ବାଲିଆ ନିମ୍ନ ମୌଳିକ ବିଦ୍ୟାଳୟର ବିଦ୍ୟା ପ୍ରବେଶ ଉତ୍ସବ

ବରୀ, (ଚୈତନ୍ୟ ଜେନା):ବରୀ ଶିକ୍ଷା ମଣ୍ଡଳ ଅଧୀନ ଅଭିମନ୍ୟୁ ବାଲିଆ ନିମ୍ନ ମୌଳିକ ବିଦ୍ୟାଳୟରେ ବିଦ୍ୟା ପ୍ରବେଶ ଉତ୍ସବ ଅନୁଷ୍ଠିତ ହୋଇଯାଇଛି। ବୁଧବାର ପୂର୍ବାହ୍ନରେ ବିଦ୍ୟାଳୟ ପରିସରରେ ଅନୁଷ୍ଠିତ କାର୍ଯ୍ୟକ୍ରମରେ ପ୍ରଥମେ ଆଦିଦେବ ଗଜାନନ ଗଣେଷଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ପ୍ରଦୀପ ପ୍ରଜ୍ବଳନ କରାଯାଇଥିଲା। ପରେ ପରେ ନୂତନ କରି ବିଦ୍ୟାଳୟରେ ପ୍ରବେଶ କରିଥିବା ଶିଶୁ ମାନଙ୍କୁ ଗୁରୁଜୀ, ଗୁରୁମା ମାନେ ଫୁଲ ଓ ଅକ୍ଷତ ସିଞ୍ଚନ କରି ଆଶ୍ରିବାଦ କରିବା ପରେ ଶିକ୍ଷା କୋଣରେ ବସାଇ ଖଡ଼ି ଧରାଇ ସିଲଟରେ ପ୍ରଥମେ ଓଁ ଲେଖାଇଥିଲେ। କୁନି କୁନି ପିଲା ମାନଙ୍କ ଦ୍ଵାରା ନୃତ୍ୟ ଓ ସଂଗୀତ ପରିବେଷଣ ବେଶ ମନ ମୁଗ୍ଧକର ପରିବେଶ ସୃଷ୍ଟି କରିପାରିଥିଲା। ମଧ୍ୟାହ୍ନରେ ଶିଶୁ ଏବଂ ଅଭିଭାବକ ମାନଙ୍କୁ ପ୍ରସାଦ ସେବନରେ ଆପ୍ୟାୟିତ କରାଯାଇଥିଲା। ସମସ୍ତ କାର୍ଯ୍ୟ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପ୍ରତିମା ବିଶ୍ଵାଳ, ସହକାରୀ ଶିକ୍ଷକ ଚକ୍ରଧର ସାର୍ ଓ ତୁଳସୀ ବେହେରାଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଅନୁଷ୍ଠିତ ହୋଇଥିଲା। ସମଗ୍ର ବରୀ ଶିକ୍ଷା ମଣ୍ଡଳ ଅଧୀନରେ ୧୩୫ ଗୋଟି ବିଦ୍ୟାଳୟରେ ୬୭୭ ନୂତନ ଛାତ୍ର, ଛାତ୍ରୀ ମାନଙ୍କର ବିଦ୍ୟାରମ୍ଭ କରାଯାଇଥିବା ସୂଚନା ମିଳିଛି।