ବିଶ୍ଵକର୍ମା ସମାଜ ପକ୍ଷରୁ ଆରମ୍ଭ ହେଲା ପାନୀୟ ଜଳ ସେବା କେନ୍ଦ୍ର

ହିଞ୍ଜିଳିକାଟୁ,(ସୁଧାନିଧି ଚୌଧୁରୀ): ତାତିର ପ୍ରକୋପରେ ଏବେ ସାରା ରାଜ୍ୟ ସିଝୁଛି। ଗ୍ରୀଷ୍ମ ଲହର ହେତୁ ସ୍ବାଭାବିକ ଜୀବନଯାତ୍ରା ପ୍ରଭାବିତ ହୋଇଛି। ଚଳିତ ବର୍ଷ ପ୍ରଥମ ଥର ପାଇଁ ଓଡିଶାର ବିଭିନ୍ନ ସହରରେ ତାପମାତ୍ରା ୪୦ ଡିଗ୍ରୀ ଅତିକ୍ରମ କରିଛି। ରାଜ୍ୟରେ ପାରଦ ଦିନକୁ ଦିନ ଉପର ମୁହାଁ ହୋଇଛି। ଟାଣ ଖରା ସାଙ୍ଗକୁ ଅସହ୍ୟ ଗ୍ରୀଷ୍ମ ପ୍ରବାହ ସମସ୍ତଙ୍କୁ କଲବଲ କରୁଛି। ତାତି ବୃଦ୍ଧି ସହ ଗୁଳୁଗୁଳି ଅନୁଭୁତ ହେଉଥିବା ଯୋଗୁଁ ଲୋକେ ପଦାକୁ ବାହାରିବା କଷ୍ଟକର ହୋଇଛି। ଚଳିତ ବର୍ଷ ଗ୍ରୀଷ୍ମ ପ୍ରବାହକୁ ଆଖି ଆଗରେ ରଖି ସ୍ଵତନ୍ତ୍ର ରିଲିଫ କମିଶନର ଏଥିପ୍ରତି ପଦକ୍ଷେପ ଗ୍ରହଣ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ସହରର ବିଭିନ୍ନ ଗୁରୁତ୍ବପୂର୍ଣ୍ଣ ସ୍ଥାନ ଗୁଡ଼ିକରେ ପାନୀୟ ଜଳ ସେବା କେନ୍ଦ୍ର ଖୋଲିବା ପାଇଁ ନିର୍ଦ୍ଦେଶ ଦିଆଯାଇଛି। ଏହି କ୍ରମରେ ଗୁରୁବାର ଦକ୍ଷିଣ ଓଡ଼ିଶା ବିଶ୍ଵକର୍ମା ସମାଜ (ବଢେଇକୂଳ) ପକ୍ଷରୁ ସ୍ଥାନୀୟ ବସ୍ ଟର୍ମିନାଲ ନିକଟରେ ପାନୀୟ ଜଳ ସେବା କେନ୍ଦ୍ର (ଜଳଛତ୍ର) ଆରମ୍ଭ ହୋଇଛି। ପଥଚାରୀ, ତୃଷାର୍ତ୍ତ ବାଟୋଇ ଓ ଦୂର ଦୁରାନ୍ତରୁ ଆସୁଥିବା ସାଧାରଣ ଲୋକଙ୍କୁ ବିଶୁଦ୍ଧ ଥଣ୍ଡା ପାନୀୟ ଜଳ ଯୋଗାଇବା ପାଇଁ ସମାଜ ପକ୍ଷରୁ ଆବଶ୍ୟକୀୟ ପାନୀୟ ଜଳର ବ୍ୟବସ୍ଥା କରାଯାଇଛି। ଏଥି ସହିତ ଟାଣ ଖରାରେ ପଦାକୁ ନ ବାହାରିବା, ଜରୁରୀ କାମ ପଡ଼ିଲେ କଳା ଚଷମା, ଚପଲ, ମୁଣ୍ଡରେ ଓଦା ଗାମୁଛା ଏଵଂ ଛତା ବ୍ଯବହାର କରିବା ପାଇଁ ପରାମର୍ଶ ଦିଆଯାଇଛି। ସାଙ୍ଗରେ ପାଣି ବୋତଲ, ହାଲୁକା ଏବଂ ଢିଲା ପୋଷାକ ପରିଧାନ କରିବା ପାଇଁ ସଭାପତି ସନ୍ତୋଷ କୁମାର ମହାରଣା ଜନ ସାଧାରଣଙ୍କୁ ଅନୁରୋଧ କରିଛନ୍ତି। କାର୍ଯ୍ୟକ୍ରମରେ ବିଶ୍ଵକର୍ମା ସମାଜର ପ୍ରଦୀପ କୁମାର ମହାରଣା, ରାମ ମହାରଣା, ସୁମନ ମହାରଣା, ପପୁ ମହାରଣା, ସଚିନ୍ ମହାରଣା, ଅମର ମହାରଣା, ମାଗି ବେହେରା ଓ ଜନ ସାଧାରଣ ଉପସ୍ଥିତ ଥିଲେ।