍କା ଚୋରି କରି ନେଇ ଯାଇଥିଲେ । ଘଟଣା ନେଇ ଗୁତାଦାର ସୁଧାନିଧି ଚୌଧୁରୀ ଆସିକା ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇ ଆସିକା ପୁଲିସ ଘଟଣାର ତଦନ୍ତ ପାଇଁ ପାକିଡି ଗ୍ରାମରେ ପହଞ୍ଚିଥିଲା। ଗ୍ରାମର କିଛି ଲୋକ ପୁଲିସକୁ ର୍ଦୁବ୍ୟବହାର କରିଥିଲେ । ପରେ ଗ୍ରାମର ୫୦ ରୁ ଉର୍ଦ୍ଧ୍ୱ ଲୋକ ଆସିକା ଥାନାରେ ପହଞ୍ଚି ଥାନା ସମ୍ମୁଖରେ ଧାରଣା ଦେଇଥିଲେ। ଲିଜ ନଥାଇ ସୁଧାନିଧି ବାଲି ଚୋରାଚାଲାଣ କରୁଥିବା ଏବଂ ଗିରଫ ଯୁବକଙ୍କୁ ଛାଡିବା ଦାବିରେ ବୁଧବାର ସକାଳୁ ସନ୍ଧ୍ୟା ପର୍ଯ୍ୟନ୍ତ ଥାନା ସମ୍ମୁଖରେ ଧାରଣା ଦେଇଥିଲେ। ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଆସିକା ଥାନା ଆଇଆଇସିଙ୍କ ସମେତ କୋଟିନଡା ଥାନା ଆଇଆଇସି କୃଷ୍ଣଚନ୍ଦ୍ର ସାହା, ବଡଗଡ ଥାନା ଆଇଆଇସି ସନ୍ଧ୍ୟାରାଣୀ ସିଂ,ହିଞ୍ଜିଳି ଥାନା ଆଇଆଇସି ଶ୍ରୀନିବାସ ସେଠି, ବେଲଗାଁ ଥାନା ଆଇଆଇସି ସ୍ମିତାଞ୍ଜଳି ପ୍ରଧାନ ଓ ୨ ପ୍ଳାଟୁନ ପୁଲିସ ଫୋର୍ସ ମୃତୟନ ରହିଥିଲେ । ପ୍ରକାଶ ଥାଉକି, ପିତଳ ସରପଞ୍ଚ ରାମ ରାଘବ, ବାଲିଘାଟ ଗୁତାଦାର ସୁଧାନିଧି ଚୌଧୁରୀଙ୍କୁ ମାସିକ ୨ ଲକ୍ଷ ଟଙ୍କା ସହ ପ୍ରତ୍ୟେକ ବାଲି ବୋଝେଇ ଗାଡି ପିଛା ୧ ହଜାର ଟଙ୍କା ଦାଦାବଟି ଦେବାକୁ ଦାବି କରିବା ସହ ବିଭିନ୍ନ ସମୟରେ ଧମକ ଦେଇ ଆସୁଥିଲେ ବୋଲି ଗୁତାଦାର ଅଭିଯୋଗ କରିଛନ୍ତି। ଅନ୍ୟପକ୍ଷରେ ସରପଞ୍ଚଙ୍କ ପ୍ରରୋଚନାରେ ପାକିଡି ଗ୍ରାମର କିଛି ଯୁବକ ଏଭଳି କାଣ୍ଡ କରିଥିବା ବେଳେ ଗିରଫ ଯୁବକଙ୍କୁ ଜାମିନ ପାଇଁ ସଂପୃକ୍ତ ସରପଞ୍ଚ କୌଣସି ପଦକ୍ଷେପ ଗ୍ରହଣ କରୁନଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି। ଆଗାମୀ ଦିନରେ ସାଧାରଣ ନିର୍ବାଚନ ହେବାକୁ ଥିବା ବେଳେ ସରପଞ୍ଚଙ୍କ ଏଭଳି କାଣ୍ଡ ଆଗାମୀ ଦିନରେ ଅପ୍ରିତୀକର ପରିସ୍ଥିତି ସୃଷ୍ଟି ହେବା ଆଶଙ୍କା ରହିଛି ।
