ବାଲେଶ୍ୱରରେ ଗଡ଼ିଲା ବିକଶିତ ଭାରତ ସଂକଳ୍ପ ଯାତ୍ରାର ୩ ଗୋଟି ଆଇ.ଇ.ସି ଭ୍ୟାନ୍

ବାଲେଶ୍ୱର, (ସରୋଜ ପଣ୍ଡା) : ଆଜି ଘ.୧୨ ଟା ସମୟରେ ମାନ୍ୟବର ସାଂସଦ, ବାଲେଶ୍ୱର ଶ୍ରୀଯୁକ୍ତ ପ୍ରତାପ ଚନ୍ଦ୍ର ଷଡ଼ଙ୍ଗୀ କଲେକ୍ଟୋରେଟ୍ ପରିସରରେ ବିକଶିତ ଭାରତ ସଂକଳ୍ପ ଯାତ୍ରାର ଆନୁଷ୍ଠାନିକ ଭାବେ ପତାକା ଦେଖାଇ ଶୁଭାରମ୍ଭ କରିଛନ୍ତି । ଏହି ଅବସରରେ ଜିଲ୍ଲାପାଳ ଶ୍ରୀଯୁକ୍ତ ଦତ୍ତାତ୍ରୟ ଭାଉସାହେବ ଶିନ୍ଦେ, ମାନ୍ୟବର ସଭାପତି, ଜିଲ୍ଲା ପରିଷଦ ଶ୍ରୀଯୁକ୍ତ ନାରାୟଣ ପ୍ରଧାନ ଏବଂ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ଶ୍ରୀଯୁକ୍ତ ବିଶ୍ୱରଞ୍ଜନ ନାୟକ ମଞ୍ଚାସୀନ ଥିଲେ I ଜିଲ୍ଲାର ୧୨ଟି ବ୍ଲକ୍ ଅନ୍ତର୍ଗତ ସମସ୍ତ ଗ୍ରାମ ପଞ୍ଚାୟତକୁ ଅନ୍ତର୍ଭୁକ୍ତ କରୁଥିବା ଏହି ଅଭିଯାନରେ ୩ ଗୋଟି ଆଇ.ଇ.ସି (ସୂଚନା, ଶିକ୍ଷା ଏବଂ ଯୋଗାଯୋଗ) ଭ୍ୟାନ୍ ଗ୍ରାମାଞ୍ଚଳ ତଥା ସହରାଞ୍ଚଳକୁ ଯାଇ ସାଧାରଣ ଜନତାଙ୍କ ନିମନ୍ତେ କେନ୍ଦ୍ର ସରକାରଙ୍କ କଲ୍ୟାଣକାରୀ ଯୋଜନା ଯଥା ପ୍ରଧାନ ମନ୍ତ୍ରୀ ଆୱାସ ଯୋଜନା, ଉଜ୍ଜ୍ୱଳା ଯୋଜନା, ଆୟୁଷ୍ମାନ ଭାରତ, ପ୍ରଧାନ ମନ୍ତ୍ରୀ ଗରିବ କଲ୍ୟାଣ ଯୋଜନା ଆଦି ଉପରେ ବିସ୍ତାର ସୂଚନା ପ୍ରଦାନ ଏବଂ ସଚେତନତା ସୃଷ୍ଟି କରିବ I ସଭା ଆରମ୍ଭରେ ଆଭାସୀ ମାଧ୍ୟମରେ ମାନ୍ୟବର ପ୍ରଧାନ ମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦିଙ୍କର ବାର୍ତ୍ତା ତଥା ସାଧାରଣ ଜନତାଙ୍କ ସହ ବାର୍ତ୍ତାଳାପ ପ୍ରସାରଣ କରାଯାଇଥିଲା I ଏହି ସଭାରେ ମାନ୍ୟବର ସାଂସଦ ଶ୍ରୀଯୁକ୍ତ ଷଡ଼ଙ୍ଗୀ ଯୋଗ ଦେଇଥିବା ବିଶିଷ୍ଟ ଅତିଥି ତଥା ସାଧାରଣ ନାଗରିକମାନଙ୍କୁ ସମ୍ବୋଧିତ କରି କହିଥିଲେ କି ଏହି କାର୍ଯ୍ୟକ୍ରମ ଲୋକମାନଙ୍କୁ ସରକାରୀ ଯୋଜନାର ନିକଟତର କରିବାର ଏକ ସୁଯୋଗ ଅଟେ। ବିକଶିତ ଭାରତ ସଂକଳ୍ପ ଯାତ୍ରା ଲୋକମାନଙ୍କ କଲ୍ୟାଣ ଏବଂ ଆର୍ଥିକ ଉନ୍ନତି ପାଇଁ ପରିକଳ୍ପିତ ବିଭିନ୍ନ କଲ୍ୟାଣମୂଳକ ଯୋଜନାରେ ଉପକୃତ ହେବା ପାଇଁ ଅତ୍ୟନ୍ତ ପ୍ରେରଣାଦାୟକ ପ୍ରମାଣିତ ହେବ I ବର୍ତ୍ତମାନ, ଆମେ ଏହି ପଦକ୍ଷେପଗୁଡ଼ିକୁ ସମଗ୍ର ଦେଶରେ ପ୍ରୋତ୍ସାହିତ କରିବୁ, ଲୋକଙ୍କ ସହ ସିଧାସଳଖ କଥାବାର୍ତ୍ତା କରିବୁ ଏବଂ ସେମାନଙ୍କ ସମସ୍ୟାର ସମାଧାନ କରିବାରେ ସାହାଯ୍ୟ କରିବୁ I ଏହାର ଅଂଶ ହୋଇ ଅଭିଯାନକୁ ଏହାର ଯୁକ୍ତିଯୁକ୍ତ ସିଦ୍ଧାନ୍ତରେ ନେବା ନିମନ୍ତେ ପ୍ରତିଶ୍ରୁତି ଦେବାକୁ ଲୋକଙ୍କୁ ଅନୁରୋଧ କରିଥିଲେ ମାନ୍ୟବର ସାଂସଦ ଶ୍ରୀଯୁକ୍ତ ଷଡ଼ଙ୍ଗୀ I ସେ କହିଥିଲେ ଯେ ମାନ୍ୟବର ପ୍ରଧାନମନ୍ତ୍ରୀଙ୍କ ଦର୍ଶନ ଅନୁଯାୟୀ ଦେଶ ଦ୍ରୁତ ପ୍ରଗତି ଏବଂ ସମୃଦ୍ଧି ଆଡକୁ ଗତି କରୁଛି ଏବଂ ସାଧାରଣ ଲୋକଙ୍କ ସ୍ୱପ୍ନ ସାକାର ହେବାର ଦିନ ଦୂର ନୁହେଁ। ଲୋକମାନଙ୍କର ଅଂଶଗ୍ରହଣ ହେଉଛି ଗଣତନ୍ତ୍ରର ମୂଳ ଆଧାର ଯାହା ଗତ ଏକ ଦଶନ୍ଧି ଧରି ଗତିଶୀଳ ହେଉଛି I ୨୦୪୭ ମସିହା ସୁଦ୍ଧା ଭାରତ ଏକ ବିକଶିତ ଦେଶ ହେବାକୁ ଲକ୍ଷ୍ୟ ରଖିଛି ଏବଂ ଆମେ ଚାହୁଁ ସାଧାରଣ ଲୋକ ସରକାରୀ ଯୋଜନାରେ ଜଡିତ ହୋଇ ବିକାଶ ପ୍ରକ୍ରିୟାରେ ଅଂଶଗ୍ରହଣ କରନ୍ତୁ I
ପରିଶେଷରେ ମାନ୍ୟବର ସାଂସଦ ଶ୍ରୀଯୁକ୍ତ ଷଡ଼ଙ୍ଗୀଙ୍କ ଅଧ୍ୟକ୍ଷତାରେ ବିକଶିତ ଭାରତ ସଂକଳ୍ପର ସମୂହ ଶପଥ ପଠନ କରାଯାଇଥିଲା I ଉକ୍ତ ସଭାରେ ବିଭିନ୍ନ ବିଭାଗୀୟ ପଦାଧିକାରୀ, କର୍ମକର୍ତ୍ତା, ମିଶନ ଶକ୍ତି ମହିଳାବୃନ୍ଦ, ସ୍ୱୟଂ ସହାୟକ ଗୋଷ୍ଠୀର କର୍ମକର୍ତ୍ତା, ଜଣ ସାଧାରଣ ଲୋକ ଏବଂ ଗଣମାଧ୍ୟମର ପ୍ରତିନିଧିମାନେ ଉପସ୍ଥିତ ଥିଲେ I