ବନ୍ତ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରର ସ୍ୱାସ୍ଥ୍ୟସେବା ବିପର୍ଯ୍ୟସ୍ତ ନେଇ ଦାବୀ ପତ୍ର ପ୍ରଦାନ

ବନ୍ତ, (ଚାନ୍ଦିନୀ ମହାନ୍ତି):ବନ୍ତ ସଦର ମହକୁମାସ୍ଥିତ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର(ନୂତନ)ରେ ସ୍ୱାସ୍ଥ୍ୟ ସେବା ବିପର୍ଯ୍ୟସ୍ତ ନେଇ ଆଜି ଯୁବ ସମାଜସେବୀ ସ୍ମୃତି ରଞ୍ଜନ ସ୍ୱାଇଁଙ୍କ ନେତୃତ୍ୱରେ ଏକ ପ୍ରତିନିଧି ଦଳ ତହସିଲଦାରଙ୍କୁ ଭେଟି ମାନ୍ୟବର ସ୍ୱାସ୍ଥ୍ୟ ମନ୍ତ୍ରୀଙ୍କ ଉଦ୍ଦେଶ୍ୟରେ ଦାବୀ ପତ୍ର ପ୍ରଦାନ କରିଛନ୍ତି । ଏହି ପ୍ରତିନିଧି ଦଳରେ ଖଗେଶ୍ୱର ବରାଳ, ଇଂ.ସୁଧାଂଶୁ ଶେଖର ନାୟକ, ଜିତେନ୍ଦ୍ର କୁମାର ନାୟକଙ୍କ ସମେତ ଅନ୍ୟ ମାନେ ଉପସ୍ଥିତ ଥିଲେ । ବନ୍ତ ସ୍ୱାସ୍ଥ୍ୟକେନ୍ଦ୍ର ମେଡିସିନ୍ ବିଭାଗରେ ସ୍ପେଶିଆଲିଷ୍ଟ ଡାକ୍ତରଙ୍କ ସ୍ଥାୟୀ ନିଯୁକ୍ତି, ସ୍ୱାସ୍ଥ୍ୟକେନ୍ଦ୍ରରେ ୨୪ ଘଣ୍ଟିଆ ସ୍ୱାସ୍ଥ୍ୟସେବା ପ୍ରଦାନ, ଶିଶୁ ବିଶେଷଜ୍ଞ ଓ ସ୍ତ୍ରୀ ରୋଗ ବିଶେଷଜ୍ଞ ନିଯୁକ୍ତି, ସ୍ୱାସ୍ଥ୍ୟକେନ୍ଦ୍ର ପରିସରରେ ଚାଲୁଥିବା ଉନ୍ନତିକରଣ କାର୍ଯ୍ୟର ତଦାରଖ, ସ୍ୱତନ୍ତ୍ର ଆମ୍ବୁଲାନ୍ସ ସେବା ଯୋଗାଇ ଦେବା, କୁଶଳୀ ଷ୍ଟାଫ ନର୍ସଙ୍କ ୨୪ ଘଣ୍ଟିଆ ନିଯୁକ୍ତି, ୨୪ ଘଣ୍ଟିଆ ବିଦ୍ୟୁତ୍ ସେବା ଓ ଆଲୋକୀକରଣ ବ୍ୟବସ୍ଥା, ରୋଗୀଙ୍କ ପାଇଁ ସ୍ଥାୟୀ ଓ ଉନ୍ନତମାନର ଶୌଚାଳୟ ନିର୍ମାଣ, ଆବଶ୍ୟକ ସଂଖ୍ୟକ ରୋଗୀ ଶର୍ଯ୍ୟା, ଅକ୍ସିଜେନ ସେବା ଯୋଗାଇ ଦେବା, ସ୍ୱାସ୍ଥ୍ୟକେନ୍ଦ୍ର ପରିସରକୁ ସ୍ୱଚ୍ଛ ରଖିବା ସହ ଜଳ ନିଷ୍କାସନ, ସ୍ୱତନ୍ତ୍ର ପାର୍କିଂ ବ୍ୟବସ୍ଥା ଆଦି ଦାବୀ ଉଲ୍ଲେଖ କରାଯାଇଥିଲା । ବନ୍ତ ବିକାଶ ପରିଷଦର କର୍ମକର୍ତ୍ତ ତଥା ଏ ଅଞ୍ଚଳର ବୁଦ୍ଧିଜୀବି, ବରିଷ୍ଠ ନାଗରିକଙ୍କ ସମେତ ଯୁବସମାଜସେବୀ ସ୍ମୃତି ରଞ୍ଜନ ସ୍ୱାଇଁଙ୍କ ନେତୃତ୍ୱରେ ଏକ ପଦଯାତ୍ରା ଅଗଷ୍ଟ ୧୨ରେ ବନ୍ତ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଠାରୁ ବାହାରି ଭଦ୍ରକ ଜିଲାପାଳ କାର୍ଯ୍ୟାଳୟ ନିକଟରେ ପହଞ୍ôଚ ଦାବୀ ପୂରଣ ପର୍ଯ୍ୟନ୍ତ ଅନଶନରେ ବସିବେ ବୋଲି ଦାବୀ ପତ୍ରରେ ଉଲ୍ଲେଖ ରହିଛି ।