ବିଦ୍ୟୁତ ଆଘାତରେ ମହିଳାଙ୍କ ଜୀବନ ଗଲା

ବୁଗୁଡା (ଅନିଲ କୁମାର ମହାରଣା) : ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ଏକ ନମ୍ବର ୱାର୍ଡ ଗୋଲାମୁଣ୍ଡୁଳାର ଜଣେ ମହିଳା ମଙ୍ଗଳ ବାର ଦିବା ସାଢେ ଦଶଟା ସମୟରେ ନିଜ ଘରର ଏକ ବିଦ୍ୟୁତ ତାର ସଂସ୍ପର୍ଶରେ ଆସି ମୃତ୍ୟୁ ବରଣ କରିଥିବା ଜଣାପଡିଛି। ଘଟଣାରୁ ଜଣାପଡିଛି ଯେ ଗୋଲାମୁଣ୍ଡୁଳା ଗ୍ରାମର କୃଷ୍ଣ ଚନ୍ଦ୍ର ଡାକୁଆଙ୍କ ଧର୍ମପତ୍ନୀ ଗୀତାଞ୍ଜଳୀ ଡାକୁଆ ନିଜ ଘରର ମୋଟର ସୁଇଚ ଅନ କଲା ବେଳେ ଛିଡ଼ିଯାଇଥିବା ଏକ ତାର ସଂସ୍ପର୍ଶରେ ଆସି ବିଦ୍ୟୁତ ଆଘାତ ଲାଗିଥିଲା। ବିଦ୍ୟୁତ ଆଘାତ ଲାଗିଥିବା ଗୀତାଞ୍ଜଳୀଙ୍କୁ ସାଙ୍ଗେ ସାଙ୍ଗେ ବୁଗୁଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲେ ମଧ୍ୟ ଜୀବନ ରକ୍ଷା ହୋଇପାରିନଥିଲା। ଡାକ୍ତର ଗୀତାଞ୍ଜଳୀଙ୍କୁ ମୃତ୍ୟୁ ଘୋଷଣା କରିଥିଲେ। ଏହି ଖବର ପ୍ରଚାରିତ ହେବା ପରେ ଗୋଲାମୁଣ୍ଡୁଳାରେ ଶୋକର ଛାୟା ଖେଳିଯାଇଛି।