ନବଜ୍ୟୋତିଙ୍କ ବିଭିନ୍ନ ବାତ୍ୟା ପ୍ରଭାବିତ ଅଂଚଳ ଗସ୍ତ

ବାଲେଶ୍ୱର : ସାମୁଦ୍ରିକ ଝଡ଼ବାତ୍ୟା ‘ଫନି’ ପ୍ରଭାବରେ ବାଲେଶ୍ୱର ଜିଲ୍ଲା ବିଭିନ୍ନ ବ୍ଲକରେ ବ୍ୟାପକ କ୍ଷୟକ୍ଷତି ହୋଇଥିବା ବେଳେ କଂଗ୍ରେସ ନେତା ତଥା ଲୋକସଭା ନିର୍ବାଚନ ମଣ୍ଡଳୀର ପ୍ରାର୍ଥୀ ନବଜ୍ୟୋତି ପଟ୍ଟନାୟକ ରବିବାର ଜିଲ୍ଲାର ବିଭିନ୍ନ ବାତ୍ୟା ପ୍ରପୀଡ଼ିତ ଅଂଚଳ ଗସ୍ତ କରିଥିଲେ । ପ୍ରଥମେ ବାହାନଗା ବ୍ଲକର ପଥରପେଣ୍ଠ ପଂ·ୟତରେ ଥିବା ସ୍ୱର୍ଗତ ରାକେଶ ବେହେରା (୧୪)ଙ୍କ ଘରକୁ ଯାଇ ତାଙ୍କର ଶୋକ ସନ୍ତପ୍ତ ପରିବାରକୁ ଆଶ୍ୱାସନା ଦେଇଥିଲେ । ଗତ ୩ ତାରିଖରେ ରାକେଶ ପୁରୀ ଶ୍ରୀମନ୍ଦିର ସମ୍ମୁଖରେ ତୁଳସୀମାଳି ବିକ୍ରି କରୁଥିବାବେଳେ ଝଡ଼ବାତ୍ୟା ଯୋଗୁଁ ରାକେଶ ଏକ ଘର ନିକଟରେ ଛିଡ଼ା ହୋଇଥିବା ବେଳେ କାନ୍ଥ ପଡ଼ି ତାଙ୍କର ମୃତ୍ୟୁ ଘଟିଥିଲା । ପଟ୍ଟନାୟକ ତାଙ୍କ ପିତାମାତାଙ୍କୁ ସାକ୍ଷାତ କରି ଆଶ୍ୱାସନାଦେଇଥିଲେ । ଏହା ସହିତ ପଟ୍ଟନାୟକ ରବିବାର ଜଳେଶ୍ୱର ଏନ୍ଏସି ଅନ୍ତର୍ଗତ ଶାନ୍ତିଆ ଏବଂ ଆରୁହାବୃତିର ୧୧, ୧୨ ଏବଂ୧୩ ନମ୍ବର ୱାର୍ଡ଼ ପରିଦର୍ଶନ କରି କ୍ଷୟକ୍ଷତିର ଆକଳନ କରିଥିଲେ । ତାଙ୍କ ସହ ଜିଲ୍ଲା କଂଗ୍ରେସ ସଭାପତି ଶରତ ରାଜ, ଜଳେଶ୍ୱର ଆସନର କଂଗ୍ରେସ ପ୍ରାର୍ଥୀ ସୁଦର୍ଶନ ଦାସ, ଜିଲ୍ଲା କଂଗ୍ରେସ କମିଟିର କାର୍ଯ୍ୟକାରୀ ସଭାପତି ତପନ ଦାସ ଏବଂ ଆଇନଜୀବୀ ସତ୍ୟ ଦାସ ପ୍ରମୁଖ ଉପସ୍ଥିତ ଥିଲେ ।