ପୂର୍ବ ଶତ୍ରୁତା କୁ କେନ୍ଦ୍ରକରି ପୁରୋହିତଙ୍କୁ ଘାତକ ଆକ୍ରମଣ

ଦିଗପହଣ୍ଡି, (ଯୁଗାବ୍ଦ ନ୍ୟୁଜ):ଦିଗପହଣ୍ଡି ବ୍ଲକ ବଡଡୁମ୍ବୁଳା ଗ୍ରାମରେ ପୂର୍ବ ଶତ୍ରୁତା କୁ କେନ୍ଦ୍ରକରି ସୋମବାର ଅପରାହ୍ନରେ ଗୋଦାବରୀ ପଣ୍ଡା (୬୬) ନାମକ ଜଣେ ପୁରୋହିତଙ୍କୁ  କାତିରେ ଆକ୍ରମଣ କରାଯାଇଛି।ଆକ୍ରମଣରେ ପୁରୋହିତଙ୍କ ଡାହାଣ ହାତରେ ଗଭୀର କ୍ଷତ ଲାଗିଥିବାରୁ ତାଙ୍କୁ ପ୍ରଥମେ ଦିଗପହଣ୍ଡି ଗୋଷ୍ଠି ସ୍ବାସ୍ଥ୍ଯକେନ୍ଦ୍ରରେ ଭର୍ତ୍ତି କରାଯାଇଥିଲା।କିନ୍ତୁ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ରହିଥିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନା  କୁ ସ୍ଥାନାନ୍ତର କରାଯାଇଛି।ସୂଚନା ପ୍ରକାରେ ରବିବାର ବଡଡୁମ୍ବୁଳା ପଞ୍ଚାୟତର ଝଗଡାପଲ୍ଲି ଗ୍ରାମରେ ଅଷ୍ଟପ୍ରହର ନାମ ସଂକୀର୍ତ୍ତନ ଆୟୋଜିତ ହୋଇଥିଲା।ପୂଜକ ଭାବେ ଗ୍ରାମବାସୀ ପୁରୋହିତ ଗୋଦାବରୀଙ୍କୁ ନିମନ୍ତ୍ରଣ କରି ନେଇଥିଲେ।କିନ୍ତୁ ଗୋଦାବରୀଙ୍କ ସମ୍ପର୍କୀୟ ଭାଇ ସିମାଞ୍ଚଳ ପଣ୍ଡା ଏଥିରେ କ୍ଷୁବ୍ଧ ହୋଇ ଝଗଡା ପଲ୍ଲୀ ଗାଁ ରେ ପହଞ୍ଚି  ଗୋଦାବରୀଙ୍କୁ ଧମକ ଚମକ ଦେଇଥିଲେ।ଗ୍ରାମବାସୀ ଗୋଦାବରୀଙ୍କ ସପକ୍ଷରେ ବାହାରିବା ପରେ ସିମାଞ୍ଚଳ ଘରକୁ ଫେରି ଆସିଥିଲେ।ସୋମବାର ଗୋଦାବରୀଙ୍କୁ ବଡଡୁମ୍ବୁଳା ଗାଁ ଦାଣ୍ଡରେ ଏକାକୀ ସାଇକେଲରେ ଯାଉଥିବା ଦେଖି ସିମାଞ୍ଚଳ ଏଭଳି ଆକ୍ରମଣ କରିଥିବା ଅଭିଯୋଗ ହୋଇଛି।