ଭାଉଜଙ୍କୁ ହତ୍ୟା ଉଦ୍ୟମ ଦିଅର ଗିରଫ
ଦିଗପହଣ୍ଡି,(ଅଳକ ନାଥ ମିଶ୍ର):ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ତିଳେଶ୍ୱର ଗ୍ରାମର ଶିବା ଓରଫ ଶିବାନନ୍ଦ ବିଷୋୟୀ ଗ୍ରାମରେ ରହୁଥିବା ତାଙ୍କ ସମ୍ପର୍କୀୟ ଭାଉଜ ଇନ୍ଦିରା ବିଷୋୟୀଙ୍କୁ ଘରେ ପଶି ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି।ପୋଲିସ ଇନ୍ଦିରାଙ୍କ ସମ୍ପର୍କୀୟ ଦିଅର ଶିବାଙ୍କୁ ଗୁରୁବାର ଗିରଫ କରି କୋର୍ଟ ଚାଲାଣ କରିଛନ୍ତି। ସ୍ବାମୀ ଯୁଧିଷ୍ଠିର ବାହାର ରାଜ୍ୟରେ କାମ କରୁଥିବା ବେଳେ ଇନ୍ଦିରା ଗତ ମଙ୍ଗଳବାର ରାତି ରେ ତାଙ୍କ ପୁଅ ଝିଅଙ୍କୁ ନେଇ ଘରେ ଶୋଇଥିଲେ।ରାତି ପ୍ରାୟ ୧୦ ଟାରେ ଶିବା ହାତରେ ଏକ କାତି ଧରି ଜବରଦସ୍ତ ଘରେ ପଶି ତାଙ୍କ ବେକକୁ ଧରି ଜୀବନରେ ମାରିଦେବାକୁ ଉଦ୍ୟମ କରିଥିଲେ।ସେ ନିଦରୁ ଉଠି ଭୟଭୀତ ଅବସ୍ଥାରେ ଘର ବାହାରକୁ ଯାଇ ପାଟି କରିବାରୁ ଅଭିଯୁକ୍ତ ଜଣକ ତାଙ୍କୁ ଅଶ୍ଳିଳ ଭାଷାରେ ଗାଳି କରି ତାଙ୍କ ବେକକୁ କାତିରେ ହାଣି ଦେବାକୁ ଉଦ୍ୟମ କରିଥିଲେ।ମୁଁ କହିବା ପ୍ରକାରେ ରହିବୁ ନଚେତ ଘର ଛାଡ଼ି ଚାଲିଯିବୁ।ତୋ ଝିଅକୁ ଦିନେ ନା ଦିନେ ଦୁଷ୍କର୍ମ କରିବି କହି ଧମକ ଦେଇଥିଲେ। ସାହି ପଡୋଶୀ ଦୌଡ଼ି ଆସିବାରୁ ଅଭିଯୁକ୍ତ ସେଠାରୁ ପଳାଇଥିଲେ।ଘଟଣାର ପରଦିନ ଇନ୍ଦିରା ଦିଗପହଣ୍ଡି ଥାନାରେ ଏତଲା ଦେବା ପରେ ଆଇଆଇସି ପ୍ରଶାନ୍ତ କୁମାର ପାତ୍ର ଅଭିଯୁକ୍ତ ଙ୍କ ନାଁ ରେ ମକଦ୍ଦମା ରୁଜୁ କରିଥିଲେ। ତଦନ୍ତକାରୀ ଅଧିକାରୀ ଏସ.ଆଇ ଦୁଷ୍ମନ୍ତ କୁମାର ପ୍ରଧାନ ଙ୍କ ସୂଚନା ପ୍ରକାରେ ଅଭିଯୁକ୍ତ ବିବାହିତ ତାର ସ୍ତ୍ରୀ ଶ୍ଵଶୁର ଘର ଗୁଜୁରାଟ ର ସୁରତ ରେ ରହୁଛନ୍ତି।ସେ କୌଣସି କାମ ଧନ୍ଦା ନକରି ସଦାସର୍ବଦା ମଦ ପିଇ ଗ୍ରାମରେ ବୁଲୁଥିବା ସହ ଲୋକଙ୍କୁ ହଇରାଣ କରୁଥିବା ଜଣାପଡିଛି। ତାଙ୍କ ନିକଟରୁ ଏକ କାତି ଜବତ କରାଯାଇଛି।
