ବହୁ ଚର୍ଚ୍ଚିତ ଦେବରାଜ ହତ୍ୟାକାଣ୍ଡ: ଦୁଇ ସୁପାରୀ କିଲର୍ ଗିରଫ
ମୋହନା, (ଅଂଶୁମାନ ପଣ୍ଡା): ଗଜପତି ଜିଲ୍ଲାରେ ଘଟିଥିବା ବହୁଚର୍ଚ୍ଚିତ ଦେବରାଜ ହତ୍ୟାକାଣ୍ଡରେ ଦୁଇ ସୁପାରୀ କିଲର୍ ଅଡ଼ବା ପୋଲିସ ଦ୍ୱାରା ଗିରଫ ହୋଇଛନ୍ତି । ଗତ ଜାନୁଆରୀ ମାସ ୧ ତାରିଖରେ ଗଜପତି ଜିଲ୍ଲା ଅଡ଼ବା ଥାନା ନିକଟ ରାଜରାସ୍ତା କଡ଼ରେ ଜଣେ ଅଚିହ୍ନା ବ୍ୟକ୍ତିର ହାତଗୋଡ଼ ବନ୍ଧା କ୍ଷତବିକ୍ଷତ ମୃତ ଦେହ ଅଡ଼ବା ପୋଲିସ ଜବତ କରିଥିଲା । ତେବେ ଉକ୍ତ ହତ୍ୟାକାଣ୍ଡର ତଦନ୍ତ ଚଳାଇଥିବା ପୋଲିସ ଶେଷରେ ମୃତଦେହର ପରିଚୟ ପାଇଥିଲା । ମୃତକ ଜଣକ ଥିଲେ ମୁନିଗୁଡ଼ା ଗୁପ୍ତା କଲୋନୀରେ ଭଡ଼ାରେ ରହୁଥିବା ଯୁବରାଜ ଚଣ୍ଡୀ । ପୋଲିସ ଏହି ଘଟଣାର ଅଧିକ ତଦନ୍ତ ଚଳାଇ ଶେଷରେ ଏହା ଏକ ପ୍ରେମଜନିତ ହତ୍ୟାକାଣ୍ଡ ବୋଲି ଜାଣିବାକୁ ପାଇଥିବା ବେଳେ ପୂର୍ବରୁ ଦେବରାଜଙ୍କ ସ୍ତ୍ରୀ ନିବେଦିତା ଓ ତାଙ୍କ ପ୍ରେମିକ ସୁଜିତ ମହାପାତ୍ରକୁ ଗିରଫ କରିଥିଲା । ଘଟଣାରୁ ଜଣାପଡିଛି ଯେ, ନିବେଦିତା ଓ ତାଙ୍କ ପ୍ରେମିକ ମିଶିକରି ସୁପାରୀ କିଲର ଦ୍ୱାରା ଏହି ହତ୍ୟାକାଣ୍ଡ ଘଟାଇଥିଲେ । ଆଜି ଉକ୍ତ ହତ୍ୟାକାଣ୍ଡରେ ଦୁଇ ଜଣ ସୁପାରୀ କିଲରକୁ ଅଡ଼ବା ପୋଲିସ ଗିରଫ କରିଛି । ଦୁଇ ସୁପାରୀ କିଲର୍ ମଧ୍ୟରୁ ପ୍ରମୋଦ ବେହେରା ହିଞ୍ଜିଳିରୁ ଗିରଫ କରାଯାଇଥିବା ବେଳେ ଆଉ ଜଣେ ଅନିଲ ବେହେରାକୁ ଆସିକା ଥାନା ଅଧିକାରୀ ପ୍ରଶାନ୍ତ କୁମାର ସାହୁଙ୍କ ମିଳିତ ଉଦ୍ୟମରେ ଏସ୍ଡ଼ିପିଓ ଅଶୋକ କୁମାର ମହାନ୍ତି ଓ ଅଡ଼ବା ଥାନାଧିକାରୀ ଆଲୋକ ରଞ୍ଜନ ଜଗଦଲା ଗିରଫ କରିଥିବା ବେଳେ ଏହି ହତ୍ୟାକାଣ୍ଡରେ ଜଡ଼ିତ ଅନ୍ୟ ଏକ ଆସାମୀ ଫେରାର୍ ଥିବା ଜଣାପଡିଛି ।
