ପିତୃମାତୃ ହୀନ ଶିଶୁଙ୍କ ଦଶମ ପରୀକ୍ଷାରେ ଶତ ପ୍ରତିଶତ ସଫଳତା

ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା):ପ୍ରାକୃତିକ ଦୁର୍ବିପାକ ଏବଂ କୋଭିଡ଼ ମହାମାରୀ ସିନା ପିଲାମାନଙ୍କ ଠାରୁ ବାପା ଓ ମାଙ୍କୁ ନେଇଗଲା କିନ୍ତୁ ଜିଲ୍ଲାପାଳ ଲିଙ୍ଗରାଜ ପଣ୍ଡାଙ୍କ ନେତୃତ୍ବରେ ଜିଲ୍ଲା ପ୍ରଶାସନ କିନ୍ତୁ ପିଲାମାନଙ୍କୁ ବାପା ମାଁ ର ସ୍ନେହ, ମମତା, ଯତ୍ନ ଏବଂ ସୁରକ୍ଷାରେ ଏପରି ବାନ୍ଧି ରଖିଛି ଯେ ପିଲାମାନେ ଆଜି ପ୍ରକାଶ ପାଇଥିବା ଓଡ଼ିଶା ସରକାର ଦଶମ ଶ୍ରେଣୀ ପରୀକ୍ଷାରେ ଶତକଡ଼ା ୭୦ ରୁ ୯୦ ପ୍ରତିଶତ ମାର୍କ ରଖି କୃତକାର୍ଯ୍ୟ ହୋଇଛନ୍ତି । ତେଣୁ ଅତିରିକ୍ତ ଜିଲ୍ଲାପାଳ ବିରେନ୍ଦ୍ର କୁମାର ଦାସ ଆଜି ପ୍ରାଉଡ଼୍ ବାଳିକା ଶିଶୁ ଯତ୍ନ ଅନୁଷ୍ଠାନକୁ ଯାଇ ଏହି ଖୁସି ମୁହୁର୍ତ୍ତରେ ପିଲାମାନଙ୍କ ସହ କିଛି ସମୟ କଟାଇବା ସହ ମିଠା ଖୁଆଇ ପିଲାମାନଙ୍କୁ ଅଭିନନ୍ଦନ ଜଣାଇଥିଲେ । ଏହି ଅବସରରେ ଶ୍ରୀ ଦାସ ପିଲାମାନଙ୍କୁ ସମ୍ବର୍ଦ୍ଧିତ କରି କହିଥିଲେ ଯେ ପିଲାମାନେ ଆଗକୁ କିପରି ଆହୁରି ଭଲ କରିବେ ସେଥିପ୍ରତି ଧ୍ୟାନ ଦେବେ ଏବଂ ଜିଲ୍ଲା ପ୍ରଶାସନ ସେମାନଙ୍କ ପାଖରେ ପ୍ରତି ମୂହୁର୍ତ୍ତରେ ଛିଡ଼ା ହୋଇଥିବା କଥା କହି ଉତ୍ସାହିତ କରିଥିଲେ । ଯେଉଁ ଶିଶୁମାନେ ଆଜିର ଦିନରେ ଦଶମ ପରୀକ୍ଷାରେ ଭଲ କରିଛନ୍ତି ସେମାନେ ହେଉଛନ୍ତି ତିତିଲି ମହାବାତ୍ୟା ଏବଂ କୋଭିଡ଼ ମହାମାରୀ ରେ ନିଜର ପିତାମାତାଙ୍କୁ ହରାଇ ସରକାର ଏବଂ ଜିଲ୍ଲା ପ୍ରଶାସନର ସହଯୋଗରେ ରହିଆସୁଥିବା ଶିଶୁମାନେ । ଗଜପତି ଜିଲ୍ଲାର ପିତୃମାତୃ ହରାଇ ବିଭିନ୍ନ ଶିଶୁଯତ୍ନ ଅନୁଷ୍ଠାନ ମାନଙ୍କରେ ରହିଆସୁଥିବା ଶିଶୁ ମାନଙ୍କ ଭିତରୁ ୨୦ ଜଣ ଶିଶୁ ଦଶମ ଶ୍ରେଣୀ ବୋର୍ଡ଼ ପରୀକ୍ଷା ଦେଇଥିଲେ । ସେଥିମଧ୍ୟରୁ ସମସ୍ତ ଶିଶୁ କୃତକାର୍ଯ୍ୟ ହୋଇଥିଲାବେଳେ ଜଣେ ଶିଶୁ ଶତକଡ଼ା ୮୦ରୁ ଉର୍ଦ୍ଧ ମାର୍କ ରଖି ଏ-୨ ରେ ସ୍ଥାନ ପାଇଥିବା ବେଳେ ସେମାନଙ୍କ ଭିତରୁ ୧୦ ଜଣ ଶିଶୁ ଶତକଡ଼ା ୭୫ ରୁ ଉର୍ଦ୍ଧ୍ବ ମାର୍କ ରଖି ବି-୧ ରେ ସ୍ଥାନ ପାଇଛନ୍ତି । ଏ-୨ ଏବଂ ବି-୧ ସ୍ଥାନ ପାଇଥିବା ଶିଶୁ ମାନଙ୍କ ମଧ୍ୟରୁ ଜଣେ ତିତିଲି ମହାବାତ୍ୟାରେ ଅନାଥ ହୋଇଥିଲା ବେଳେ ଅନ୍ୟ ଦୁଇଜଣ କୋଭିଡ଼ ମହାମାରୀରେ ନିଜର ପିତା ମାତାଙ୍କୁ ହରାଇ ଜିଲ୍ଲା ପ୍ରଶାସନ ଏବଂ କିଛି ସ୍ବେଚ୍ଛାସେବୀ ଅନୁଷ୍ଠାନ ମାନଙ୍କ ସହାୟତାରେ ବଢ଼ିଚାଲିଛନ୍ତି । ପ୍ରକାଶ ଥାଉକି ଯେ କୋଭିଡ଼ ମହାମାରୀରେ କୋଭିଡ଼ ଯୋଗୁଁ ନିଜ ମାତା ପିତାଙ୍କୁ ହରାଇ ପିଏମ କେର ଫର ଚିଲ୍ଡ୍ରେନ ସ୍କୀମରେ ସ୍ଥାନ ପାଇଥିବା ୮ ଜଣ ଶିଶୁଙ୍କ ମଧ୍ୟରୁ ଜଣେ ଶିଶୁ ଶତକଡ଼ା ୯୩ ମାର୍କ ରଖି ଏ-୧ ରେ ସ୍ଥାନ ପାଇଛନ୍ତି । ଆଜି ଦିନରେ କୃତକାର୍ଯ୍ୟ ହୋଇଥିବା ୨୦ ଜଣଙ୍କ ମଧ୍ୟରୁ ୪ଜଣ ଶିଶୁ ଏସ୍.ଉରୁଡ଼ା ସ୍ଥିତ ବିବେକାନନ୍ଦ ରେସିଡ଼ନ୍ସିଆଲ୍ ସ୍କୁଲ, ଚାରି ଜଣ ଶିଶୁ ଆର୍.ସୀତାପୁର ସ୍ଥିତ ଶ୍ରୀଜଗନ୍ନାଥ ନିକେତନ, ଚାରି ଜଣ ଶିଶୁ ବି.ସୀତାପୁର ସ୍ଥିତ ପ୍ରାଉଡ଼ ଅନୁଷ୍ଠାନ, ତିନି ଜଣ ଶିଶିୁ ଗୁମ୍ମା ସ୍ଥିତ ନିସାନ ସାଲୋମ ଚିଲ୍ଡ୍ରେନ୍ ହୋମ୍, ଏବଂ ଅନ୍ୟ ପାଞ୍ଚଜଣ ମୋହନା ଶିଶୁଯତ୍ନ ଓ ସୁରକ୍ଷା ଅନୁଷ୍ଠାନ ଦ୍ବାରା ଜରାଉ ଠାରେ ଥିବା ଶିଶୁ ଡ଼େଷ୍ଟାର ହୋମ୍ ରହି ଆସୁଛନ୍ତି । ଆଗାମୀ ଦିନରେ ଶିଶୁମାନଙ୍କ ଉଚ୍ଚଶିକ୍ଷା ପାଇଁ ଶିଶୁମାନଙ୍କ ଇଚ୍ଛା ମୁତାବକ ଅନୁଷ୍ଠାନରେ ନାମ ଲେଖାଇ ସମସ୍ତ ସହଯୋଗ ଯୋଗାଇବା ପାଇଁ ଜିଲ୍ଲା ପ୍ରଶାସନ ପ୍ରତିଶ୍ରୁତି ଦେଇଛି । ଏହି ଅବସରରେ ପ୍ରାଉଡ଼୍ ଏବଂ ଶ୍ରୀ ଜଗନ୍ନାଥ ଶିଶୁ ଯତ୍ନ ଅନୁଷ୍ଠାନରେ ଖରାଛୁଟି ସମୟରେ ପିଲାମାନଙ୍କର ଅନ୍ତର୍ନହିତ ଗୁଣାବଳୀର ଅଭିବୃଦ୍ଧି ପାଇଁ ଅତିରିକ୍ତ ଜିଲ୍ଲାପାଳ କମ୍ପ୍ୟୁଟର ଶିକ୍ଷା ସହ ରଚନା ଲେଖିବା ଉପରେ ପ୍ରଶିକ୍ଷଣ କାର୍ଯ୍ୟକ୍ରମକୁ ପ୍ରଦୀପ ପ୍ରଜ୍ବଳନ କରି ଉଦଘାଟନ କରିଥିଲେ । ଏହି ପ୍ରଶିକ୍ଷଣ କାର୍ଯ୍ୟକ୍ରମ ଜିଲ୍ଲାରେ ଥିବା ପ୍ରତ୍ୟେକ ଶିଶୁ ଯତ୍ନ ଅନୁଷ୍ଠାନରେ ଆସନ୍ତା ଏକ ମାସ ପାଇଁ କାର୍ଯ୍ୟକାରୀ ହେବ ଯେଉଁଥିରେ କି ୭୫ ରୁ ଉର୍ଦ୍ଧ୍ବ ମାତୃପିତୃହୀନ ଶିଶୁ ଉପକୃତ ହେବେ।