ନେତାଜୀ ସାରସ୍ବତ ମଞ୍ଚର ପକ୍ଷରୁ ଭ୍ରାମ୍ୟମାଣ ସାହିତ୍ୟ ଆସର

ବ୍ରହ୍ମପୁର,(ଅନିଲ କୁମାର) : ସାହିତ୍ୟାନୁଷ୍ଠାନ ନେତାଜୀ ସାରସ୍ୱତ ମଞ୍ଚର ଭାମ୍ୟମାଣ ସାହିତ୍ୟ ଆସର ରେଳ ଷ୍ଟେସନ୍ ରୋଡ୍ ସ୍ଥିତ ନେହେରୁ ପାର୍କରେ ଅନୁଷ୍ଠିତ ହୋଇଯାଇଛି l ମଞ୍ଚର ସଭାପତି ଗାଳ୍ପିକ ଶରତ କୁମାର ଦାସ ଏହି ଆସରରେ ପୌରୋହିତ୍ୟ କରିଥିଲେ l ଯୁଗ୍ମ ସଂପାଦକ ନଳିନୀକାନ୍ତ ଗୌଡ଼ ପ୍ରାରମ୍ଭିକ ସୂଚନା ପ୍ରଦାନ କରିଥିଲେ l କବୟିତ୍ରୀ ପଦ୍ମିନୀ ମିଶ୍ର ଏହି ଆସରର ସଂଯୋଜନା କରିଥିଲେ ଜୁଲାଇ ମାସର ଏହି ଆସରରେ ଶ୍ରୀମତୀ ସ୍ବର୍ଣ୍ଣମୟୀ ପାଢ଼ୀ, ଶ୍ରୀମତୀ ଜ୍ୟୋତ୍ସ୍ନାରାଣୀ ଦେବୀ, ଶରତ କୁମାର ଦାସ ପ୍ରମୁଖ କ୍ଷୁଦ୍ରଗଳ୍ପ ପାଠ କରିଥିବା ବେଳେ ପଦ୍ମିନୀ ମିଶ୍ର ଲଳିତ ନିବନ୍ଧ ଓ ନଳିନୀକାନ୍ତ ଗୌଡ଼, ପ୍ରଭାତ କୁମାର ସାହୁ, ଡ. କୁଳମଣି ଓଝାଙ୍କ ସମେତ ବହୁ କବି ସ୍ୱରଚିତ କବିତା ଆବୃତ୍ତି କରିଥିଲେ l ସାରସ୍ୱତ ମଞ୍ଚର ଉପଦେଷ୍ଟା ଡ. କୁଳମଣି ଓଝା ପଠିତ ଗଳ୍ପ ଓ କବିତାଗୁଡ଼ିକର ସମୀକ୍ଷା କରିଥିଲେ l ଦାରୁ ଦେବତା ଚତୁର୍ଦ୍ଧା ମୂରତିଙ୍କ ନବ ଦିନାତ୍ମକ ପବିତ୍ର ଘୋଷଯାତ୍ରା ଅବକାଶରେ ପ୍ରାରମ୍ଭରେ ଡ. କୁଳମଣି ଓଝା, ସ୍ବର୍ଣ୍ଣମୟୀ ପାଢ଼ୀ, ଜ୍ୟୋତ୍ସ୍ନାରାଣୀ ଦେବୀ ଓ ପଦ୍ମିନୀ ମିଶ୍ର ଶ୍ରୀଜଗନ୍ନାଥଙ୍କ କେତୋଟି ଭଜନ ପରିବେଷଣ କରିଥିଲେ l ଶେଷରେ ଶ୍ରୀମତୀ ସ୍ବର୍ଣ୍ଣମୟୀ ପାଢ଼ୀ ଆନୁଷ୍ଠାନିକ ଭାବେ ଧନ୍ୟବାଦ ଅର୍ପଣ କରିଥିଲେ l