ବିଭିନ୍ନ ଜୁଆ ଆଡ୍ଡା ଉପରେ ବେଲଗୁଣ୍ଠା ପୋଲିସ୍ ର ଚଢ଼ାଉ
ବେଲଗୁଣ୍ଠା, (ସନ୍ତୋଷ ବିଶୋଇ):ରାତି ପାହିଲେ କୁମାର ପୂର୍ଣ୍ଣମୀ I ଏହି ପ୍ରରିପ୍ରେକ୍ଷୀରେ ଗଞ୍ଜାମ ଜିଲ୍ଲାର ବିଭିନ୍ନ ଗ୍ରାମାଞ୍ଚଳରେ ପୋଲିସ୍ ଆଖିରେ ଧୂଳି ଦେଇ ଜୁଆ ଖେଳର ଆସର ଜମି ଯାଇଥିବା ଦେଖିବାକୁ ମିଳିଛି I କିନ୍ତୁ ଗଞ୍ଜାମ ଜିଲ୍ଳା ବେଲଗୁଣ୍ଠା ପୋଲିସ୍ ଜୁଆଡ଼ିମାନଙ୍କ ଠାରୁ ଆଉ ପାଦେ ଆଗକୁ ଯାଇ ଜୁଆଡ଼ି ମାନଙ୍କୁ ଗିରଫ କରିବାରେ ସକ୍ଷମ ହୋଇଛି I ବେଲଗୁଣ୍ଠା ପୋଲିସ ତିନୋଟି ଜୁଆ ଆଡ୍ଡା ଉପରେ ଚଢ଼ାଉ କରି ୧୭ ଜଣଙ୍କୁ ଗିରଫ କରିବା ସହିତ ନଗଦ ୫୨,୨୫୦ ଟଙ୍କା ଜବତ କରାଯାଇଥିବା ବେଲଗୁଣ୍ଠା ଥାନା ଅଧିକାରୀ ପ୍ରକାଶ କୁମାର ସାହୁ ସୂଚନା ଦେଇଛନ୍ତି I ସୂଚନା ପ୍ରକାରେ ବେଲଗୁଣ୍ଠା ପୋଲିସ୍ ପାଟ୍ରୋଲିଂ ସମୟରେ ଗୁଡ଼ିପଲ୍ଲୀ ଗ୍ରାମରେ ଚାଲିଥିବା ଏକ ଜୁଆ ଆଡ୍ଡା ଉପରେ ଚଢ଼ାଉ କରି ସେଠାରୁ ତିନି ସେଟ୍ ତାସ୍, ଦୁଇଟି ମୋବାଇଲ୍ ଏବଂ ନଗଦ ୨୦,୫୫୦ ଟଙ୍କା ଜବତ କରିବା ସହ ସେଠାରୁ ଛଅ ଜଣଙ୍କୁ ଗିରଫ କରି ୩୦୯/୨୨ ରେ ଏକ ମାମଲା ରୁଜୁ କରାଯାଇଛି I ସେହିପରି ପୋଲିସ୍ ବେଲଗୁଣ୍ଠା କଲେଜ୍ ପଡ଼ିଆ ନିକଟସ୍ଥ ଏକ ଭଙ୍ଗା ଘରେ ଚାଲିଥିବା ଜୁଆ ଆଡ୍ଡା ଉପରେ ଚଢାଉ କରି ସେଠାରୁ ନଗଦ ୨୪,୧୫୦ ଟଙ୍କା, ଦୁଇ ସେଟ୍ ତାସ୍, ଗୋଟିଏ ମୋଟର୍ ସାଇକେଲ୍, ଗୋଟିଏ ରଙ୍ଗୀନ୍ ଜରି ପାଲ ଜବତ କରିବା ସହିତ ଘଟଣା ସ୍ଥଳରୁ ସାତ ଜଣଙ୍କୁ ଗିରଫ କରି ୩୧୦/୨୨ ରେ ଏକ ମାମଲା ରୁଜୁ କରିଛି I ଠେଙ୍ଗାଧରା ରାସ୍ତାରେ ଚାଲିଥିବା ଅନ୍ୟ ଏକ ଜୁଆ ଆଡ୍ଡା ଉପରେ ଚଢ଼ାଉ କରି ସେଠାରୁ ଚାରି ଜଣଙ୍କୁ ଗିରଫ କରିବା ସହିତ ସେମାନଙ୍କ ନିକଟରୁ ନଗଦ ୭୫୫୦ ଟଙ୍କା, ଦୁଇ ସେଟ୍ ତାସ୍, ଗୋଟିଏ ମୋଟର୍ ସାଇକେଲ୍ ଏବଂ ଗୋଟିଏ ରଙ୍ଗୀନ୍ ଜରି ପାଲ ଜବତ କରିଛି ବେଲଗୁଣ୍ଠା ପୋଲିସ୍ I ଏହି ଘଟଣାରେ ୩୧୧/୨୨ ରେ ଏକ ମାମଲା ରୁଜୁ କରାଯାଇଛି I ଆସନ୍ତା କାଲି କୁମାର ପୂର୍ଣ୍ଣମୀ ଥିବାରୁ ବେଲଗୁଣ୍ଠା ଅଞ୍ଚଳକୁ ସମ୍ପୂର୍ଣ୍ଣ ଜୁଆ ମୁକ୍ତ କରିବା ପାଇଁ ପୋଲିସ୍ ସ୍ଵତନ୍ତ୍ର ରଣନୀତି ପ୍ରସ୍ତୁତ କରିଥିବା ବେଲଗୁଣ୍ଠା ଥାନା ଅଧିକାରୀ ପ୍ରକାଶ କୁମାର ସାହୁ ସୂଚନା ଦେଇଛନ୍ତି I
