ବିଳମ୍ବିତ ସନ୍ଧ୍ୟା ପର୍ଯ୍ୟନ୍ତ ମତଦାନ
ବୋଲଗଡ଼ (ଜୁଗାବ୍ଦ ନ୍ୟୁଜ୍): ମଙ୍ଗଳବାର ବୋଲଗଡ଼-ବେଗୁନିଆ ବିଧାନସଭା ନିର୍ବାଚନ ମଣ୍ଡଳୀରେ ଶାନ୍ତିଶୃଙ୍ଖଳାର ସହ ଭୋଟଗ୍ରହଣ ଚାଲିଥିବାବେଳେ ଭିଭିପାଟ୍ ମେସିନ ଓ ଇଭିଏମରେ ବ୍ୟାପକ ଯାନ୍ତ୍ରିକ ତ୍ରୁଟି ଯୋଗୁଁ ବିଳମ୍ବରେ ମତଦାନ ବିଭିନ୍ନ ବୁଥରେ ଆରମ୍ଭ ହୋଇଥିଲା । ଯାହାଫଳରେ ବୋଲଗଡ଼ ବ୍ଲକ ଅନ୍ତର୍ଗତ ତୃତୀୟାପଡା ଗ୍ରାମର ବୁଥ ନଂ ୯୫, ଟାଙ୍ଗିସାହି ଗ୍ରାମର ବୁଥ୍ ନଂ ୯୦ ଓ ୯୧ ଦିବ୍ୟସିଂହପୁର ଗ୍ରାମର ବୁଥ ନଂ ୮୩ ସମେତ ଚମ୍ପାଇଲୋ, ପିଚୁକୁଳି, ସାନପଦର,ଶ୍ରୀରାମପୁର ପ୍ରଭୃତି ବହୁ ବୁଥ୍ରେ ରାତି ୯ଟା ପର୍ଯ୍ୟନ୍ତ ମତଦାନ ଚାଲୁରହିଥିବା ସୂଚନା ମିଳିଛି । ଯାହାଫଳରେ ବ୍ଲକରେ କେତେ ଶତକଡା ମତଦାନ ହେଲା ତାହା ସଠିକ୍ ନିରୁପଣ ହୋଇପାରୁନାହିଁ । ଅନ୍ୟପଟେ ବହୁ ବୁଥରେ ଯାନ୍ତ୍ରିକ ତ୍ରୁଟି ଯୋଗୁଁ ଭୋଟ ଦେବାରେ ବିଳମ୍ବ ହେବାରୁ ଭୋଟଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା ।
