ଧାନଟ୍ରକ ନେଇ ଡ୍ରାଇଭର ଫେରାର

ହାଟଡ଼ିହି :ବ୍ଲକ ଶାଳଣିଆଁ ଅଞ୍ଚଳରୁ ଏକ ଧାନ ବୋଝେଇ ଟ୍ରକକୁ ନେଇ ଡ୍ରାଇଭର ଫେରାର ହୋଇଯାଇ ଥିବା ନନ୍ଦିପଦା ଥାନାରେ ଅଭିଯୋଗ ହୋଇଛି। ଅଭିଯୋଗରୁ ଜଣାଯାଇଛି ଯେ ଶାଳଣିଆଁର ବିଦ୍ୟାଧର ବେହେରା ନାମକ ଜଣେ ବ୍ୟକ୍ତି ଗତ ୧୧ତାରିଖ ରାତି୧୨ଟାରେ ଓଡି୨୨-୨୧୧୩ ନଂ ବିଶିଷ୍ଟ ଟ୍ରକରେ ୧୨୦ବସ୍ତା ଧାନ ଲୋଡକରି ପାଣିକୋଇଲି ସ୍ଥିତ ଆଶିର୍ବାଦ ରାଇସ ମିଲକୁ ପଠାଇଥିଲେ । ପଞ୍ଚୁପୁଲି ଗ୍ରାମର ବୀର ଜେନା ନାମକ ଡ୍ରାଇଭର ଜଣକ ଟ୍ରକ ନେଇ ଯାଇଥିଲା । କିନ୍ତୁ ୧୨ତାରିଖ ସନ୍ଧ୍ୟା ସୁଧା ମିଲରେ ନପହଞ୍ଚିବାରୁ ବିଦ୍ୟାଧର ତାର ଫୋନକୁ କଲ କରିବାରୁ ତାହା ସୁଇଜ ଅଫ ଥିଲା । ଫଳରେ ବିଦ୍ୟାଧର ବ୍ୟସ୍ତ ବିବ୍ରତ ହୋଇ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ । ମାତ୍ର ସନ୍ଧାନ ନମିଳିବାରୁ ସେ ନନ୍ଦିପଦା ଥାନାରେ ଅଭିଯୋଗ କରିଥିଲେ । ଆଜି ସକାଳୁ ଟ୍ରକଟି ଶାଳଣିଆଁ ଗାଁ ଠାରୁ କିଛି ଦୁରରେ କେନାଲ ନିକଟରେ ଠିଆ ହୋଇଥିବାବେଳେ ଚାଳକର ସନ୍ଧାନ ମିଳିପାରିନି । ଏଥିରେ ଥିବା ୧୨୦ବସ୍ତା ଧାନ ର ମଧ୍ୟ କୌଣସି ସନ୍ଧାନ ନାହିଁ । ଆଜି ନନ୍ଦିପଦା ପୁଲିସ ଡ୍ରାଇଭରକୁ ଠାବ କରିବାପାଇଁ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ ସନ୍ଧାନ ମିଳି ପାରି ନଥିବା ଜଣାଯାଇଛି । ଚାଳକ କୁଆଡେ ଗଲା ଓ ଧାନକୁ କଣ କଲା ତାହାକୁ ନେଇ ପୁଲିସ ତଦନ୍ତ ଜାରି ରଖିଛି । ଧାନର ଆନୁମାନିକ ମୁଳ୍ୟ ଲକ୍ଷେଟଙ୍କା ହେବ ବୋଲି ବିଦ୍ୟାଧର କହିଛନ୍ତି ।