ପାରଳା ପୌର ପରିଷଦର ଡମିଂୟାର୍ଡରେ ନିଆଁ; ଲୋକେ ଆତଙ୍କିତ
ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା):ଗଜପତି ଜିଲ୍ଲା ସଦରମହକୁମା ପାରଳାଖେମୁଣ୍ଡି ପୌରପରିଷଦ ୧ନମ୍ବର ୱାର୍ଡ ଅନ୍ତର୍ଗତ ଗ୍ରୀଡ୍ ରାସ୍ତାରେ ଥିବା ଡସିଂୟାର୍ଡରେ ନିଆଁ ଲାଗିଛି। ଏନେଇ ଅଞ୍ଚଳବାସୀ ଭୟଭୀତ ହୋଇପଡ଼ିଥିବା ବେଳେ ପରିବେଶ ଧୂଆଁମୟ ହୋଇପଡ଼ିଛି। ସୂଚନା ଯୋଗ୍ୟଯେ, ଏହି ଗ୍ରୀଡ ରାସ୍ତାରେ ବହୁ ପୂର୍ବରୁ ପୌରପରିଷଦର ଡମ୍ଫୟାର୍ଡ ରହିଛି। ହେଲେ କାଳକ୍ରମେ ଏହି ଅଞ୍ଚଳରେ ଘରବାରି ତଥା ଜନବସତି ସ୍ଥାପନ ହୋଇଛି। ଏହି ଡମ୍ଫୟାର୍ଡରେ ସମଗ୍ର ସହରର ଅଳିଆ ଆବର୍ଜନା ଜମା ହୋଇରହୁଛି। ଅଳିଆ ଆବର୍ଜନା ଅତ୍ୟାଧିକ ରହିଥିବା ଯୋଗୁଁ ଦୂରରୁ ଦେଖିଲେ ଏକ ଛୋଟିଆ ପାହାଡର ଭ୍ରମ ସୃଷ୍ଟି କରୁଛି । ଏହା ସହ ଗଦା ଗଦା ଅଳିଆ ଆବର୍ଜନା ଯୋଗୁଁ ସମଗ୍ର ଅଞ୍ଚଳ ଗନ୍ଧମୟ ପରିବେଶ ଉପୁଜୁଥିବା ବେଳେ ଲୋକେ ଅସ୍ବାସ୍ଥ୍ୟକର ପରିବେଶରେ ରହୁଛନ୍ତି I ଅଳିଆ ଆବର୍ଜନା ବିକ୍ଷିପ୍ତ ହୋଇ ରାସ୍ତା ମଧ୍ଯରେ ପଡ଼ିଥିବା ଯୋଗୁଁ ଅଞ୍ଚଳବାସୀ ଯାତାୟତରେ ନାନାଦି ଅସୁବିଧାର ସମ୍ମୁଖୀନ ହେଉଛନ୍ତି I ବୁଧବାର କେହି ଏହି ଅଳିଆଗଦାରେ ନିଆଁ ଲଗାଇ ଦେଇଥିବା ଯୋଗୁଁ ସନ୍ଧ୍ୟା ଠାରୁ ଏହାର ଧୂଆଁ ଉଠି ସହରର ପ୍ରାୟତଃ ଅଞ୍ଚଳବାସୀଙ୍କୁ ଅଣନିଶ୍ବାସ କରିଛି। ଏହି ଅଳିଆଗଦାରୁ ନିଆଁ କାଳେ ଘରକୁ ବ୍ୟାପିବା ଆଶଙ୍କା କରି ଲୋକେ ଭୟଭୀତ ହୋଇପଡ଼ିଛନ୍ତି।
