ନକ୍ସଲ ଦ୍ଵାରା ବିଛା ଯାଇଥିବା ଆଇଡି ବିସ୍ଫୋରଣରେ ଜଣେ ମୃତ୍ୟୁ

ମାଲକାନଗିରି,(ଡ଼ଃ ଶିବ ନାରାୟଣ ପାତ୍ର):ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର ନାରାୟଣପୁର ଜିଲ୍ଲାର କାନାଗାଓଁ ଗ୍ରାମରେ ଆଇଡି ବୋମା ବିସ୍ଫୋରଣରେ ଜଣେ ମୃତ୍ୟୁ ବରଣ କରିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ସୂଚନା ଅନୁଯାୟୀ କିଛି ଗ୍ରାମବାସୀ ଝାଡୁ ଗଛ ତୋଳିବା ପାଇଁ ମାରକୁର ଜଙ୍ଗଲକୁ ଯାଇଥିଲେ। ସେମାନେ ଝାଡୁ ତୋଳୁଥିଲେ, ହଠାତ୍ ନକ୍ସଲମାନଙ୍କ ଦ୍ୱାରା ପୂର୍ବରୁ ବିଛାଯାଇଥିବା ଏକ ଆଇଡି ବୋମା ବିସ୍ଫୋରଣ ହୋଇଥିଲା। ଏଥିରେ ରାଜେଶ ଉସେଣ୍ଡି ନାମକ ବ୍ୟକ୍ତିଙ୍କ ଦୁଇ ଗୋଡରେ ଗୁରୁତର ଆଘାତ ଯୋଗୁଁ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଆଉ ଜଣେ ଗ୍ରାମବାସୀ ରାମଲାଲ କୋରମ୍ ଆହତ ଏଥିରେ ଗୁରୁତର ହୋଇଛନ୍ତି ଏବଂ ତାଙ୍କ ବେକ ଏବଂ ପାଟିରେ ଆଘାତ ଲାଗିଛି। ତାଙ୍କୁ ଚିକିତ୍ସା ପାଇଁ ନାରାୟଣପୁର ଡାକ୍ତରଖାନାକୁ ଅଣାଯାଇଛି। ଅଞ୍ଚଳରେ ପୋଲିସ ପହଁଚି ତଲାସୀ ଅଭିଯାନ ଜୋରଦାର କରିଥିବା ଜଣାପଡ଼ିଛି।