ନିଳୋକ ହାଇସ୍କୁଲର ଅବସରପ୍ରାପ୍ତ ପିଅନଙ୍କ ପରଲୋକ

ବନ୍ତ, (ଚାନ୍ଦିନୀ ମହାନ୍ତି):ବନ୍ତ ବ୍ଲକ ନିଳୋକ ହାଇସ୍କୁଲର ଅବସରପ୍ରାପ୍ତ ପିଅନ ଶ୍ରୀଧର ବିଶ୍ୱାଳ(୭୧)ଙ୍କର ଗୁରବାର ରାତି ସାଢେ ୧୦ଟା ବେଳେ ପରଲୋକ ଘଟିଛି । ଗତ କିଛି ମାସ ହେବ ସେ ବାର୍ଦ୍ଧକ୍ୟଜନିତ ରୋଗରେ ପିଡିତ ଥାଇ ଚିକିତ୍ସାଧିନ ଥିଲେ । ମୃତ୍ୟୁ ନିକଟରେ ପୁଅ, ବୋହୁ, ଝିଅଜ୍ୱାଇଁ, ନାତିନାତୁଣୀଙ୍କ ସମେତ ଆତ୍ମୀୟସ୍ୱଜନ ଉପସ୍ଥିତ ଥିଲେ । ଖବର ପାଇ ହାଇସ୍କୁଲର ଅବସରପ୍ରାପ୍ତ କିରାଣୀ ସନାତନ ନାୟକ, ଅନିରୁଦ୍ଧ ନାୟକଙ୍କ ସମେତ ଆତ୍ମୀୟସ୍ୱଜନ ମାନେ ବାସଭବନରେ ପହଞ୍ôଚ ଶେଷ ଦର୍ଶନ କରିଥିଲେ । ସାନପୁଅ ନିରଞ୍ଜନ ମୁଖାଗ୍ନି ଦେଇଥିଲେ । ୧୯୭୮ ମସିହାରେ ସେ ନିଳୋକ ହାଇସ୍କୁଲରେ ପିଅନ ଭାବେ ନିଯୁକ୍ତି ପାଇ ୨୦୧୧ ମସିହାରେ ଅବସର ଗ୍ରହଣ କରିଥିଲେ । ହାଇସ୍କୁଲ ପ୍ରତିଷ୍ଠା ସମୟରେ ତାଙ୍କର ଅବଦାନ ଅତୁଳନୀୟ ଥିଲା । ସେ ମା’ବଉଳାଶୁଣୀଙ୍କ ପୀଠରେ ପୂଜା ଓ ଯାତ୍ରା ଅନୁଷ୍ଠାନ ସହିତ ଦୀର୍ଘ ବର୍ଷ ଧରି ଜଡିତ ରହିଆସିଥିଲେ । ଏଥିସହ ସେ ନିଜ ଉଦ୍ୟମରେ ଦୀର୍ଘ ୨୫ ବର୍ଷ ଧରି ଦୁର୍ଗା ପୂଜା ଅନୁଷ୍ଠାନ କରିଆସୁଥିଲେ । ସେ ଜଣେ ପରୋପକାରୀ, ଧର୍ମପରାୟଣ ବ୍ୟକ୍ତି ଥିଲେ । ତାଙ୍କ ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି ।