ଭାଗ୍ୟ ସାମ୍ମନାରେ ହାରିଯାଇଛନ୍ତି କଲ୍ୟାଣୀ

ହାଟଡିହି ,(ସୋମ୍ୟରଞ୍ଜନ ଦାସ ): ଭାଗ୍ୟରେ ଯାହା ଥାଏ ତାକୁ ଭୋଗିବାକୁ ପଡେ ସମୟ ବଡ ବିଚିତ୍ର ପ୍ରତ୍ୟକ ମୁହୁର୍ତରେ ମନୁଷ୍ୟର ପରିସ୍ତିତିକୁ ପରିବର୍ତ୍ତନ କରିଦେଇ ଥାଏ ସମୟ ,ହସ ଖୁସିରେ ଚାଲୁଥିବା ସଂସାରଟା ଯେ କେତେବେଳେ ଭାଙ୍ଗି ରୁଜି ଚୁରମାର ହୋଇଯାଏ ତାହା ମନୁଷ୍ୟର କଳ୍ପନା ବାହାରେ ଥାଏ | ଏମିତି ଏକ ଦୁଃଖଦ ଖବର ଶୁଣିବାକୁ ମିଳିଛି କେନ୍ଦୁଝର ଜିଲ୍ଲା ହାଟଡିହି ବ୍ଲକ ପଞ୍ଚୁଗୋଛିଆ ପଞ୍ଚାୟତର ମୁଗୁପୁର ଗାଁ ର । ଗ୍ରାମର ବୃନ୍ଦାବନ ସାହୁ ଭୁବନେଶ୍ୱର ର ଏକ ଘରୋଇ କମ୍ପାନୀରେ ସ୍ୱଳ୍ପ ଦରମାରେ କାର୍ଯ୍ୟ କରି ପରିବାରରେ ନିଜ ପତ୍ନୀ କଲ୍ୟାଣୀ ସାହୁ, ପୁଅ ଜଗନ୍ନାଥ ସହ ରହୁଥିଲେ | ଗତ ୨ବର୍ଷ ତଳେ ପତ୍ନୀ କଲ୍ୟାଣୀ ସାହୁ ବ୍ରେନ ଟ୍ୟୁମରରେ ଆକ୍ରାନ୍ତ ହୋଇ ଡାକ୍ତରଖାନାରେ ଭର୍ତ୍ତିହେଲେ । ଅନେକ ଟଙ୍କା ଖର୍ଚ୍ଚ କରିଥିଲେ ମଧ୍ୟ ଭଲ ହୋଇ ପାରିନଥିଲେ । ଏପରିକି ଅପରେସନ ପାଇଁ ଡାକ୍ତରମାନେ ମନା କରିଦେବାରୁ ବାଧ୍ୟହୋଇ କେବଳ ଔଷଧ ଖାଇ ଏବେ ଭାଗ୍ୟକୁ ଆଦରି ପଡିରହିଛନ୍ତି । ସେହିପରି ଗତ ୪ମାସ ତଳେ କଲ୍ୟାଣୀଙ୍କ ସ୍ୱାମୀ ବୃନ୍ଦାବନ ହଠାତ ଜଣ୍ଡିସରେ ଆକ୍ରାନ୍ତ ହୋଇ ଅସୁସ୍ଥ ହୋଇପଡିବାରୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତାଙ୍କର ପିତକୋଶରେ କ୍ୟାନସର ହୋଇଯାଇଥିବା ଓ ଲାଷ୍ଟ ଷ୍ଟେଜ ଥିବାରୁ ଆଉ ସେ ଭଲ ହେବାର ଆଶା ନାହିଁ ବୋଲି ଶୁଣିବା ପରେ କଲ୍ୟାଣୀଙ୍କ ମୁଣ୍ଡରେ ବଜ୍ର ପଡିଥିଲା । ଏହାପରେ ସେ ରୋଗୀଣା ସ୍ୱାମୀ ଓ ପୁଅକୁ ଧରି ଗାଁକୁ ଫେରି ଆସିଥିଲେ । ମାତ୍ର ଘରେ ମୁଣ୍ଡ ଗୁଞ୍ଜିବାକୁ କୌଣସି ସ୍ଥାନ ନଥିବା ବେଳେ ଏକ ପଲିଥିନି ଢ଼ଙ୍କା ଭଙ୍ଗା ଚାଳଘରେ ଦିନ କାଟୁଛନ୍ତି । ଘରେ ଖାଇବାକୁ ନଥିବାରୁ ଅର୍ଦ୍ଧାହାରରେ ଦିନ କାଟୁଛନ୍ତି ବୃନ୍ଦାବନଙ୍କ ପରିବାର । ଏପରି ଅବସ୍ଥାରେ କଲେଜରେ ପଢ଼ୁଥିବା ପୁଅ ଜଗନ୍ନାଥର ଆପ୍ରେଣ୍ଟିସ ସାଇଟ ବାହାରିବାରୁ ଧାର କରଜ କରି ପୁଅକୁ ନେଇ ଅପରେସନ କରିଛନ୍ତି କଳ୍ୟାଣୀ | ଗୋଟିଏ ପଟେ ଦିନକୁ ହଜାର ହଜାର ଟଙ୍କାର ଔଷଧ ଖର୍ଚ୍ଚ ଓ ଅନ୍ୟପଟେ ଜୀବନ ବଞ୍ଚାଇବାର ଚିନ୍ତା । ପରିବାରର ଏପରି ଅବସ୍ଥା ଦେଖି ଗ୍ରାମବାସୀ ମାନେ ସହାୟତାର ହାତ ବଢ଼ାଇଛନ୍ତି । ଯଦି ସରକାର କିମ୍ବା କୌଣସି ସ୍ୱେଚ୍ଛାସେବୀ ସଂସ୍ଥା ସହାୟତାର ହାତ ବଢ଼ାନ୍ତେ ପରିବାରଟି କିଛିଦିନ ପାଇଁ ଦୁଖଃ ଦୁର୍ଦ୍ଦଶାରୁ ମୁକୁଳି ପାରନ୍ତା । ସେହିପରି ପ୍ରଶାସନ ପକ୍ଷରୁ ଯଦି ଆବାସ ଯୋଜନାରେ ଘର ଖଣ୍ଡିଏ ଯୋଗାଇ ଦିଆଯାଆନ୍ତା ତେବେ ପରିବାର ଲୋକେ ମୁଣ୍ଡ ଗୁଞ୍ଜି ପାରନ୍ତେ |