ପୂର୍ବ ଭାରତ କବାଡ଼ି ପ୍ରତିଯୋଗିତାରେ ଖେଳିବେ ବାଲିପଦର ଡିଗ୍ରୀ କଲେଜ ଛାତ୍ର

ବୁଗୁଡା,(ଅନିଲ କୁମାର ମହାରଣା):ସର୍ବ ଭାରତୀୟ ପୂର୍ବ ଜୋନର ବିଶ୍ୱବିଦ୍ୟାଳୟ ସ୍ତରୀୟ ପୁରୁଷ ବିଭାଗ କବାଡ଼ି ପ୍ରତିଯୋଗିତାରେ ବ୍ରହ୍ମପୁର ବିଶ୍ୱବିଦ୍ୟାଳୟ ପକ୍ଷରୁ ଖେଳିବା ପାଇଁ ବାଲିପଦର ଆଞ୍ଚଳିକ ବିଜ୍ଞାନ ଡିଗ୍ରୀ ମହାବିଦ୍ୟାଳୟର +୩ ପ୍ରଥମ ବର୍ଷର ଛାତ୍ର ରୁଦ୍ର ପ୍ରତାପ ପ୍ରଧାନ ମନୋନୀତ ହୋଇଥିବା ଜଣାପଡିଛି। ନଭେମ୍ବର ୩ ତାରିଖ ଦିନ ବ୍ରହ୍ମପୁର ବିଶ୍ୱବିଦ୍ୟାଳୟ ପକ୍ଷରୁ ହୋଇଥିବା ଚୟନ କାର୍ଯ୍ୟକ୍ରମରେ ରୁଦ୍ର ପ୍ରତାପ ସଫଳ ହୋଇ କଲେଜ ପାଇଁ ଗୌରବ ଆଣିପାରିଛନ୍ତି। ପୂର୍ବ ଜୋନ କବାଡ଼ି ପ୍ରତିଯୋଗିତା ଆସନ୍ତା ନଭେମ୍ବର ୬ ତାରିଖ ଠାରୁ ୯ ତାରିଖ ପର୍ଯ୍ୟନ୍ତ ଉତ୍ତର ପ୍ରଦେଶର ପୂର୍ବାଞ୍ଚଳ ବିଶ୍ୱବିଦ୍ୟାଳୟ ଠାରେ ଅନୁଷ୍ଠିତ ହେବ। ଏହି ପ୍ରତିଯୋଗିତାରେ ପୂର୍ବ ଜୋନ ଅନ୍ତର୍ଗତ ବିଶ୍ୱବିଦ୍ୟାଳୟ ଗୁଡ଼ିକର ପୁରୁଷ କବାଡ଼ି ଟିମ ଯୋଗଦେବେ। କଲେଜର କ୍ରୀଡା ଶିକ୍ଷକ ଭଞ୍ଜ କିଶୋର ଗୌଡ଼ଙ୍କ ପ୍ରେରଣା ସହ ରୁଦ୍ର ପ୍ରତାପଙ୍କ ଉତ୍ତମ ଅଭ୍ୟାସ ଏବଂ ପ୍ରିନ୍ସପାଲ ଡକ୍ଟର ବିବେକାନନ୍ଦ ପଟ୍ଟନାୟକ ଓ କ୍ରୀଡା ସଂସଦ ଉପସଭାପତି ଏ.ଜିତେଶ ରାଓ ଦୋରାଙ୍କ ସହଯୋଗ ଯୋଗୁଁ ଏହା ସମ୍ଭବ ହୋଇପାରିଛି।