ଦୁଇ ବାଇକ ମୁହାଁମୁହିଁ ଧକ୍କା : ଜଣେ ମୃତ, ତିନି ଗୁରୁତର 

ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା)  :-ଗଜପତି ଜିଲ୍ଲା ନୂଆଗଡ ବ୍ଲକ  ଠାରୁ କେରେଡାଙ୍ଗ ଯିବା ମୁଖ୍ୟ ରାସ୍ତାରେ ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଜଣଙ୍କ ମୃତ୍ୟୁ ଘଟିଥିବା ବେଳେ  ତିନି ଜଣ ଗୁରୁତର ହୋଇଥିବା ଜଣାପଡିଛି । ମୃତକ ଜଣଙ୍କ ହେଲେ କେରଡାଙ୍ଗ ପଞ୍ଚାୟତ ଡାଗୁଡୁପୁର ଗ୍ରାମର ମିନିଏଲ ଦଳବେହେରା । ଗୁରୁତର ମାନେ ହେଲେ ସେହି ଗ୍ରାମର ମିନସୀ ଦଳବେହେରା ଓ ସାଇବ ଦଳବେହେରା ।ଅନ୍ୟ ଜଣେ ହେଲେ କେରଡାଙ୍ଗ ଗ୍ରାମର ସାମୁଏଲ୍ ପରିଛା ବୋଲି ଜଣାପଡିଛି । ସୂଚନା ମୁତାବକ ଆଜି ନୂଆଗଡ ଠାରେ ସାପ୍ତାହିକ ହାଟ ହେଉଥିବାରୁ କେରେଡାଙ୍ଗ ପଞ୍ଚାୟତ  ଡାଗୁଡ଼ୁପୁର ଗ୍ରାମର  ମିନିଏଲ ଦଳବେହେରା(୨୩)  ମୀନସି ଦଳବେହେରା (୨୩) ଏବଂ ସାଇବ ଦଳବେହେରା (୩୩)କୌଣସି କାମରେ ସିଡି ଡିଲକ୍ସ  ଓଡି ୨୦ଏ ୩୨୪୪ ଯୋଗେ ନୂଆଗଡରୁ ନିଜ ଗ୍ରାମ ଅଭିମୁଖେ ଯାଉଥିଲେ | ବିପରିତ ପଟରୁ  କେରେଡାଙ୍ଗ ଗ୍ରାମର ସାମୁଏଲ ପରିଛା(୩୫)  ସିଡି ଡିଲକ୍ସ ବାଇକ୍ ଯୋଗେ ନୂଆଗଡ ଗ୍ରାମକୁ କୌଣସି କାମ ରେ ଆସୁଥିଲେ | ତେବେ ଭାରସାମ୍ୟ ହରାଇ ଦୁଇ ବାଇକ ମୁହାଁମୁହିଁ ଧକ୍କା ହୋଇଥିଲା । ଫଳରେ ଦୂର୍ଘଟଣାରେ ମିନିଏଲ ମୁଣ୍ଡରେ ଜୋର ଆଘାତ ହୋଇ ରକ୍ତ ଜୁଡୁବୁଡୁ ଅବସ୍ଥା ରେ ପଡିରହିଥିଲେ | ତେବେ ଅଗ୍ନିଶମ ବିଭାଗ କୌଣସି ସୂତ୍ରରୁ ଖବର ପାଇ ସମସ୍ତ ଗୁରୁତରଙ୍କୁ ଖଜୁରୀପଦା ସ୍ୱାସ୍ଥ୍ୟ କେନ୍ଦ୍ରକୁ ଆଣି ଭର୍ତ୍ତି କରିଥିଲେ । ହେଲେ ଚିକିତ୍ସାଧିନ ଅବସ୍ଥାରେ ଡାକ୍ତର ଖାନାରେ ମିନିଏଲଙ୍କ ମୃତ୍ୟୁ ଘଟିଯାଇଛି  | ଡାକ୍ତର ଅନ୍ୟ ଗୁରୁତରମାନଙ୍କୁ  ପ୍ରାଥମିକ ଚିକିତ୍ସା କରିବା ପରେ ଆମ୍ବୁଲାନ୍ସ ଯୋଗେ  ଜିଲ୍ଲା ଜିଲ୍ଲା ସଦର ମହକୁମା ପାରଳାଖେମୁଣ୍ଡି ଠାରେ ଥିବା ଜିଲ୍ଲାମୁଖ୍ୟ  ଚିକିତ୍ସାଳୟକୁ ପଠାଇଛନ୍ତି | ଖବର ପାଇ ଖଜୁରୀପଦା ଫାଣ୍ଡି ଅଧିକାରୀ ଘଟଣା ସ୍ଥଳରେ ପହଞ୍ଚି ଦୁର୍ଘଟଣା ଗ୍ରସ୍ଥ ଦୁଇ ଗାଡିକୁ ଜବତ କରି ୪୯/୨୨ରେ ମାମଲା ରୁଜ୍ଜୁ କରି ଶବ ବ୍ୟବଛେଦ ପାଇଁ ଜିଲ୍ଲା ଚିକିତ୍ସାଳୟକୁ ପଠାଇଥିବା ଫାଣ୍ଡି ପକ୍ଷରୁ ସୂଚନା ମିଳିଛି  ।