ବାଲିଗାଡା ପଞ୍ଚାୟତରେ ଅନ୍ଲାଇନ ଶିକ୍ଷା ପାଇଁ ଜୀବନକୁ ବାଜି ଲଗାଉଛନ୍ତି ଛାତ୍ରଛାତ୍ରୀ
ବାଲିଗୁଡା,(ସଞ୍ଜୟ କୁମାର ପାଣିଗ୍ରାହୀ): କରୋନା କଟକଣା କାରଣରୁ ୭ମାସ ହେଲା ଶିକ୍ଷାନୁଷ୍ଠାନ ବନ୍ଦ ରହିବାରୁ ଏବେ ଅନଲାଇନରେ ପାଠପଢା ଚାଲିଛି। ଆଦିବାସୀ ଅଧ୍ୟୁଷିତ କନ୍ଧମାଳ ଜିଲ୍ଲା ବାଲିଗୁଡା ଉପଖଣ୍ଡ ଅନ୍ତର୍ଗତ କ.ନୂଆଗାଁ ବ୍ଳକର ଦୁର୍ଗମ ବାଲିଗାଡ଼ା ପଞ୍ଚାୟତ। ନେଟୱାର୍କ ସଂଯୋଗ ହୋଇପାରୁଥିବା ପାହାଡ ଉପରକୁ ଚଢିବା ବେଳେ ପିଲାଏ ଖସିଯିବାର ନଜିର ରହିଛି।ପଞ୍ଚାୟତରେ ଟାୱାର ନିର୍ମାଣ ପାଇଁ ଅଞ୍ଚଳବାସୀ ବାରମ୍ବାର ଦାବି ଜଣାଇଛନ୍ତି। ସ୍କୁଲ ଓ କଲେଜ ଛାତ୍ରଛାତ୍ରୀ ବର୍ତ୍ତମାନ ପରିସ୍ଥିତିରେ ଅନ୍ଲାଇନ୍ ଶିକ୍ଷାଦାନ ପାଇଁ ବାଜିରେ ଲଗାଉଛନ୍ତି ଜୀବନ। ଏହି ପଞ୍ଚାୟତର ଗୁମାମାହା, ଗତରବାଡ଼ି, ବହତବାଡ଼ି ଗ୍ରାମର ଛାତ୍ରଛାତ୍ରୀମାନେ ଅନଲାଇନ କ୍ଲାସ କରିବାକୁ ଏକ କିଲୋମିଟର ଦୂର କଡ଼ିପାଟା ପାହାଡ଼କୁ ଯାଉଛନ୍ତି। ସେଠାରେ ରାଇକିଆ ବ୍ଳକର ଜିଓ ନେଟୱାର୍କ ଆସୁଥିବା ଜାଣିବା ପରେ ପିଲାଙ୍କ ସେଠାକୁ ସୁଅ ଛୁଟିଛି। ବିପଦ ପୂର୍ଣ୍ଣ ଭାବେ ଉଚ୍ଚ ପଥର ଚଟାଣ ଓ ଗଛ ଉପରେ ବସି ପିଲାମାନେ ଅନ୍ ଲାଇନ୍ ଶିକ୍ଷା ଗ୍ରହଣ କରୁଛନ୍ତି । ଦାମୀ ମୋବାଇଲ୍ କିଣିବା ସେମାନଙ୍କ୍ ପକ୍ଷେ ସମ୍ଭବ ନୁହେଁ। ପିଲାଙ୍କ ଭବିଷ୍ୟତ ଚିନ୍ତା କରି କିଏ ଧାନ ବିକି ମୋବାଇଲ୍ କିଣିଲାଣି ତ ପୁଣି କିଏ ଛେଳି ବିକି ମୋବାଇଲ୍ କିଣିଛନ୍ତି। ଉକ୍ତ ଗ୍ରାମର ଏକ ବିଦ୍ୟାଳୟରେ ଅଧ୍ୟୟନ କରୁଥିବା ଛାତ୍ରୀ ଗ୍ଲାଡ଼ି ପ୍ରଧାନଙ୍କ ପାଇଁ ତାଙ୍କ ବାପା ସାମସନ୍ ପ୍ରଧାନ ଛେଳି ବିକି ମୋବାଇଲ୍ କିଣିଛନ୍ତି। ଏପରି ସ୍ଥିତିରେ ପ୍ରଶାସନ ତୁରନ୍ତ ଦୃଷ୍ଟି ଦେଇ ଏହି ପଞ୍ଚାୟତରେ ଏକ ମୋବାଇଲ ଟାୱାର ସ୍ଥାପନ କରିବା ପାଇଁ ଅଞ୍ଚଳ ବାସୀଙ୍କ ତରଫରୁ ପ୍ରବଳ ଦାବୀ ହେଉଛି l
