ପ୍ରଥମ ଟି-୨୦ : ଶେଷ ବଲରେ ଅଷ୍ଟ୍ରେଲିଆର ବିଜୟ
ବିଶାଖାପାଟଣା : ବିଶାଖାପାଟଣାରେ ଖେଳାଯାଇଥିବା ଭାରତ-ଅଷ୍ଟ୍ରେଲିଆ ପ୍ରଥମ ଟି-୨୦ ମ୍ୟାଚ କଙ୍ଗାରୁ ଦଳ ନିଜ ନାମରେ କରିଛି। ଶେଷ ଓଭରରେ ୪ ୱିକେଟ ବିନିମୟ ୧୪ ରନ ଦରକାର ଥିବାବେଳେ କଙ୍ଗାରୁ ଦଳର ଖେଳାଳି ମାନେ ଏହାକୁ ସଫଳତାର ସହ ପାର କରି ଦେଇଛନ୍ତି। ଦୁଇ ମ୍ୟାଚ ବିଶିଷ୍ଟ ଟି-୨୦ ଶୃଙ୍ଖଳାରେ ଅଷ୍ଟ୍ରେଲିଆ ୧-୦ରେ ଅଗ୍ରଣୀ ରହିଛି।
ଆନ୍ଧ୍ରପ୍ରଦେଶ ବିଶାଖାପାଟଣାସ୍ଥିତ ୱାଇ ଏସ ରାଜଶେଖର ରେଡ୍ଡି ଷ୍ଟାଡିୟମରେ ଅଷ୍ଟ୍ରେଲିଆ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଭାରତୀୟ ଦଳର ଅଧିନାୟକ ବିରାଟ କୋହଲି ୧୭ଟି ବଲରେ ୨୪ ରନ କରିଥିଲେ।
ପ୍ରଥମ ଇନିଂସରେ ଲୋକେଶ ରାହୁଲଙ୍କ ଅର୍ଦ୍ଧଶତକ ବଳରେ ଭାରତ ଅଷ୍ଟ୍ରେଲିଆକୁ ୧୨୭ ରନର ଟାର୍ଗେଟ ଦେଇଥିଲା। ୨୦ ଓଭର ମଧ୍ୟରେ ଭାରତ ୭ୱିକେଟ ହରାଇ ୧୨୬ ରନ କରିଥିଲା। ମହେନ୍ଦ୍ର ସିଂହ ଧୋନୀ ଅପରାଜିତ ରହି ୨୯ ରନ କରିଥିଲେ।
ଜବାବରେ ଅଷ୍ଟ୍ରେଲିଆ ୨୦ ଓଭରରେ ୭ ୱିକେଟ୍ ହରାଇ ୧୨୭ ରନ୍ କରି ବିଜୟୀ ହୋଇଥିଲା। ଅଷ୍ଟ୍ରେଲିଆ ପ୍ରାରମ୍ଭିକ ବିପର୍ୟ୍ୟୟର ସାମ୍ନା କରିଥିଲା। ଓପନ୍ କରିବାକୁ ଆସିଥିବା ମାର୍କସ୍ ଷ୍ଟୋଇନିସ୍ (୧) ରନ୍ ଆଉଟ୍ ହୋଇଥିବା ବେଳେ ଅଧିନାୟକ ଆରୋନ୍ ଫିଞ୍ଚ୍ (୦)ଙ୍କୁ ଜସପ୍ରୀତ୍ ବୁମ୍ରା ଆଉଟ୍ କରିଥିଲେ। ଡାର୍ସି ଶର୍ଟ ଓ ମ୍ୟାକ୍ସୱେଲ୍ ତୃତୀୟ ୱିକେଟ୍ ପାଇଁ ୮୪ ରନ୍ ଯୋଡ଼ି ଅଷ୍ଟ୍ରେଲିଆକୁ ବିଜୟ ନିକଟତର କରାଇଥିଲେ। ମ୍ୟାକ୍ସୱେଲ୍ ୪୩ ବଲ୍ରେ ୬ ଚୌକା ଓ ୨ ଛକା ସହ ୫୬ ରନ୍ କରି ଆଉଟ୍ ହୋଇଥିବା ବେଳେ ଶର୍ଟ ୩୭ ରନ୍ କରି ପ୍ୟାଭିଲିୟନ୍ ଫେରିଥିଲେ। ଦୁହିଁଙ୍କୁ ଆଉଟ୍ କରି ଭାରତ ମ୍ୟାଚ୍ରେ ପ୍ରତ୍ୟାବର୍ତ୍ତନ କରିଥିଲା।
